Lobh 13

Ma ya Banabasɩ ɩya Sɔlʋ lobhu

1Laagɔnekʋnyɩtɛnya* ɩya canya ‑kʋa ‑laagɔnɩkplaa ‑ɔ ‑kʋa 'lɛ 'yɛpɩ Antɩɔsʋdua nɩkplaan na sidiin. 'Lɩka mala 'ŋlɩ. Banabasɩ, Simeyɔɔn, ma la 'lɛ Nigɛlɩ na, ɩ sa ‑zɔn lebhe «Ncaakpʋa», Lisiyusu ‑ɔ ‑glɩ 'lɛ 'dua ma la 'lɛ Silɛnɩ na 'la 'kʋa nclɔɔ na, Manayɛɛn, ‑ɔ ‑glɩa 'lɛ Ewlɔdʋ 'nagɔ na ɩya Sɔlʋ. 2Clɩɩ bhlo, daa ma ‑kʋa 'lɛ Laagɔ gʋgwlada 'nyɩ ma zloa 'lɛ ‑zeli na, ‑Kplɔkplɔ ‑Wugoa* ya maa 'cla lebhe: «A gbɛga Banabasɩ ɩya Sɔlʋ, lobholia 'wlukua n la 'lɛ maa na 'la gbʋ.» 3Na, daa ma bhɩalɩ 'lɛ ‑zelizlolɩɛ ɩya bhibhiellɩɛ na, ma ya maa sɩ 'wlu ‑gbɛ, ma ya maa 'cintalɩ 'nyɩ ma ya mʋ.

Banabasɩ ɩya Sɔlʋ ya Siplʋdua 'kʋ mʋ

4Daa ‑Kplɔkplɔ ‑Wugoa* lobhu 'lɛ Banabasɩ ɩya Sɔlʋ na, ma ya mʋ ‑aan 'nyɩ ma ya 'dua ma la 'lɛ Selesii na 'la 'nyigboa 'kʋ 'pɛlɩ. Ma ya dɩpɩa gɔlʋʋn 'tɔ, ma ya 'nyi 'kʋtaan 'plɩlɩ 'nyɩ ma ya Siplʋlekpoa 'kʋ gbazɩ mʋnʋ. 5Ma ŋeni 'lɛ Salaminidua 'kʋ na, Zifʋnyaa* 'la bhibhiepalɩa* ‑zɔn, ma ya Laagɔ 'la niwɔlɩa ‑sa. Maya Zaan, ma la ‑awlɛ 'lɛ Makɩ na, -ɔ mʋa 'lɛ lobholi ‑naa nʋkan. 6Daa ma 'ŋatɩ 'lɛ 'lekpoa ‑aan 'nyɩ ma bhɩalɩ 'lɛ na, ma ya 'dua ma la 'lɛ Pafɔsʋ na 'kʋ ŋeni. Maya ‑abhobhoyanʋnyɔ bhlo ya 'dɛ 'cɩlɩ, ɔ laa ɔcɩ Laagɔnekʋnyɩtɛnyɔ*. Ɔ ‑glɩa Zifʋnyɔ* 'nyɩ ma laa 'mɔɔ 'lɛ Balɩ Zozii. 7Ɔ ‑glɩa duu ‑naa 'kʋ 'la goonvlaa ma laa 'lɛ Sɛlɩgiyusu Pɔlʋsu, 'nyɩ ɔ ‑glɩa 'lɛ dɩgalɩnyɔ na 'la sɔ 'kʋ 'la nclɔɔ. Na, goonvlaa ya Banabasɩ ɩya Sɔlʋ la 'nyɩ ɔ ya 'clalɩ le ɔ 'ka Laagɔ 'la niwɔlɩa 'nyukwliinpo. 8‑Ma 'sekinyɔ ‑naa ma la 'lɛ Elimasɩ na, sa sɛɛ -tɛɛ ɔla 'ŋlɩa sa 'lɛ ‑zɔn na, ya maa gbatlɩmʋnʋ 'nyɩ ɔ 'taa ‑waa lebhe goonvlaa calakwla ɩya ɔ 'plɩa pɔɔtɛtɩkalɩnyɔ.

9Na, Sɔlʋ, ma la ‑awlɛ 'lɛ Pɔlʋ na, ‑Kplɔkplɔ ‑Wugoa -yelio. Ɔ ya nclɔɔa 'ciinkope 'cɩɩ 10'nyɩ ɔ yɔɔ 'cla lebhe: «‑Kplakplanyɔ, ‑abhɔlɛnyɔ, gɔzɛ 'la 'cʋ, ‑mɔɔa ‑ɔ 'ta 'lɛ ‑lʋʋ 'nanʋ ‑wa na, clɩɩ saa 'kʋ 'titi, ‑n ‑cɩ kaa 'lɛ ‑Kwlenyɔ 'la ‑gugwie 'la cɩcɔlɩɛa 'nylugolu bha? 11'Lɩka, ‑Kwlenyɔa cɩ ‑kɔɔ gbaylɩsa. -N -cɩ kanɩ 'citutuun kʋ ɩya ‑n 'la kanɩ 'ylʋbhoa 'ciinlɩ ‑ylɛylɛ.» Dɩpɩa bhlogbɩɩ daa 'fɩan ya Elimasɩ 'ciin 'tutu pla, ɔ didioa ɔcɩ 'kʋ 'nyɩ ɔ 'matɩa nclɔɔ le ɔ 'kaa 'mɔɔ sɔ kla. 12Na, daa goonvlaa 'lɩ 'lɛ ɩmɩa ‑ɩ 'plɩ 'lɛ na, ɔ ya ɔla pɔɔtɛtɛa Zozii 'kʋ zʋ, sa ‑Kwlenyɔa 'la wɔlɩa ma caa 'mɔɔ 'lɛ na, ɩ yaa 'mɔɔ pɔlɛ kla na.

Pɔlʋ ‑kʋ Pisidiibhlɩa 'kʋ, ɔ plici

13Pɔlʋ ɩya ɔla 'namʋnyaa ya 'dua ma la 'lɛ Pafɔsʋ na 'kʋ 'wlʋ, ma ya 'nyi 'kʋtaan 'plɩlɩ 'nyɩ ma ya Panfiliibhlɩa 'kʋ, 'dua ma la 'lɛ Pɛzɩ na 'kʋ mʋ. 'Nyɩ Zaan, ma la 'lɛ Makɩ na ya 'lɛ maa 'yɛpɩ cɩɩnwlʋlʋ 'nyɩ ɔ ya 'lɛ Zolizalɛmʋ cɔlɔ. 14‑Ma, ‑ɔ ‑glɩ 'lɛ maa na, ma ya Pɛzɩ 'kʋbho, ma yaa mʋ ‑aan 'nyɩ ma ya Pisidii Antɩɔsʋ ŋeni. Zifʋnyaa* 'la nyɔkwɛclɩɩa* 'kʋ, ma ya bhibhiepalʋa* ‑zɔn ble 'nyɩ ma ya 'plɩ ma ya sakʋ. 15Ma zɛlɩ 'lɛ Moyizi 'la ‑afluwaa ɩya Laagɔnekʋnyɩtɛnyaa 'naa 'nyɩ ma bhɩalɩ 'lɛ na, bhibhiepalʋtocɩa ya nclɔɔ lobhu le ɔ 'cla maa lebhe: «Bholiecɩnyɩ, ɩ ‑ka ‑kʋ le a ‑ka wɔlɩ ɩya a ‑ka ncɛlɩa ‑ɔ 'wlalɩ ‑da 'wlu na solu na, wɔɔnyɩtʋa ‑kʋ ʋ nyɩɔ anyɩ!»

16Na, Pɔlʋ ya 'kʋbho, ɔ ya sɔ 'kʋ 'bhli 'nyɩ ɔ nabhe: «Izlayɛlɩnyanyɩ* ɩya anyɩa ‑ɔ gʋgwla 'lɛ Laagɔa 'titi na, a po ɩmɩa n cɩ 'ka 'lɛ anyɩ solu na 'nyukwliin. 17‑Ala Izlayɛlɩlɔlʋa 'la Laagɔa ya ‑a tokadɔcɩa desla. Daa ma ‑kʋa 'lɛ Ejibhitibhlɩa 'kʋ na, ɔ ya gba 'nyɩ 'lɔlʋa ya 'ghlibholi. Ɩla leen, ɔla 'tɛtɩa nɩkplaan, ɔ ya gba 'nyɩ ma ya 'yɛpɩ 'wlʋ. 18Ɔ ya maa liowli ‑gwlɩɩ ‑mɔsɔ ‑gbaaglɩɩn 'yɛpɩ 'pʋpʋa nɩkplaan 'klʋlɩlɩ. 19Ɩla leen, ɔ ya gba ma ya Kanaanbhlɩa 'kʋ 'la 'lɔlɩci ‑ngbɔɔsɔ nua 'nyɩ ɔ ya maa ɩla ‑dʋdʋa poli. 20Ɩmɩ ‑naa ‑tɛtɛa cɩa ‑sa liowli ‑gwlɩɩ ‑ngbi 'la dipici ‑nmɔɔna ɩya liowli ‑gwlɩɩ ‑mɔsɔ ɩya 'kʋgba nʋ. 'Nyɩ ɩla leen, ɔ ‑kʋ maa 'tɩtɩplanya 'nyɩda ‑aan Laagɔnekʋnyɩtɛnyɔ* Samɩɛlɩ 'la 'bhlɛsʋa nɩkplaan. 21Na, ma ya Laagɔ nyɩbhɛlʋ 'clalɩ. 'Nyɩ ɔ ya maa Bɛnzamɛɛn 'la 'lɔkpaa 'kʋ la nclɔɔa ma la 'lɛ Kisi na, ɔ ‑yowli Sayulu 'nyɩ. Ɔmɔ ‑naa ya ‑kwle ‑aan liowli ‑gwlɩɩ ‑mɔsɔ. 22Daa Laagɔ ‑sɔɔ 'lɛ dɩpɩa na, ɔ ya maa Daviti 'nyɩ le ɔ 'ka maa ‑kwle. Na, Daviti 'la 'sasʋʋn, dɛ ɔ 'cla 'lɛ lebhe: N ya Zesee ‑yowli Daviti 'lɩ. Ɔ ‑glɩ nclɔɔa nɩkplaan n 'lɩlɩ 'lɛ ɩmɩa ‑tɛtɛa ‑ɩ ‑kaan 'lɛ 'tʋ na. Ɔmɔ ‑ɔ ‑cɩ ka 'lɛ ɩmɩa 'fɩan n ‑wa 'lɛ na nʋ. 23Daviti 'la valɩnɩkplaa nɩkplaan ɔ ‑sa 'lɛ Zozii, Izlayɛlɩlɔlʋ 'la gbʋʋnsanyɔa, ɔla ‑ndanyɩa ɔ ta 'lɛ na 'la 'sasʋʋn. 24'Fɩɔn ɩya Zozii 'ka 'lɛ ci na, Zaan yaa 'kʋklʋʋn pʋ 'nyɩ ɔ ya Izlayɛlɩlɔlʋ kwacalalɩɛa ‑ɩ nyɩ 'nyuwluzʋlɩɛ na, 'la cɩa wɔlɩ solu. 25Na, Zaan 'ka 'lɛ ɔla ‑laagɔlobholia 'wluko na, ɔ yaa neencla lebhe: Ncaasaa a gugua 'lɛ lebhe n ‑glɩa bha? Ɔmɔa a gugu 'lɛ lebhe n ‑glɩ na, ‑n 'ta ɔmɔ n 'ta 'lɛ ‑glɩ. ‑Ma nclɔɔ ‑kʋʋn leen, ɔ ci 'yɛpɩ 'nyɩ n 'ta 'kʋŋwa le n ‑blulu ɔla gbanbʋɩa. 26Bholiecɩnyɩ, ka a ‑ka Ablaamʋ 'la valɩnɩkplaa 'la ncɛlɩ ‑glɩ, ‑aana maa ‑ɔ zʋ 'lɛ Laagɔ 'la sidiin ‑naanʋa a ka ‑glɩo na, anyɩ ma ‑la 'lɛ gbʋʋnsalɩɛa 'la 'dɩa. 27Zolizalɛmʋnyaa ɩya ma tocɩa 'ta 'lɛ ŋonu le ma 'ka Zozii cibhlili le mala gbʋʋnsanyɔ 'nyɩ ma yɔɔ 'lɛ 'gesalɩ na, ma ya Laagɔnekʋnyɩtɛnyaa* 'la wɔɔnyɩtʋa ma zɛlɩ 'lɛ ‑owe ‑owe nyɔkwɛclɩɩa ‑tɛtɛa 'kʋ na, 'kʋglalɩ. 28Ma 'ta wɔlɩ ‑ylɛylɛ 'lɩ -ɩ -cɩ ka 'lɛ gba ɩya ma 'kɔɔ 'bhla na, 'blɩmɔɔn, ma ya Pilatɩ 'clalɩ lebhe ɔ gba ɩya ma 'bhlɔɔ. 29Daa ma nʋ 'lɛ ɩmɩa ‑tɛtɛa ‑ɩ ‑zieoa 'lɛ tooto ‑kplɔkplɔfluwia nɩkplaan Zozii 'la 'sasʋʋn, 'nyɩ ma bhɩalɩ 'lɛ na, ma yɔɔ dabhlalɩsua 'ciin ‑sa 'nyɩ ma yɔɔ 'lɛ lesuun zʋ. 30‑Ma Laagɔ yɔɔ 'kwɩɩnkʋbho 31'nyɩ clɩɩ ‑bhutukpa ‑gbaaglɩɩn ɔ ya ɔcɩ, maa ‑ɔ ‑yɔɔsɔ 'wlʋlʋ 'lɛ Galilee 'nyɩ ma ‑gblaa 'lɛ Zolizalɛmʋ na, pala. Maa ‑ɔ ‑glɩnɩ 'lɛ ‑pɔtɔnʋ ɔla ‑danʋfʋɛlinya Izlayɛlɩlɔlʋ 'fɩan 'ci 'kʋ. 32Na, ‑anyɩ ‑masɛɛ, ‑a ‑sa anyɩ Dɩnanɩ ‑naa: ‑Ndanyɩa Laagɔ taa 'lɛ ‑a tokadɔcɩa na, 33ɔ yɩɩ ‑anyɩ, mala 'cuoa 'la gbʋ 'kʋglalɩ, daa ɔ ‑bho 'lɛ Zozii 'kwɩɩn 'kʋ, saa ɩ ‑zieo 'lɛ labhlɩfluwa 'la ‑mɔsɔ lʋa nɩkplaan lebhe:

‑N ‑glɩ 'na 'cʋ,

‑yaka, ‑amʋ ‑ɔ ‑glɩnɩ 'lɛ ‑n to.

34Na, 'Kwɩa Laagɔ ‑bhoo 'lɛ nɩkplaan 'kʋ le ɔ 'la ka kɩnɩ ‑gluu zɛlɩ na, ɔ yaa 'dɛ 'la wɔlɩa tooto nyɩtɛ, daa ɔ 'cla 'lɛ lebhe: N cɩ 'ka anyɩ ‑kplɔkplɔlɩɩa, ma cɩ 'lɛ ‑delikʋtɛbhalɩ, 'nyɩ n talɩ 'lɛ Daviti ‑ndanyɩ 'kʋ na, 'nyɩ. 35Ɩla gbʋ dɛ Zieziewɔlɩa* nɩkplaan, ɔ cla ‑awlɛ 'lɛ dabhlo lebhe: -N cɩ 'ta kɩnɩ ɔmɔa ‑ɔ ‑glɩ 'lɛ ‑naanɔa na 'cintalɩ ɩya ɔ 'ka lesua nɩkplaan zɛlɩ.

36Daviti lobho 'lɛ Laagɔ ɔla 'bhlɛsʋa nɩkplaan, ɩmɩa Laagɔ bhɔsɔʋa 'lɛ ɔla 'sasʋʋn 'nyɩ ɔ 'ku 'lɛ na, ma yɔɔ ɔ tokadɔcɩ cɩ pʋa 'nyɩ ɔ ya lesua nɩkplaan zɛlɩ. 37‑Ma, ɔmɔa Laagɔ ‑bho 'lɛ 'kwɩɩn 'kʋ na, ɔ 'ta lesua nɩkplaan zɛlɩ. 38Na, bholiecɩnyɩ, ɩmɩa ‑ɩ ‑fata 'lɛ lebhe a cibhlili na, ɩmɩ ‑ɩ ‑glɩ lebhe: Zozii 'la gbʋ, dɛ ‑a mino 'lɛ 'nyɩ ‑a sa 'lɛ anyɩ nyinyivalɩɛ 'la 'dɩa. 'Nyɩ 'kʋnylugolulɩɛa a 'ta 'lɛ mino a 'ka Moyizi 'la ‑jlɩmaa nɩkplaan 'lɩlɩ na, 39Zozii nɩkplaan Laagɔ 'nyɩlɩɛ ncaatʋtʋʋntʋa ‑ɔ ‑zʋɔ 'lɛ ɔla pɔɔtɛtɛa 'kʋ na. 40Na, a zʋlʋ pɔlɛ 'kʋ ɩya wɔlɩa Lagɔnekʋnyɩtɛnyaa* 'bhlia 'lɛ 'kʋ na, ɩ 'la ka anyɩ ŋeni! 41Ɩmɩ ‑ɩ ‑glɩ 'lɛ lebhe:

‑Tutulelinyanyɩ, a po 'nyukwliin,

nikpoo cɩ 'ka anyɩ sla

ɩya a 'ka ‑dʋdʋa 'kʋ mlɔnʋ!

Sa, a cɩ 'ta ka 'ku,

'nyɩ n cɩ 'ka 'lɛ wɔlɩ bhlo nʋ,

ɩmɩa ma ‑ka 'lɛ anyɩ 'dɩkʋsalɩ,

'nyɩ a cɩ 'ta 'lɛ ‑nʋawlɛ la na.»

42Daa Pɔlʋ ɩya Banabasɩ 'wlʋ 'lɛ bhibhiepalʋa* ‑zɔn na, ma ya maa 'clalɩ le ma nyɩtɛ ‑awlɛ 'dɛ 'la wɔlɩa bhlogbɩɩ 'kʋklʋʋn 'la nyɔkwɛclɩɩa 'kʋ.

43Na, daa ma dlolu 'lɛ na, Zifʋnya ɩya maa ‑ɔ 'ta 'lɛ Zifʋnya ‑glɩ 'nyɩ ‑ɔ gʋgwlaa 'lɛ Laagɔ na, ‑anʋa ya Pɔlʋ ɩya Banabasɩ gɩlɩ, 'nyɩ maya maasɔ 'la dɩzʋlɩɛa nɩkplaan, ma ya maa 'tɛtɩɩn zʋ le ma kʋlʋ Laagɔ 'la dananɔa.

Pɔlʋ ɩya Banabasɩ ya maa ‑ɔ 'ta 'lɛ Zifʋnya ‑glɩ na 'klʋtla

44'Kʋklʋʋn ‑nyɔkwɛclɩɩa* ŋeni 'lɛ na, duu ‑naa 'kʋ 'la ncɛlɩa, ‑bhutukpa yaa 'wluwlalɩ le ma 'kaa ‑Kwlenyɔ 'la wɔɔnyɩtʋa 'nyukwliinpo. 45Zifʋnyaa* 'lɩ 'lɛ ‑alawlee ‑naa, dɔgbɛ ya maa pla, ma mʋnʋa Pɔlʋ 'la wɔɔnyɩtʋa gbatlɩ 'nyɩ ma vlaa Laagɔ. 46Pɔlʋ ɩya Banabasɩ 'ta maa 'gulu, 'nyɩ ma ya maa 'cla lebhe: «Anyɩ Zifʋnyaa ma cɩ 'kaa 'lɛ Laagɔ 'la wɔlɩa ‑bɛɛ solulu. ‑Ma a 'ta 'lɛ ŋonu ɩya a 'kɩɩ 'lɛ 'ma, 'nyɩ anyɩ 'titi cla 'lɛ acɩ lebhe aya jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'ta ‑fata na, dɛ ‑anyɩ ‑ma, ‑a ‑tlanɩ 'lɛ maa ‑ɔ 'ta 'lɛ Zifʋnya ‑glɩ na 'klʋ. 47Sa ɩmɩ ‑glɩ 'lɛ wɔlɩa ‑Kwlenyɔa solu 'lɛ ‑anyɩ, daa ɔ claa 'lɛ lebhe: N yɔɔ zʋ le ‑n ka 'bhlɩa ‑tɛtɛa 'la zezezeli 'plɩ, ɩya ‑n ka gba ɩya ‑dʋdʋa 'kʋ 'la ncɛlɩa 'fɩan 'ka gbʋʋnsalɩɛ 'lɩ.» 48Daa ma 'nu 'lɛ wɔlɩ ‑naa na, pɔlɛkʋmɛnɔ ya maa ‑ɔ 'ta 'lɛ Zifʋnya ‑glɩ na yeli, ma woa ‑Kwlenyɔ 'la wɔɔnyɩtʋa ‑evli 'nyɩ maa ‑tɛtɛa ‑ɔ -cɩ kaa 'lɛ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'lɩ na, ya mala pɔɔtɛtɛa Zozii 'kʋ zʋ. 49Na, ‑Kwlenyɔ 'la wɔɔnyɩtʋa ya 'bhlɩa ‑tɛtɛa 'kʋ dlolu. 50‑Ma Zifʋnyaa ya ŋlʋbhɛlɩa ‑ɔ gʋgwlaa 'lɛ Laagɔ ɩya 'dua nɩkplaan 'la ncaakpasɩa 'wlu nyumo. Ma ya gba ncɛlɩ 'matɩa Pɔlʋ ɩya Banabasɩ le ma 'ka maa gbaylɩsa. 'Nyɩ ma ya maa mala 'dua nɩkplaan 'tli. 51Pɔlʋ ɩya Banabasɩ ya mala kplia cɩ 'la pipia maa 'ciin gbɔtɔlʋ 'nyɩ ma ya 'plɩ ma ya 'dua ma la 'lɛ Ikonɩɔmʋ na, 'kʋ mʋ. 52Na, gɩlɩnyaa* ‑kʋa pɔlɛkʋmɛnɔɔn 'nyɩ ‑Kplɔkplɔ ‑Wugoa* ‑yelioa maa.

Currently Selected:

Lobh 13: NTLD13

Highlight

Copy