2 Pɩɛ 2
2
A zʋlʋ yooyo -wɔlɩ 'la canyaa pɔlɛ kʋ
1‑Awlɛ yooyo Laagɔnekʋnyɩtɛnya ‑kʋmʋa 'lɔlʋa sidiin. Na, 'sɛtɛɛ bhlogbɩɩ yooyo ncɛlɩa ‑ɔ la 'lɛ macɩ Laagɔ wɔlɩa 'la canya na cɩ 'ka 'lɛ anyɩ 'nyiglili ɩya ma 'ka anyɩ yooyo -wɔlɩ 'wluun zʋ. Ma cɩ 'ka 'kʋklʋʋn mʋ ɩya ma 'ka Canyɔ 'kadiea ‑ɔ ya 'lɛ mala jabhʋa nɩkplaan 'kplɩ na, ‑blɔ ɩya ma 'kɩɩ nɩkplaan 'faanfan gbaylɩsalɩɛ 'lɩlɩ. 2'Nyɩ ncaabhutukpa cɩ 'ka maa mala ‑badaaglua nɩkplaan gɩlɩ: Mala gbʋ, ncɛlɩ cɩ 'ka ‑nʋawlɛ 'la ‑gugwiea wɔɔnyinyi cɩ nyɩtɛlɩ. 3‑Awlɛ, ma 'ye 'la lɩɩ 'la 'tʋa bhla 'lɛ maa na, ma cɩ 'ka neenmɛma ɩya ma 'ka anyɩ 'nyiglili. Maa ‑naa, mala 'tɩtɩa ya tooto ‑plɔɔ, mala gbaylɩsalɩɛa ma ‑bɛnɩ 'lɛ. 4Sa, Laagɔ 'ta 'bhlaandleecɩa* ‑ɔ nʋa 'lɛ nyinyia na 'kʋ kabha, ‑ma ɔ ya maa gbaylɩsadaa ma la 'lɛ Talɩtalɩ na fa le ma 'ka 'tɩtɩplalaclɩɩa ‑bɛ. 5'Sɛtɛɛ bhlogbɩɩ, ɔ 'ta 'lɛ ‑godogodo ‑laagɔzɔan 'kʋ kabha. ‑Ma, ɔ yaa ncɛlɩ ‑ngbaata 'kʋ 'tɩtɔlʋ daa ɔ gbaa 'lɛ 'nyɩ 'nyua bhlawaa 'lɛ ‑aan 'nyɩ ʋ mlawa 'lɛ nyinyinʋyaa 'la ‑laagɔzɔan 'kʋ na. Ncɛlɩa ‑ngbaata ‑naa sidiin, ma laa bhlo Nowee, ɔ plicia 'kʋnylugolulɩɛ 'la cɩ 'la wɔlɩ. 6‑Awlɛ, ɔ ya 'dia ma la 'lɛ Sodɔmʋ ɩya Gomɔlʋ na gbaylɩsa, ɔ yɩɩ ‑kosu zʋ 'nyɩ ɔ yɩɩ 'tɩtɔ plea ɩya ɔ 'ka 'dɛ 'plɩlɩ ɩya ɔ 'ka ɩmɩa ‑ɩ ‑cɩ ka 'lɛ maa ‑anʋa ‑ɔ ‑cɩ 'kɔɔ 'lɛ gbatlɩmʋmʋ na ŋeni na, pala.
7‑Ma, ɔ ya nclɔɔa ma laa 'lɛ Lɔtʋ na gbʋʋnsa. Lɔtʋa ‑glɩa 'kʋnylugolunyɔ, 'nyɩ 'di ‑naa ‑kʋ 'la ncɛlɩa 'la ‑badaaglunʋnʋgbɩa 'la gbʋ na, ɔ ya cɩɩnkalɔ 'lɩ. 8Sa, 'kʋnylugolunyɔ ‑naa ɔ ‑kʋa 'lɛ maa sidiin na, saa clɩɩa plɩa 'lɛ na, sɛɛ ɔ bhɩa 'lɛ ɔla 'kʋnylugolu -wugoa 'kwlɩ, mala nʋnʋgbanyinyia 'la gbʋ. 9Na, ‑Kwlenyɔa cɩ 'kʋnylugolunyaa 'kwlɩbhɩɛn ‑sa 'nyɩ ɔ cɩ maa -ɔ 'ta 'lɛ 'kʋnylugolunya ‑glɩ na 'la da zʋ 'nyɩ ɔ cɩ maa 'tɩtɩplaclɩɩa 'kʋ gbaylɩsalɩ, 10'tasɩɩ, maa ‑anʋa ‑ɔ gɩlɩ 'lɛ ‑laagɔzɔan 'la 'plɩplɩlɩɩa 'nyɩ ‑ɔ zʋ 'ta 'lɛ ‑Kwlenyɔ 'nɩa na. Maa 'titi ‑ka 'lɛ ma cɩ 'la pɔɔtɛtɛ 'nyɩ ‑tutule ‑yelio 'lɛ maa na, ma 'gulu 'ta ŋanɔ, ‑ma ka ma vla 'lɛ ‑laagɔɔn 'la 'klʋagba ‑wugwia. 11'Bhlɩmɔɔn, 'bhlaandleecɩa 'titia, ‑ɔ ‑ka 'lɛ 'tɛtɩ 'nyɩ ‑ɔ zi 'lɛ ncɛlɩ ‑naa ‑kʋ na, ‑Kwlenyɔa ‑deliin, ma vla 'ta ncɛlɩ ‑naa. 12‑Ma, maa, mala gbɩa ‑kʋ 'lɛ le mlaa ‑ɩ 'ta 'lɛ dɩgalɩ 'wluun ‑ka 'nyɩ ‑ɩ ‑valɩɔ 'lɛ le ma 'ka 'kʋbhli ɩya ma 'ka bhla na, ma vla kaka ɩmɩa ma 'ta 'lɛ ‑ci na. Saa mlaa cɩ 'ka 'lɛ 'ku na, 'sɛtɛɛ bhlogbɩɩ maa ‑masɛɛ, macɩ 'ka 'lɛ 'ku. 13'Lɩka ‑sa, ma cɩ 'ka 'lɛ mala nʋnʋgbanyinyia 'la dluuplʋlɩɛa 'lɩ. ‑Badaaglulilie ‑tɛɛ ‑kʋ 'lɛ ncɛlɩ ‑naa 'wluun 'nyɩ ma ‑wɩɩ 'lɛ ‑gɩgazelɩɩn nʋlɩɛ. Ma ya anyɩsɔ ‑ka 'tlɔnblɩ 'kʋ ‑kʋ na, ma 'nyiglili anyɩ 'nyɩ mala nʋnʋgbɩa lalɩ anyɩ ‑zo 'kʋ. 14Ma ‑ya 'ŋwlɛ 'ka ‑badaaglu 'lɩ ‑tɛɛ, ɩmɩ -ɩ -glɩ 'lɛ wɔlɩa 'fɩan ma gugu 'lɛ na 'nyɩ ma sɛ 'ta 'lɛ gbanyiyi 'la nʋlɩɛ 'kʋ. Ma ‑ka ncɛlɩa ‑ɔ 'ta 'lɛ 'nylugo kpaan Zozii ‑budu 'kʋ 'lɩ na, ka ma 'nyiglili maa 'nyɩ ma fa 'lɛ maa nyinyiin, maa ‑ɔ 'tɛlɩ 'lɛ ‑laagɔzɔan 'la 'plɩplɩlɩɩa 'la pɔɔplelie nɩkplaan na: Laagɔ ya tooto mala 'tɩtɩa ‑pla. 15Ma ya ‑gugwiea ‑ɛ 'nylugolu 'lɛ 'kʋ na te, 'nyɩ ma ya mlɔ. Ma ya nclɔɔa ma la 'lɛ Balamʋ na, Bozɔlʋ ‑yowli, ‑ɔ ‑waa 'lɛ ‑dufle ‑dala na 'la 'bɩa bhli. 16‑Ma, Balamʋ ya ɔla nyinyia 'la 'bɩsalɩɛ 'lɩ. 'Flumuŋlɔ, ‑ʋ nyɩtɛ 'taa 'lɛ na, ya ncaablɩɩzɔn 'ma 'nyɩ ʋ ya Laagɔnekʋnyɩtɛnyɔa* 'la pɔɔblagbɩa 'nylugolu.
17Ka ncɛlɩ ‑naa 'la gbɩa ‑kʋ 'lɛ le 'nyukobhia 'nyu 'ta 'lɛ nɩkplaan ‑kʋ na ɩya 'nyukplia ‑bubo famʋ 'lɛ na 'bhisa. Laagɔ ya maa sakʋda bhɔsʋa 'yɛpɩ 'tutukpoonkpiea nɩkplaan. 18Ma 'plɩlɩ neenmɛnɔa ‑ʋ 'ta 'lɛ ‑nʋawlɛ ‑ylɛylɛ nɩkplaan ‑ka na ɩya ‑badaaglulilie 'nyɩ ma 'nyiglili 'lɛ ncɛlɩa ‑ɔ wlʋ 'lɛ maa ‑ɔ ‑mlɔɔa 'lɛ maa na, wlɩɩnwlʋda na. 19Ma ta ‑ndanyɩ lebhe ma cɩ 'ka maa ‑ncɩkalɩɛ 'nyɩ, 'dɛndlana, maa 'titi ‑glɩ ka ‑azla wɔɔnyinyi 'la geye, sa lʋʋa ‑ʋ ‑kwle 'lɛ nclɔɔ na ɔla geyu ɔ ‑glɩ 'lɛ. 20'Nyɩ maa ‑ɔ 'plɩlɩ 'lɛ Zozi Klisi, ‑ala ‑Kwlenyɔ ɩya Gbʋʋnsanyɔa 'la cibhlililiea 'kʋ, 'nyɩ ‑ɔ 'wlʋ 'lɛ ‑laagɔzɔan 'la nʋnʋgbɩa ‑ɩ nyumo 'lɛ nclɔɔ na nɩkplaan na, ma ‑ka macɩ ne te 'nyɩ ma ‑ka ‑awlɛ ɩla ‑kwleliea ‑zɔn cɔlɔ na, bhɩalɩdaa, mala wɔlɩa 'tɛbhalɩ 'nyɩ ɩ zi ‑bɛka naanɩa 'kʋ. 21Sa, ɩ nanɩa mala da le ma 'la cibhlilia 'kʋnylugolulɩɛ 'la ‑gugwiea, 'nyɩ ɩ zi saa ma yɛɛ 'lɛ cibhlili 'nyɩ ma ya 'lɛ ‑kplɔkplɔ -jlɩmaa ma 'nyɩ 'lɛ maa na kɔkʋʋn ‑tla na 'kʋ. 22Na, ɩmɩa ‑nyandlaa nyɩtɛ 'lɛ na, ɩmɩ 'titi ‑ɩ ŋeni 'lɛ maa. Ɩmɩ ‑ɩ ‑glɩ 'lɛ lebhe: «Goyia ya ɛla gɔzɩlɩɛa 'ciincɔlɔ», 'nyɩ «bhuzea ma wlʋ 'lɛ budoda na 'bhisiolu ‑awlɛ acɩ ‑bʋbɔnzɩa nɩkplaan.»
Currently Selected:
2 Pɩɛ 2: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.