2 Kolt 5

1Sa ‑a ‑ci sɛɛ lebhe ‑ala ‑dʋdʋa 'kʋ 'la sakʋdaa ‑ɩ ‑glɩ 'lɛ ‑paaplu ‑tɛɛ na, ɩ ‑ka gbɔlʋ na, ‑a ‑ka ‑palʋa nclɔɔ 'ta 'lɛ 'sla, ‑ma ‑ʋ glɩ 'lɛ Laagɔ 'la 'slaslapalʋ 'nyɩ ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'yɛpɩ ‑laagɔɔn. 2'Nyɩ ‑a bhalɩ, ‑a ‑wa lebhe ‑a ‑ka 'faanfan ‑dʋdʋ 'kʋ ‑naanʋa nɩkplaan 'wlʋ ɩya ‑a ‑ka ‑laagɔɔn ‑naanʋa nɩkplaan ble, 3ma 'ta sɛ ‑anyɩ ‑abaan ŋeni, 'nyɩ ‑a -ka nɩkplaanpla na. 4Sa ‑anyɩa ‑ɔ ‑kʋ 'lɛ ‑paaplu ‑naa ‑zɔn na, ‑a bhalɩ, 'nyɩ ‑a ‑kʋ 'kwlɩbhɩɛɛn. 'Bhlɩmɔɔn ‑a 'ta ‑wa lebhe ‑a ‑ka nɩkplaan ‑sa, ‑ma ‑a ‑ka lokwia -anɛ ɛ 'yʋ 'kʋ -gbɛ ɩya ɛmɛa ‑ɛ ‑kuo 'lɛ na 'ka jabhʋa nɩkplaan ble. 5Ɔmɔa ‑ɔ bhɔsʋa 'lɛ ‑anyɩ ɩmɩ ‑naa 'la gbʋ na, ɔmɔ ‑glɩ 'lɛ Laagɔ. Ɔmɔ 'nyɩ 'lɛ ‑anyɩ 'Wugoa 'la 'nanɩa.

6Na ‑anyɩ, ‑a ‑ka clɩɩa 'fɩan pɔɔtɛtɛ 'nyɩ ‑a ‑ci lebhe ‑a ‑ka ka 'nyɛkɛ ‑naa nɩkplaan ‑kʋ na, ‑a 'ta ‑ala ‑palʋa -zɔn ‑kʋ, ‑a tlʋ Laagɔ cɩ da, 7sa pɔɔtɛtɛ nɩkplaan ‑a namʋnʋ 'lɛ, ‑ma ‑n 'ta ɩmɩa ‑a ‑jlɛ 'lɛ na nɩkplaan. 8‑Ghɛɛ, pɔɔtɛtɛ ‑yelio ‑anyɩ 'nyɩ ‑a ‑wa le ‑a ka 'nyɛkɛ ‑naa nɩkplaan 'wlʋ ɩya ‑a ka ‑Kwlenyɔa cɩ sa kʋ mʋ. 9'Sɛlagbʋkʋ na, dɛ ‑a 'matɩ 'lɛ le ‑a ‑ka 'nyɛkɛ ‑naa nɩkplaan ‑kʋ ‑aana ka ‑a ‑kɛɛ nɩkplaan 'wlʋo na, ‑a ka ɔla pɔɔsa nʋ. 10Sa ɩ ‑fata lebhe ‑anyɩa 'fɩan ‑a 'plɩlɩ Laagɔ 'la ‑Sasanyɔa* 'la 'tɩtɩplajlea ‑deliin ɩya nclɔɔ nclɔɔ 'ka ɔla 'nanɩa ‑aana ɔla nyinyia ɔ ya 'lɛ nʋ, daa ɔ ‑kʋa 'lɛ ‑wɔlʋ ‑dʋdʋa 'kʋ na ɩla dluuplʋlɩɛa 'lɩ.

‑A ya Klisi 'kʋ 'plɩlɩ 'nyɩ ‑aya Laagɔ ya 'lɛ ‑walɩ

11‑A ‑ka 'lɛ ‑Kwlenyɔ 'la zʋlɩɛ na, dɛ ‑a 'matɩ 'lɛ le ‑a ka ncɛlɩ 'la pɔlɩa ko 'nyɩ Laagɔ ‑ci ‑anyɩ -aan ɔ -bhɩalɩɔ. ‑Amʋ ‑masɛ n gugu lebhe ala wɔɔgugwiea nɩkplaan a ‑ciin 'nanɩ. 12-A cɩ 'ta ‑awlɛ bhɔ le ‑a ‑ka ‑acɩ anyɩ pala, ‑ma ka -a ‑wa 'lɛ le ‑a ‑ka anyɩ ‑jioli 'nyɩ le a kpolili anyɩ 'kʋ ɩya a 'ka mino a 'ka maa ‑ɔ kpolili 'lɛ 'tata 'kʋ 'la lɩɩa ‑tɛɛ nɩkplaan 'nyɩ ‑ɔ 'ta 'lɛ pɔlɛɛn ‑naanɩa ‑ka na, neenŋonusa cibhlili. 13Ka ‑a ‑kaa ‑badaaglunya -glɩ na, Laagɔ 'la gbʋ, dɛ ‑a glɩa 'lɛ maa. ‑Ma gbazɩ ‑a ‑ka dɩgalɩ gbɩ nʋ na, ala gbʋ ‑a nʋɩ 'lɛ. 14Klisi 'la ‑walʋa ‑yelio ‑anyɩ, ‑a ‑ka gugu lebhe nclɔɔ bhlo ɔmɔ ‑ɔ 'ku 'lɛ ncɛlɩa 'fɩan 'la gbʋ, 'dɛndlana ncɛlɩa 'fɩan ya 'ku. 15'Nyɩ ɔ ya ncɛlɩa 'fɩan 'la gbʋ 'ku le maa ‑ɔ ‑kʋ 'lɛ na, ma 'la ka maa 'titi macɩ 'la gbʋ 'kʋ, ‑ma ma 'kanɩ ɔmɔa ‑ɔ 'ku 'lɛ 'nyɩ ‑ɔ ya 'lɛ 'kwɩɩnkʋbho na ɔla gbʋ kʋ.

16'Sɛlagbʋkʋ na, ‑pɔtɔnʋ, ‑a 'manɩ 'tanɩ 'nyɛkɛa 'kʋ ɩya a ‑ka nclɔɔ cibhlili. Ka ‑a ‑ka 'nyɛkɛa 'kʋ 'manɩ 'nyɩ -a ‑kaa Klisi cibhlili na, ‑yaka ‑a 'tanɩɔ sɛɛ ‑ci. 17Gbazɩ nclɔɔ ‑ka Klisi ‑kʋlʋ na, ɔ ‑glɩnɩ ncaalelo. Tooto ‑laagɔzɔan ya 'plɩ, ɔ ‑kʋnɩ ‑laagɔ zɔn ‑lelu nɩkplaan. 18Ɩmɩ ‑tɛtɛa, ɩ 'wlʋlʋ Laagɔ wlɩɩn, ɔmɔa ‑ɔ 'plɩlɩ 'lɛ Zozi Klisi 'kʋ 'nyɩ ‑a ‑yɔɔsɔ ya 'lɛ ‑walɩ na, ɔ ya ‑anyɩ nebhloplɩlɩɛa 'la lobholia nʋda 'nyɩ. 19Sa, saa ɩ ‑kaa ‑kʋkʋlʋ na, Laagɔ, ‑ɔ 'plɩlɩa 'lɛ Klisi 'kʋ 'nyɩ ɔ ya ncɛlɩ ‑walɩ 'lɛ. Ɔ 'manɩ 'tanɩ mala nyinyia 'kʋ, ‑ma ɔ ya ‑anyɩ nebhloplɩlɩɛa 'la wɔɔnyɩtʋa nɩkplaan zʋ.

20Na, Klisi ɔmɔ ‑ɔ lobhu 'lɛ -anyɩ ɔla 'ŋlɩa nɩkplaan. 'Nyɩ Laagɔ 'titi -ɔ 'plɩlɩ 'lɛ ‑anyɩ 'kʋ 'nyɩ ɔ la 'lɛ anyɩ. Na, ‑a bhibhie anyɩ Klisi 'la 'ŋlɩa nɩkplaan le a ŋonu ɩya a ‑yɔɔsɔ 'plɩ bhlo. 21Ɔmɔa ‑ɔ 'taa 'lɛ nyinyi cibhlili na, Laagɔ yɔɔ ‑ala nyinyia ‑slo ɩya ɔmɔ nɩkplaan, ‑a ka Laagɔ ‑deliin 'kʋnylugolunya 'plɩ.

Currently Selected:

2 Kolt 5: NTLD13

Highlight

Copy

Compare