1 Zaan 1
1
Ɩmɩa ɩ ‑fata 'lɛ lebhe a cibhlili na
1Ɩmɩa ‑ɩ ‑kʋa 'lɛ bhɔdaa tooto, ‑a 'nu 'lɛ, ‑ala 'ci 'lɩ 'lɛ, ‑a 'lɩmʋ 'lɛ, 'nyɩ ‑ala wlɩa kla 'lɛ cɩ na, ɩmɩ ‑ɩ ‑glɩ 'lɛ wɔɔnyɩtʋa ‑ʋ nyɩ 'lɛ jabhʋa na. 2Sa jabhʋa ya ʋcɩ pala, ‑a yʋʋ 'lɩ, ‑a ‑lio ʋla ‑danʋfʋɛ, dɛ ‑a sa 'lɛ anyɩ jabhʋ ‑naa ‑ʋ ‑kʋ 'lɛ 'lʋkʋlʋkʋ na 'la 'dɩa. Toa cɩ ‑ʋ -kʋa 'lɛ 'fɩɔn, 'nyɩ ʋ ya 'lɛ ‑anyɩ ʋcɩ pala. 3Na, ɩmɩa ‑ala 'ci 'lɩ 'lɛ, 'nyɩ ‑ala 'nyukwli 'nu 'lɛ na, ɩmɩ ‑a salɩ 'lɛ anyɩ 'dɩ 'kʋ, ɩya anyɩ ‑masɛɛ aya ‑anyɩsɔ 'ka bhlo 'plɩ. 'Nyɩ ‑ala nebhloplɩlɩɛa ‑glɩ ‑aya Toa ɩya ɔla 'Cʋa ‑ɔ ‑glɩ 'lɛ Zozi Klisi na, 'la nebhloplɩlɩɛ. 4Ɩla gbʋ, dɛ ‑a zie 'lɛ anyɩ ɩmɩ ‑naa, ɩya ‑ala pɔlɛkʋmɛnɔa 'ka 'kʋglalɩ.
‑A namʋnʋ zezezelia nɩkplaan
5'Lɩka wɔlɩa ‑ɩ 'wlʋlʋɔ 'lɛ neen, ‑a 'nu 'lɛ, 'nyɩ ‑a solu 'lɛ anyɩ na. Ɩmɩ ‑ɩ ‑glɩ 'lɛ lebhe Laagɔ ‑glɩ zezezeli, 'nyɩ 'tutu ‑ylɛylɛ 'tɔɔ nɩkplaan ‑kʋ. 6Na, gbazɩ ‑a ‑ka 'cla lebhe ‑a ‑yɔɔsɔ ‑glɩ bhlo, 'nyɩ ‑a ‑ka ka ‑azla 'tutua nɩkplaan namʋnʋ na, 'dɛndlana, ‑a ‑glɩ yodizʋnya 'nyɩ ‑a namʋnʋ 'ta ‑nʋawlɛ nɩkplaan. 7‑Ma gbazɩ ‑a ‑ka zezezelia nɩkplaan namʋnʋ, 'nyɩ ɔmɔ 'titi ‑kʋ 'lɛ ‑zelia nɩkplaan na, 'dɛ 'la daa na, ‑anyɩa 'fɩan ‑a ‑glɩ bhlo 'nyɩ ɔla 'Cʋa ‑ɔ ‑glɩ 'lɛ Zozi na, ɔla ‑dolua sa ‑anyɩ nyinyia 'la 'zɩa* ‑tɛtɛa cɩ.
8'Nyɩ ‑a ‑ka 'cla lebhe a 'ta nyinyi ‑ka na, ‑anyɩ 'titi ‑acɩ a 'nyiglili 'lɛ, 'nyɩ ‑nʋawlɛ 'ta ‑anyɩ nɩkplaan ‑kʋ. 9‑Ma gbazɩ ‑a ‑ka ‑ala nyinyia cibhlili, 'nyɩ ‑a kɩɩ ‑zɔnwlaa na, ɔ ‑glalɩ 'lɛ ɔla niwɔlɩ 'kʋ 'nyɩ ɔ 'nylugolu 'lɛ 'kʋ na, ɔ cɩ 'ka ‑ala nyinyia va ɩya ɔ 'ka ‑anyɩ ɩmɩa ‑tɛtɛa ‑ɩ 'ta 'lɛ 'kʋnylugolu na 'la 'zɩa cɩ ‑sa. 10Na, ‑a ‑ka 'cla lebhe ‑a 'ta 'ka nyinyi nʋ na, 'dɛndlana, Laagɔ ‑a ple 'lɛ yodizʋnyɔ, 'nyɩ ɔla wɔɔnyɩtʋa 'ta ‑anyɩ nɩkpaan ‑kʋ.
Currently Selected:
1 Zaan 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.