1 Tim 3
3
‑Laagɔnɩkplaa 'la 'kʋklʋʋnpʋnya
1'Lɩka wɔɔnyɩtʋa ‑ʋ ‑ŋwa 'lɛ 'kʋ le ma 'tɛbhalɩ ‑deli 'kʋ na. Gbazɩ nclɔɔ ‑ka 'matɩ le ɔ 'ka ‑laagɔnɩkplaa 'la 'kʋklʋʋnpʋnyɔ 'plɩ na, lobholi 'nanɩ ɔ ‑wa 'lɛ lebhe ɔ 'ka nʋ. 2'Bhlɩmɔɔn ɩ 'ta ‑fata lebhe ‑laagɔnɩkplaa 'la 'kʋklʋʋnpʋnyɔ, ma 'lɩlɩɔ 'ge nɩkplaan. Ɩ ‑fata lebhe ɔ 'plɩ 'ŋlɔ bhlo ‑ŋuto, ɔ falɩ ɔcɩ pɔlɛ cɩ, ɔ mino ɔcɩ 'kʋklalɩɛ, ɔ nʋ dɩgalɩgbɩ, ɔ kla ncɛlɩ 'nanɩ ɩya ɔ mino calɩɛ. 3Ɔ 'la 'plɩa nʋmlanyɔ naa, ɔ 'la 'plɩa ‑bhɩakpanyɔ, ‑ma 'naa ɔ 'plɩ pɔɔwɔtɩnyɔ ɩya ɔ 'la wabha 'slagbʋ ɩya 'dala. 4'Naa ɔ cibhlili ɔmɔ 'titi ɔla 'slea 'nanɩ 'klʋlɩsa, ɩya ɔ gba ɔla 'cuoa ‑la macɩ ‑dʋdʋ 'kʋ, zʋlɩɛ nɩkplaan. 5‑Masa gbazɩ nclɔɔ 'ta ɔmɔ 'titi ɔla 'slea 'klʋlɩlɩɛ mino na, 'nsasa ɔ cɩ 'kaa 'lɛ Laagɔ 'la ncɛlɩa 'klʋlɩlɩɛ mino bha? 6Ɩ 'ta nanɩ lebhe ɔ 'plɩ nclɔɔa ‑ɔ wlʋ 'lɛ kwlacalada na, ‑tutule 'la ka sɛɔ pɔlɛ 'ghlibholi ɩya ɔ 'la ka sɛ gbaylɩsalɩɛ 'lɩ gɔzɛ 'bhisa. 7‑Awlɛ, ɩ ‑fata lebhe ɔ 'plɩ nclɔɔa, maa ‑ɔ 'ta 'lɛ 'klisi 'la pɔɔtɛtɛ ‑ka na, nyɩtɛ 'lɛ ɔla wɔɔnanɩ na, ɔ 'la ka sɛ ‑sʋkpɔɔ ɩya gɔzɛ 'la kɔɔ daanlɩ.
'Kʋklʋʋnpʋnyaa 'la klalɩnya
8‑Laagɔnɩkplaa 'la 'kʋklʋʋnpʋnya 'la klalɩnyaa ‑masɛɛ, ɩ ‑fata lebhe ma 'plɩ ncɛlɩa ncɛlɩ zʋ 'lɛ na, ɩya ma 'la kalɩa mɩɔ ‑mɔsɔ, ma 'la 'plɩa nʋgbumlanya ɩya ma 'la 'matɩa ‑dufleedala. 9Ɩ ‑fata lebhe ma kalɩ ‑nʋawlɛa Laagɔ wlaa 'lɛ ‑zɔn na 'la pɔɔtɛtɛ, wɔɔgugwiea ‑ɛ ‑kplɔ 'lɛ na nɩkplaan. 10Ɩ ‑fata lebhe ma cla maa nɩkplaan 'fɩɔn, ɩya ka ma 'ta maa nʋnʋgbɩa ‑ɩ ‑salɩ 'lɛ maa 'ge na, nɩkplaan 'lɩlɩ na, ma 'kanɩ maa 'ma le klalɩnya. 11Ɩ ‑fata lebhe 'ŋwlɛa ‑ma, ma 'plɩ 'ŋwlɛa ncɛlɩ zʋ 'lɛ na ɩya ma 'la nyɩtɛa 'lɩbhɩlɩbhɩ. 'Naa ma falɩ macɩ pɔlɛ cɩ ɩya ma 'plɩ 'ŋwlɛa ma cɩ 'lɛ ‑delikʋtɛbhalɩ na. 12‑Awlɛ, ɩ ‑fata lebhe klalɩnyɔa 'plɩ 'ŋlɔ bhlo ‑ŋuto ɩya ɔ mino ɔla 'cuo ɩya ɔla 'slinya 'nanɩ 'klʋlɩlɩɛ. 13Sa klalɩnyaa ‑ɔ nʋ 'lɛ mala lobholia 'nanɩ na, ma lɩ ncɛlɩa 'fɩan 'la 'ŋwleenfalɩlɩɛ ɩya ‑delikʋtɛlɔ 'kadie, ‑ʋ 'wʋlʋ 'lɛ mala pɔɔtɛtɛa ma zʋ 'lɛ Zozi Klisi 'kʋ na, nɩkplaan na.
Laagɔgɩlɩlɩɛ 'la wɔlɩa ‑ɩ ‑zizieo 'lɛ na
14Ka n zie ka kɔɔ 'lɛ ɩmɩ ‑naa, ‑ma n gugu lebhe n cɩ 'kɔɔ clɩɩklipɛ nɩkplaan kopekan ci. 15'Bhlɩmɔɔn, ka n ‑ka didleli na, ‑sa ‑n ‑cɩ ka 'lɛ saa ‑n cɩ ka 'lɛ Laagɔ 'la ‑palʋa ‑ʋ ‑glɩ 'lɛ ‑jaja Laagɔ 'la ‑laagɔnɩkplaa, ‑nʋawlɛ 'la ‑bhlɔlʋa ɩya ɛla kpoa na, sidiin namʋnamʋnʋ na, cibhlili. 16Laagɔgɩlɩlɩɛ 'la wɔlɩa ‑ɩ ‑zizieo 'lɛ na, ɩ 'ghli ‑nʋawlɛsa.
Klisi ya 'nyɛkɛ 'plɩ,
Laagɔ 'la 'Wugoa ya ‑danʋfʋɛ li lebhe ɔ 'nylugolu 'kʋ,
'bhlaandleecɩa* yɔɔ 'lɩ,
ɔla 'dɩa ya maa ‑ɔ 'ta 'lɛ Laagɔ ‑ci na 'bhlɩ ŋeni,
‑laagɔzɔan, ncɛlɩ yɔɔ mala pɔɔtɛtɛa 'kʋ zʋ,
'nyɩ ɔ ya 'lɛ 'klʋagba nɩkplaan mʋnʋ.
Currently Selected:
1 Tim 3: NTLD13
Highlight
Copy
Compare
Share
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
