1 Pɩɛ 5
5
'Kʋklʋʋnpʋnyaa 'la lobholia
1Ncaakpasɩa ‑ɔ ‑kʋ 'lɛ anyɩ sidiin na, ‑amʋa ‑ɔ ‑glɩ 'lɛ maa 'bhisa 'kʋ 'la ncaakpasa ɩya Klisi 'la 'kwlɩbhɩɛ 'la ‑danʋfʋɛ, 'nyɩ ‑ɔ cɩ ka 'lɛ 'klʋagbaa ‑a cɩ ka 'lɛ ‑zɔnwlʋ na 'lɩmʋ na, n zʋ maa 'tɛtɩɩn 'nyɩ n cla maa lebhe: 2A kpa Laagɔ 'la mlakpaa ɔ zʋ 'lɛ anyɩ wlɩɩn na. A 'lɩa 'klʋ ‑n 'ta le saa a ‑mieli 'lɛ ala 'klʋlɩwɔlɩa nɩkplaan na, ‑ma pɔlɛ wɩaan, saa Laagɔ ‑wa 'lɛ na. A 'la nʋɩ 'dala 'wluku, ‑ma a nʋnʋɩ ‑nwɔvilɩɛ nɩkplaan. 3A 'la kla maa ma 'nyɩ 'lɛ anyɩ 'klʋlɩda na, ‑gblɔgblɔ ‑ma a 'plɩ ncɛlɩa mlakpaa cɩ 'ka 'lɛ dɩbalɩ na, 4ɩya daa mlakpanyaa ‑tɛtɛa ma toa cɩ 'ka 'lɛ ci na, a 'ka 'klʋagba ‑asɩkɛkpoonkpoa ‑a kpli 'ta 'lɛ na 'lɩ.
A ‑la acɩ ‑dʋdʋ 'kʋ
5'Sɛtɛɛ bhlogbɩɩ, ncaanyɩgbɩanyɩ, a ‑la acɩ ‑dʋdʋ 'kʋ ɩya a 'nyɩ ncaakpasɩa. Ɩya anyɩa 'fɩan, nclɔɔ nclɔɔ ‑la ɔcɩ ‑dʋdʋ 'kʋ ɩya ɔ 'nyɩ ɔ 'yʋ, sa Zieziewɔlɩa* ɩ cla lebhe: Laagɔ mʋnʋ ‑tutulelinyaa gbatlɩ, ‑ma maa ‑ɔ la 'lɛ macɩ ‑dʋdʋ 'kʋ na, ɔ pala maa ɔla dananɔa. 6Na, a ‑la acɩ ‑dʋdʋ 'kʋ ɩya a zʋ acɩ Laagɔ 'la 'tɛtɩkalɩsɔa ‑zɔn, ɩya daa clɩɩa ‑ɩ zʋɔ 'lɛ na ɩ cɩ 'ka 'lɛ ŋeni na, ɔ 'ka anyɩ 'kʋto. 7A 'ma ala pɔɔpleliea ‑tɛtɛa ɩya a zʋɔ wlɩɩn, sa ɔ falɩ anyɩ pɔlɛ cɩ. 8'Naa a cibhlili acɩ 'kʋklasa, ɩya a ‑bɛ. Sa ala ‑zɔbhɛlɩgbanyɔa ‑ɔ ‑glɩ 'lɛ gɔzɛ na, ɛ bi anyɩ, ‑bhedi 'bhisa, 'nyɩ ɛ 'matɩ nclɔɔa ɛ cɩ 'ka 'lɛ li na. 9A 'nylugo kpaan pɔɔtɛtɛ nɩkplaan, ɩya a mʋnʋɛ gbatlɩ, ɩya a cibhlili lebhe a bholiecɩa ‑ɔ ‑kʋ 'lɛ ‑laagɔzɔan na, 'kwlɩ ‑naa bhlogbɩɩ ‑ɩ bhɩa 'lɛ maa.
10Na, 'kwlɩ cɩ 'ka anyɩ bhɩa 'pɛpɛ. ‑Ma, Laagɔ, 'nanɩa tɛtɛa toa, ‑ɔ la 'lɛ anyɩ le aya Klisi 'ka bhlo 'plɩ, ɩya a 'ka ɔla 'klʋagbaa, ‑a ‑kʋ 'lɛ 'lʋkʋlʋkʋ ɩya 'lʋkʋlʋkʋ na nɩkplaan kʋmʋ na, ɔmɔ 'titi cɩ 'ka anyɩ 'fɩkɔfɩkɔ ple. Ɔ cɩ 'ka gba ɩya a 'ka ‑sikplii zʋ, ɔ cɩ 'ka anyɩ 'tɛtɩɩn zʋ ɩya ɔ 'ka gba ɩya a 'ka kpaan 'nylugo. 11'Naa ‑kwlelie 'plɩ ɔla daa 'lʋkʋlʋkʋ ɩya 'lʋkʋlʋkʋ! Ɩ kʋ sɛɛ.
Bhɩalɩwɔlɩ ɩya ‑ayopalɩɛ
12Silivɛɛn 'kʋ n 'plɩlɩ 'lɛ 'nyɩ n ya 'lɛ anyɩ ‑aflupɛ ‑naa zie le n 'ka anyɩ 'tɛtɩɩn zʋ ɩya n 'ka anyɩ 'cla lebhe Laagɔ 'la ‑walʋa 'titi a ‑kʋlʋ 'lɛ. Ɔ ‑glɩ 'na da, bholia ma cɩ 'lɛ ‑delikʋtɛbhalɩ na.
13Laagɔ 'la deslaslanyaa 'la ‑kandea ‑a ‑kʋ 'lɛ Babilɔnʋdua 'kʋ na, ma pa anyɩ ‑ayo. N ‑yowli Makɩ ‑ma, ɔ pa anyɩ ‑ayo. 14A gbelegbeleli bholiecɩ 'bhisa ɩya a 'papalɩ ‑ayo. Pupue ŋeni anyɩa 'fɩan ‑ɔ ‑kʋ 'lɛ Klisi nɩkplaan na 'kʋ!
Currently Selected:
1 Pɩɛ 5: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.