1 Kolt 9

Pɔlʋ ya lɩɩa ‑ɩ ‑glɩ 'lɛ ɔla da na ‑blɔ

1N 'ta ‑ncɩkalɩnyɔ ‑glɩmʋ bha? N 'ta Klisi 'la lobhulobhunyɔ* ‑glɩmʋ bha? 'Na 'ci 'ta ‑ala ‑Kwlenyɔ Zozii 'lɩ bha? Anyɩ 'ta 'lɛ ‑Kwlenyɔ 'la lobholia n nʋ na 'la ‑nvʋsʋɛa ‑glɩ bha? 2Ɩ ‑ka ‑kʋ lebhe ‑buun ncɛlɩ 'la da, n 'ta Klisi 'la lobhulobhunyɔ ‑glɩ na, anyɩ 'bhebhe a cɩ cibhlili lebhe n ‑glɩɔ ‑na. Sa lobholia ‑Kwlenyɔa lobhuun 'lɛ le n nʋ na, anyɩ ‑ɔ ‑glɩ 'lɛ ɩla ghleda. 3Maa ‑ɔ gɩɩn 'lɛ wɔlɩ 'kʋ na, 'lɩka ɩmɩa n solu 'lɛ maa na. 4‑A 'ta lilie ɩya 'mlalɩɛ 'la ‑jioli ‑kamʋ bha? 5‑Daa lobhulobhunyaa, ‑Kwlenyɔ bholiecɩa ɩya Pɩɛlɩ 'bhisa, ‑a 'ta ‑jioli ‑kamʋ ɩya ‑a ka 'ŋlɔ lowluun famʋ bha? 6N ‑ya Banabasɩ ‑tɛɛ ‑ɩ ‑fata 'lɛ lebhe ‑ɔ kpla slo 'fɩɔn ɩya ‑a ‑ka li bha? 7Ncaasaa ‑ɔ ya ‑azla 'lɛ ɔmɔ 'titi ɔla wlɩɩn 'la 'dala 'ma 'nyɩ ɔ ya 'lɛ 'soja li bha? Ncaasaa ‑ɔ golowa 'lɛ ‑ghlɛzɛɛnkwla, 'nyɩ ɔ li 'taa 'lɛ ala nɩkplaan 'la 'cie bha? ‑Aana ncaasaa ‑ɔ kpawa 'lɛ mla 'nyɩ ‑ɔ 'mla 'taa 'lɛ ɩla lʋbhʋ bha?

8Wɔlɩa n nyɩtɛ 'lɛ na, ncɛlɩ bhlobhlo 'la nʋnʋgbɩ nɩkplaan ‑tɛɛ n 'manɩɩ 'lɛ bha? ‑Jlimaa 'bhlimʋ 'ta wɔlɩa bhlogbɩɩ 'kʋ bha? 9‑Masa, ɩ ‑zieo Moyizi 'la ‑jlɩmaa nɩkplaan lebhe: «Bhlia ‑ɛ sa 'lɛ 'dɩdɩlɩɩa 'caa 'ciin na, ‑naa gʋa ɛla nea.» Na, Laagɔ bhlicɩa 'la pɔlɛ ɔ ple 'lɛ bha? 10‑N 'ta ‑anyɩ bhlobhlo ‑ala gbʋ ‑tɛɛ ɔ nyɩtɛ 'ta 'lɛ ‑sa bha? ‑Ghɛɛ, ‑ala gbʋ ɩmɩ ‑naa ‑zieo 'lɛ. Sa ɩ ‑fata lebhe ɔmɔa ‑ɔ golo 'lɛ na, ɔ 'tɛbhalɩ pɔlɛ 'kʋ lebhe ɔ cɩ 'ka ‑sa, ɩya ɔmɔa ‑ɔ sa 'lɛ 'caa 'ciin na, ɔ 'tɛbhalɩ pɔlɛ 'kʋ lebhe ma cɩ ɔla da 'nyɩmʋ. 11Na, ‑a ya 'lɛ 'Wugoa 'la 'caa anyɩ nɩkplaan golo na, 'nyɩ a ‑ka ala 'nanɩa nɩkplaan 'dɩ 'nyɩ a ‑ka anyɩ nyɩ na, nikpooslaslawɔlɩ ɩ ‑glɩ 'lɛ bha? 12'Nyɩ ‑buun ncɛlɩ ‑kalɩ 'lɛ lɩɩ ‑naa 'la ‑jioli anyɩ 'kʋ na, 'lɩsaa 'la gbʋ ‑anyɩ ‑a cɩ 'ta 'lɛ ɩla ‑jioli anyɩ 'kʋ kalɩlɩ ɩya ‑a kaa 'lɛ maa 'kʋzi bha? 'Bhlɩmɔɔn, ‑a 'ta ‑jioli ‑naa 'kʋmanɩ, ‑ma ‑tɛtɛa 'fɩan nɩkplaan, ka ‑a kla 'lɛ pɔlɛ le ‑a 'la ka Klisi 'la Dɩnanɩa* 'la ‑gugwiea 'kʋ lʋʋ bhlogbɩɩ sɩalɔ.

13Ka a 'ta 'lɛ sɛɛ ‑ci lebhe maa ‑ɔ nʋ 'lɛ gʋgwlɛa 'la lobholia na, ‑Palʋa ‑ʋ lolu 'lɛ maa bha? 'Nyɩ maa ‑ɔ nʋ 'lɛ gʋgwlagbatɩa 'kʋ 'la lobholia na, mala da ‑kʋmʋ 'lɛ gʋgwlagbatɩa 'kʋ 'la vavalɩɩa nɩkplaan bha? 14'Sɛtɛɛ bhlogbɩɩ, ‑Kwlenyɔ ya maa ‑ɔ sa 'lɛ Dɩnanɩa na, 'clalɩ lebhe ma lili Dɩnanɩa nɩkplaan.

15‑Ma ‑amʋ, n 'ta lɩɩ ‑naa ‑tɛtɛa 'la ‑jiolia n ‑kaa 'lɛ na, ɩla nɩkplaan bhlogbɩɩ 'kʋmanɩ, 'nyɩ ‑n 'ta ka n zie 'ta 'lɛ anyɩ le n 'kɩɩ 'clalɩ. N 'kɩɩ 'lɛ 'clalɩ na, ‑afalɩma 'naa n 'ku! Wɔɔce ‑naa n kpolili 'lɛ nɩkplaan na, nclɔɔ ‑ylɛylɛ cɩ 'taan ma ‑salɩ! 16Dɩnanɩa 'la ‑salɩɛa, ɩ 'ta wɔlɩa n kpolili 'lɛ nɩkplaan na ‑glɩ, ‑ma ɩ ‑glɩ wɔlɩa n ‑mieni 'lɛ nɩkplaan na. Sa n 'ta Dɩnanɩa ‑sa na, ‑mʋnzue cɩɩn bhoo! 17'Na 'wluun ‑naanɩ ‑ɩ ‑kaa ‑glɩ na, n cɩ 'kaa dluuplʋlɩɛ 'la ‑jioli kalɩ, ‑ma ɩ ‑kʋ 'lɛ lebhe n nʋɩ 'santiin na, 'dɛndlana ‑tobhu n ‑slo 'lɛ. 18'N 'laa bha ka 'na dluuplʋlɩɛa bha? N 'ka Dɩnanɩa 'kpɔkpɔ ‑sa, ɩya n 'la ka lɩɩa 'la ‑jiolia Dɩnanɩa 'nyɩnɩɩn 'lɛ na 'kʋmanɩ, 'lɩka 'na dluuplʋlɩɛa. 19‑Ghɛɛ, n ‑ka ‑ncɩ, 'nyɩ n 'ta 'lɛ nclɔɔ bhlogbɩɩ 'la geyu ‑glɩ, ‑ma n ya ncɩ ncɛlɩa ‑tɛtɛa 'la geyu ple, le n 'kasɛ maa nɩkplaan ‑bhutukpa Klisi 'nʋa ple. 20Zifʋnyaa* sidiin n ya namʋ le Zifʋnyɔ, le n 'kasɛ Zifʋnyaa Klisi 'nʋa ple. Maa ‑ɔ ‑kʋ 'lɛ ‑jlɩmaa ‑zɔn na sidiin, n ya namʋ le saa n ‑kʋ 'lɛ ‑jlɩmaa ‑zɔn na, le n 'kasɛ maa ‑ɔ ‑kʋ 'lɛ ‑jlɩmaa ‑zɔn na Klisi 'nʋa ple, ‑sakɛ 'bhlɩmɔɔn ‑amʋ 'titi n 'taa 'maa ‑zɔn ‑kʋ. 21Maa ‑ɔ 'ta 'lɛ ‑jlɩmaa ‑ka na sidiin, n ya nʋ le saa ‑amʋ ‑ma n 'ta 'lɛ ‑jlɩmaa ‑ka na, le n 'ka maa ‑ɔ 'ta 'lɛ ‑jlɩmaa ‑ka na Klisi 'nʋa ple. ‑Sakɛ 'bhlɩmɔɔn n ‑ka Laagɔ 'la ‑jlɩmaa, 'nyɩ ‑jlɩmaa ‑naa ama ‑glɩ 'lɛ Klisi. 22Maa ‑ɔla pɔɔtɛtɛa 'ta 'lɛ 'ghli na sidiin, n ya namʋ le saa 'na pɔɔtɛtɛa 'ta 'lɛ 'ghli na, le n 'kasɛ maa Klisi 'nʋa ple. Na, n ya ncɩ saa ‑tɛtɛa 'fɩan ple, le n 'ka saa 'fɩan nʋ ɩya maa nɩkplaan, ‑zlʋsaasa 'kasɛ gbʋʋnsalɩɛ 'lɩ. 23'Nyɩ ɩmɩ ‑naa 'fɩan, Dɩnanɩa 'la gbʋ n nʋɩ 'lɛ ɩya n 'ka ɩla 'nanɩa 'lɩmʋmʋ.

A 'la fa sɔmɩ ‑abuun

24A 'ta sɛɛ ‑ci lebhe sɔmɩfadaa, sɔmɩfanyaa 'fɩan fa sɔmɩa, ‑ma bhlogbɩɩ ‑tɛɛ ‑ɔ lɩ 'lɛ ‑ajaakpaa bha? Na, a fa sɔmɩa saa a cɩɩ 'lɛ fafalɩ 'nyɩ a cɩ 'lɛ ‑ajaakpaa 'lɩ na. 25Sɔmɩfanyaa ‑tɛtɛa tie macɩ ‑lɩɩ ‑bhutukpa, ‑ajaakpaa ‑a cɩ ka 'lɛ nyumo na 'la gbʋ. ‑Ma ‑anyɩ, ‑ajaakpaa ‑a nyumo 'ta 'lɛ na, ala gbʋ ‑a tie 'lɛ acɩ lɩɩ ‑bhutukpa. 26Na, ‑sa ‑amʋ n fa 'lɛ 'na sɔmɩ. 'N fa 'tɩɩ ‑abuun. ‑Sa n 'pa 'lɛ 'na ‑kʋkɔɔntɩ. N 'pa 'tɩɩ ‑abuun. 27Ka n tie 'lɛ 'na 'nyɛkɛa lɩɩ ‑bhutukpa 'nyɩ n klɛɛ 'lɛ 'kʋ, le n ‑ka ‑a 'ye Dɩnanɩa* ‑salɩɛ bhɩalɩ na, ma 'la kasɛ ‑amʋ 'titi gbɛga.

Currently Selected:

1 Kolt 9: NTLD13

Highlight

Copy

Compare