1 Kolt 15
15
Klisi ya 'kwɩɩnkʋbho
1Bholiecɩnyɩ, Dɩnanɩa* n ‑sa 'lɛ anyɩ, a ŋonu 'lɛ a 'ma 'lɛ, 'nyɩ a 'plɩlɩ 'lɛ 'kʋ na, ɩmɩ n luoli 'lɛ anyɩ. 2Ɩmɩ 'kʋ a cɩ 'ka 'lɛ 'plɩlɩ ɩya a 'ka 'lɛ gbʋʋnsalɩɛ lɩ, ɩ ‑ka ‑kʋ lebhe a ‑kɩɩ saa n -sɩɩ 'lɛ anyɩ na ‑ka na. 'Nyɩ ɩ 'ta sɛɛ ‑kʋ na, 'kpɔkpɔ 'titi a yɩɩ 'lɛ ala pɔɔtɛtɛa 'kʋ zʋ.
3Na, n ya 'kʋklʋʋnpʋ n ya anyɩ ɩmɩa ‑amʋ 'titi n 'nu 'lɛ na solu. Ɩmɩ ‑ɩ ‑glɩ 'lɛ lebhe ‑ala nyinyia 'la gbʋ Klisi 'ku 'lɛ, saa Zieziewɔlɩa* bhli 'lɛ 'kʋ na. 4Ma yɔɔ zizie, 'nyɩ ɩla ‑mɔta ‑zelia, ɔ ya 'kwɩɩnkʋbho, saa Zieziewɔlɩa bhli 'lɛ 'kʋ na. 5Ɔ ya Pɩɛlɩ 'ciinfutolu, 'nyɩ ɩla leen, ɔ ya 'lɛ 'Kʋgba ‑mɔsɔa 'ciinfutolu. 6'Nyɩ ɩ 'plɩ 'lɛ na, ɔ ya 'lɛ bholiecɩa, nebhlogbɩɩ 'ciinfutolu, ma plɩa ncaadu cɩ. Maa nɩkplaan, ‑zlʋsaasa ya 'ku ‑ma ‑bhutukpa ‑ja ka. 7Ɔ ya Zakɩ ‑ma 'ciinfutolu, 'nyɩ ɩla leen, ɔ ya 'lɛ lobhulobhunyaa* 'fɩan 'ciinfutolu. 8Bhɩalɩdaa, ‑amʋ ‑ma ɔ yaan 'ciinfutolu, ‑amʋa ‑ɔ 'ta 'lɛ lʋʋ ‑ylɛylɛ ‑glɩ na. 9Sa ‑amʋ ‑ɔ ‑glɩ 'lɛ lobhulobhunyaa 'fɩan 'la leenbhɩalɩ -naanɔ, n 'taa 'kʋŋwa le ma laan lobhulobhunyɔ, ‑ofi lebhe n ya Laagɔ 'la ‑palʋa gbaylɩsa na. 10‑Ma Laagɔ 'la ‑danaanɔa ‑bɔɔ na, dɛ n ‑glɩ 'lɛ nclɔɔa n ‑glɩnɩ 'lɛ na, 'nyɩ ɔla ‑danaanɔa 'ta 'na gbazɔ 'kpɔkpɔ 'plɩ. ‑Masa n ya lobholi nʋ 'nyɩ n ya maa 'fɩan 'kʋ zi na. 'Bhlɩmɔɔn, ‑n 'ta 'na 'wluun, ‑ma Laagɔ 'la ‑danaanɔa ‑ʋ ‑kʋʋn 'lɛ cɩ na. 11Na, ‑amʋ, ‑aana maao, 'lɩka ɩmɩa ‑a plici 'lɛ na, 'nyɩ ɩmɩ 'kʋ a zʋ 'lɛ ala pɔɔtɛtɛa.
'Kua cɩ 'ka 'kwɩɩnkʋbho
12Na, ma plici 'lɛ lebhe Klisi ya 'kwɩɩnkʋbho na, 'nsasa 'nyɩ anyɩ sidiin, ncɛlɩ ‑anʋa claa 'lɛ lebhe 'kwɩɩnkʋbhue 'ta ‑kʋ bha? 13Ɩ ‑ka 'ku lebhe 'kwɩɩnkʋbhue 'ta ‑kʋ na, 'dɛndlana, ka Klisi 'ta 'lɛ 'kwɩɩnkʋbho. 14'Nyɩ ɩ ‑ka ‑kʋ lebhe Klisi 'ta 'kwɩɩnkʋbho na, 'kpɔkpɔ 'titi ‑a plici 'lɛ, 'nyɩ 'kpɔkpɔ 'titi a ‑ka 'lɛ pɔɔtɛtɛ. 15Laagɔ 'la ‑kplakpla ‑danʋfʋɛlinya ‑a cɩ 'lɛ 'plɩ, ‑masa Laagɔ 'ta 'lɛ Klisi 'kwɩɩnkʋbho, 'nyɩ ‑a cla 'lɛ lebhe ɔ yɔɔ 'kwɩɩnkʋbho na, ‑kplakpla ‑danʋfʋɛ ‑a 'ta 'lɛ li bha? Ɩ ‑ka ‑kʋ lebhe ‑zaagbʋsa 'ku ‑bho 'ta 'kwɩɩn 'kʋ na. 16Na, ɩ ‑ka ‑kʋ lebhe 'ku ‑bho 'ta 'kwɩɩn 'kʋ na, 'dɛndlana Klisi ‑ma ɔ 'ta 'kwɩɩnkʋbho. 17'Nyɩ Klisi 'ta 'kwɩɩnkʋbho na, ala pɔɔtɛtɛa ‑glɩ 'kpɔkpɔ, a ‑kʋ ka ‑azla ala nyinyia nɩkplaan, 18'nyɩ maa ‑ɔ 'kulu 'lɛ Klisi nɩkplaan na, ka ma ya 'lɛ mlɔ. 19Na, 'pʋpʋ ‑naa 'kʋ bhlobhlo ‑tɛɛ 'la gbʋ, ‑a ‑ka ‑ala pɔlɛkʋtɛlɔa Klisi 'kʋ zʋ na, 'dɛndlana ‑a ‑glɩ ncɛlɩa ma cɩ 'ka 'lɛ bhʋtʋ ncɛlɩa 'fɩan sidiin na.
20‑Ma Klisi ya ‑zaagbʋsa 'kwɩɩnkʋbho, ɔmɔ ‑ɔ ‑glɩ 'lɛ maa ‑ɔ 'ku 'lɛ na, 'la ‑bɛka -naanɔa ‑ɔ ‑bho 'lɛ 'kwɩɩn 'kʋ na. 21‑Masa 'kwɩ ya 'lɛ nclɔɔ bhlo 'kʋ 'plɩlɩ, 'nyɩ ɛ ya 'lɛ ‑laagɔzɔn ci na, 'kwɩɩnkʋbhue ‑ma nclɔɔ 'kʋ ɩ 'plɩlɩ 'lɛ. 22Na, saa ncɛlɩa ‑tɛtɛa 'kulu 'lɛ Adaan nɩkplaan na, sɛɛ maa ‑tɛtɛa cɩ 'ka 'lɛ jabhʋa Klisi nɩkplaan 'lɩlɩ. 23‑Ma nclɔɔ nclɔɔ cɩ 'ka ɔla ‑dɔlʋ kalɩ. ‑Bɛɛ Klisi, ‑ɔ ‑glɩ 'lɛ ‑bɛka -naanɔa ‑ɔ ‑bho 'lɛ 'kwɩɩn 'kʋ na, ɩya daa ɔ cɩ 'ka 'lɛ ci na, maa ‑ɔ ‑glɩ 'lɛ ɔ 'nʋa na, ma 'ka 'dɛ gɩ, 24ɩya ɩla leen, bhɩalɩdaa 'ka ŋeni, daa Klisi cɩ 'ka 'lɛ ‑kwleliea ‑tɛtɛa, ‑kwletɛtɩa ‑tɛtɛa, ɩya 'tɛtɩa ‑tɛtɛa gbɔlʋ, ɩya ɔ 'ka 'lɛ Nyɩbhɛlɩdua To Laagɔ wlɩɩn zʋ na. 25Sa ɩ ‑fata lebhe ɔ ‑kwle ‑aan ɩya Laagɔ 'kɔɔ ɔla ‑zɔbhɛlɩgbanyaa ‑tɛtɛa kplizɔn zʋ. 26Bhɩalɩ ‑zɔbhɛlɩgbanyɔa ɔ cɩ 'ka 'lɛ nyumo na, ɔmɔ ‑ɔ ‑glɩ 'lɛ 'kwɩ, 27sa Laagɔ ya ‑tɛtɛa 'fɩan Klisi kplizɔn zʋ na.
‑Ma ɔ ‑ka 'cla lebhe: «‑Tɛtɛa 'fɩan ‑kʋ 'naa ‑kweliea ‑zɔn na,» ɩ sa ‑zɔn 'kpataa lebhe ɔmɔa ‑ɔ zʋ 'lɛ ‑tɛtɛa 'fɩan ɔla ‑kwleliea ‑zɔn na, ɔ 'tɛɛ ‑kʋmʋ. 28Na, daa lɩɩa ‑tɛtɛa cɩ 'ka 'lɛ ɔla ‑kwleliea ‑zɔn ‑zʋɔ na, 'Cʋa 'titi ‑ma cɩ 'ka ɔcɩ ɔmɔa ‑ɔ 'nyɩɔ 'lɛ ‑tɛtɛa 'fɩan ‑kwleda na, ɔla ‑kwleliea ‑zɔn zʋ, ɩya Laagɔ bhlo 'ka ‑tɛtɛa 'fɩan ‑kwle.
29‑Ma ɩ ‑ka ‑kʋ lebhe 'ku 'ta 'kwɩɩnkʋbho na, 'lɩsaa maa ‑ɔ gba 'lɛ 'nyɩ ma zʋ 'lɛ maa 'nyu 'wlu mala 'kua 'la 'jeen na, 'matɩa 'lɛ bha? Na, ɩ ‑ka ‑kʋ lebhe 'ku ‑bho 'ta ‑zaagbʋsa 'kwɩɩn 'kʋ na, 'lɩsaa 'la gbʋ ma gbaa 'lɛ 'nyɩ ma zʋa 'lɛ maa 'nyu 'wlu 'ku 'la 'jeen bha? 30'Nyɩ ‑anyɩ 'titi, 'lɩsaa 'la gbʋ ‑a ‑kʋa 'lɛ clɩɩa 'fɩan 'kwɩ neen bha? 31Bholiecɩnyɩ, saa n 'palɩ 'lɛ anyɩ ‑bliin ‑ala ‑Kwlenyɔ Zozi Klisi nɩkplaan, 'nyɩ ɩ ‑glɩ ‑nʋawlɛ na, 'sɛtɛɛ bhlogbɩɩ ɩ ‑glɩ 'lɛ ‑nʋawlɛ lebhe n ‑kʋ clɩɩa 'fɩan 'kwɩ neen. 32Efɛzɩdua 'kʋ, n ‑ya ncɛlɩa ‑ɔ nʋ 'lɛ le mlanyinyi na, ya 'tɩtɔ. 'Nyɩ ɩ ‑kaa ‑kʋ lebhe ɩmɩa nclɔɔ ‑jlɛ 'lɛ na, ɩmɩ bhlobhlo ‑tɛɛ 'la gbʋ na, ‑nvʋsʋɛ saa n cɩ 'kanɩa 'lɛ ɩmɩ ‑naa nɩkplaan 'lɩlɩ bha? Na, ɩ ‑ka ‑kʋ lebhe 'ku ‑bho 'ta 'kwɩɩn 'kʋ na, ‑a li ɩya ‑a 'mla, ‑masa ka ‑a ‑cɩ ka 'lɛ ‑cɩpa 'ku na.
33A 'la 'nyiglilia acɩ. Yooyo -nagwɩɛcɩ ka ma nyumo ma 'ye 'la nʋnʋgbɩ 'nanɩ. 34A zʋlʋ ala 'namʋa pɔlɛ 'kʋ ɩya a 'la nʋa nyinyi! Sa ncɛlɩ ‑anʋa ‑kʋ anyɩ sidiin ma 'ta Laagɔ ‑ci. Na, ɩ ‑glɩ ala ‑zo, dɛ n nyɩtɩɩ 'lɛ.
'Nyɛkɛa, 'kua ɩ bho 'lɛ 'kwɩɩn 'kʋ na, ‑ka 'lɛ na
35‑Ma, ma cɩ neencla lebhe 'nsasa 'kua bhobholʋa 'lɛ 'kwɩɩn 'kʋ, 'nyɩ 'nyɛkɛ saa ɩ -kanɩ 'lɛ bha? 36'Tututunyɔ! Lʋʋa ‑n golo 'lɛ na, ʋ 'ta ka 'ku na, 'ʋ 'wlʋ 'ta. 37'Nyɩ ‑n 'ta sua ‑ʋ cɩ ka 'lɛ 'wlʋ na, ‑n golo 'ta 'lɛ, ‑ma sucie, 'bleecie, ‑aana ‑buun -sucie. 38Ɩla leen, Laagɔ plee 'lɛ sua ɔ ‑wa 'lɛ na, 'nyɩ sucie sucie ‑ka sua ɛ plɩ 'lɛ na. 39Na, 'nyɛkɛa ‑tɛtɛa 'ta 'wlʋlʋ. Ncɛlɩ 'nɛa ‑kʋ ɛla da, mla 'nɛa ‑kʋ ɛla da, libhli 'nɛa ‑kʋ ɛla da, 'nyɩ ‑zlii 'nɛa ‑kʋ 'lɛ ɛla da.
40‑Laagɔɔn 'la lɩɩ ‑kʋ 'nyɩ ‑dʋdʋ 'kʋ 'la lɩɩ ‑kʋ 'lɛ. Ɩ 'ta 'wlʋlʋ. 41'Ylʋbhuoa 'la lelia ‑kʋ ɩla sa, cabhuoa 'nɩa ‑kʋ ɩla sa, ‑zɔlʋa 'nɩa ‑ma ‑kʋ ɩla sa, 'nyɩ ‑zɔlie 'titi ‑ma, ɛya ‑buun -zɔlie 'ta leli 'kʋ 'wlalɩ.
42'Ku 'la 'kwɩɩnkʋbhuea ‑ma 'la gbazɔ, 'sɛtɛɛ bhlogbɩɩ ɩ ‑kʋ 'lɛ. 'Kukunyɛkɛ ma zʋ 'lɛ ‑gluu, ‑ma ‑jajanyɛkɛa ‑ɛ cɩ 'tanɩ 'lɛ 'ku na, ɛmɛ ‑ɛ bho 'lɛ 'kwɩɩn 'kʋ. 43‑Bhʋbhɔlɩnyɛkɛ ma zʋ 'lɛ ‑gluu, ‑ma 'klʋagba nɩkplaan ɛ bholu 'lɛ 'kwɩɩn 'kʋ. Ma ‑kɛɛ ‑gluuzuda ‑kʋ na, ɛ 'ta 'tɛtɩ ‑ka, ‑ma ɛ ‑ka 'kwɩɩnkʋbho na, 'tɛtɩ ‑yelioe. 44‑Blaanyɛkɛ ma zʋ 'lɛ ‑gluu, ‑ma ɛ ‑ka 'kwɩɩnkʋbho na, ɛ ‑glɩnɩ ‑laagɔɔn 'la 'nyɛkɛa. 'Nyɩ ‑blaanyɛkɛ ‑ka ‑kʋ na, 'dɛndlana ‑laagɔɔn 'la 'nyɛkɛ ‑ma ‑kʋ. 45Dɛ ɩ ‑zieo 'lɛ lebhe: «‑Bɛka -nclɔɔa ‑ɔ ‑glɩ 'lɛ Adaan na, ɔ ‑glɩa ‑blaanyɛkɛa jabhʋa ‑kʋa 'lɛ nɩkplaan na, ‑ma leenbhɩalɩ Adaan ‑glɩ 'nyɛkɛa ‑ɛ 'wlʋlʋ 'lɛ ‑laagɔɔn, 'nyɩ ‑ɛ nyɩ 'lɛ jabhʋa na.» 46‑Blaanyɛkɛa ‑glɩ 'lɛ ‑bɛka -naanɛa, ‑ma ‑n 'ta ‑laagɔɔn ‑naanɛa. Ɛla leen ɛ ci 'lɛ. 47‑Bɛka -nclɔɔa, ‑blaa nɩkplaan ma 'manɩɔ 'lɛ, ‑blaa ɔ ‑glɩ 'lɛ. ‑Ma ‑mɔsɔ nclɔɔa, ‑laagɔɔn ɔ 'wlʋlʋ 'lɛ. 48Na, saa nclɔɔa ma 'manɩ 'lɛ ‑blaa nɩkplaan na, ɔ ‑kʋkʋlʋa 'lɛ na, 'sɛtɛɛ bhlogbɩɩ ‑dʋdʋa 'kʋ 'la ncɛlɩa ‑ma, ma ‑kʋ 'lɛ. Saa nclɔɔa ‑ɔ 'wlʋlʋ 'lɛ ‑laagɔɔn na ‑kʋkʋlʋ 'lɛ na, 'sɛtɛɛ bhlogbɩɩ ‑laagɔɔn ‑naanʋa ‑ma, ma cɩ 'ka 'lɛ kʋ. 49'Nyɩ saa ‑aya nclɔɔa ma 'manɩa 'lɛ ‑blaa nɩkplaan na 'wlʋlʋa 'lɛ na, 'sɛtɛɛ bhlogbɩɩ ‑aya nclɔɔa ‑ɔ 'wlʋlʋ 'lɛ ‑laagɔɔn na ‑ma cɩ 'ka 'lɛ 'wlʋlʋ. 50Bholiecɩnyɩ, 'lɩka wɔlɩa n nyɩtɛ 'lɛ na. 'Nyɛkɛ ɩya ‑dolu cɩ 'ta mino ɩya ɩ 'ka Laagɔ 'la Nyɩbhɛlɩdua* ‑aja 'kʋ lili, 'nyɩ lʋʋa ‑ʋ cɩ ka 'lɛ 'ku na, 'ʋ cɩ 'ta lʋʋa ‑ʋ cɩ 'tanɩ 'lɛ 'ku na, ‑aja 'kʋ lili.
51Na, n 'ka anyɩ zizieziziewɔlɩ bhlo pala. ‑Anyɩa 'fɩan cɩ 'ta 'ku, ‑ma ma cɩ 'ka ‑anyɩa 'fɩan kaci. 52Daa ‑bhɩalɩlɛglɛa cɩ 'ka 'lɛ gba na, ka ɩ cɩ 'lɛ 'faanfan 'titi 'plɩ le saa ma 'kpatɩ 'lɛ 'ci na. Sa lɛglɛa cɩ 'ka gba, ɩya 'kua 'ka 'kwɩɩnkʋbho, ɩya ɩ 'la kanɩ 'ku, ɩya ‑anyɩ ‑ma, ma 'ka ‑anyɩ kaci. 53‑Masa ɩ ‑fata lebhe, 'nyɛkɛa ‑ɛ cɩ ka 'lɛ zɛ na, pla ɛmɛa ‑ɛ cɩ 'tanɩ 'lɛ zɛ na nɩkplaan, ɩya 'nyɛkɛa ‑ɛ cɩ ka 'lɛ 'ku na, ɛ pla ɛmɛa ‑ɛ cɩ 'tanɩ 'lɛ 'ku na nɩkplaan.
54Na, daa 'nyɛkɛ ‑naa ‑ɛ ‑cɩ ka 'lɛ zɛ na, cɩ 'ka 'lɛ ɛmɛa ‑ɛ cɩ 'tanɩ 'lɛ zɛ na nɩkplaan pla, ɩya 'nyɛkɛ ‑naa ‑ɛ ‑cɩ ka 'lɛ 'ku cɩ 'ka 'lɛ ɛmɛa ‑ɛ cɩ 'tanɩ 'lɛ 'kʋ na nɩkplaan pla na, Zieziewɔlɩa* 'la wɔɔnyɩtʋ ‑naa cɩ 'ka 'kʋglalɩ.
«‑Sɩalɩɛa ya 'Kwɩ mla.
55 'Kwɩ, 'nda ‑naa ‑sɩalɩɛa ‑kʋa 'lɛ bha?
'Kwɩ, 'nda ‑naa 'lia ‑kʋa 'lɛ bha?»
56'Kwɩ 'la 'lia, ɛmɛ ‑ɛ ‑glɩ 'lɛ nyinyi, 'nyɩ nyinyi 'la 'tɛtɩa ‑glɩ 'lɛ ‑jlɩmaa. 57‑Ma ‑a bhɔlʋ Laagɔ, ɔmɔa ‑ɔ 'plɩlɩ 'lɛ ‑ala ‑Kwlenyɔ Zozi Klisi 'kʋ, 'nyɩ ɔ ya 'lɛ ‑anyɩ ‑sɩalɩɛa 'nyɩ na.
58Na, 'na ‑wawabholiecɩnyɩ, a 'nylugo kpaan, ɩya wɔlɩ ‑ylɛylɛ 'la 'dɩdɔa anyɩ. A mʋ clɩɩa 'fɩan 'kʋklʋʋn ‑Kwlenyɔa 'la lobholia nɩkplaan, ɩya a cibhlili le ‑Kwlenyɔa 'la gbazɔ, ala sɛsʋa cɩ 'ta 'kpɔkpɔ 'plɩ.
Currently Selected:
1 Kolt 15: NTLD13
Highlight
Copy
Compare
Share
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
