SAN MARCOS 15

Ra Jesús bi mba ma dä bʉ bʉh ra ts'ʉt'abi ra Pilato

1Nu'bʉ t'ʉxudi tho, nu yʉ ngʉrba mbäją nɛ yʉ dąc'yɛi nɛ yʉ xänbate niją nɛ gätho ʉ mi'da ma ngʉrbihe dyʉ́ judíohe, bin yąsɛ ʉ. Nɛ nubʉya bi zix a ra Jesús ngue di däp'a ra Pilato. Bin thą't' 'bʉ mi zits'i. 2Nɛ nu ra Pilato bi 'yän'na ra Jesús:

―Ha gue e grá hmuts'ʉt'abi yʉ judío, bi 'yɛ̨mp'a.

Bi dą a ra Jesús:

―Gue'a guím ma, bi 'yɛ̨na.

3Nɛ nu yʉ ngʉrpa mbäją ɛ̨mmɛ bi yąpi. 4Janangue a nu ra Pilato bi 'yän'na ra Jesús mahøn'a, bi 'yɛ̨mbi:

―Hanja hin ni thątya i di yąpi'i. Nɛ xʉn ngu 'bɛ'a gätho i xi'i, bi 'yɛ̨mbi.

5Pɛ nu ra Jesús guexta'a him bi dąt'a ra Pilato. Janangue'a nu ra Pilato bi hyonya thoho.

Ra Jesús bin t'un ran ts'ɛmbi ngue da du

6Nu'a ra pa ram pɛti ra mbaxjua, ząi di thø a n'da ra ofädi ra Pilato hønt'a go nda'a da man yʉ ją'i. 7Nɛ min ofädi n'da ran 'yohʉ i Barrabás, 'darpʉ mi ofädihʉ ʉ 'da'ingu bi 'yøthʉ ngue bin hote ʉ, bi dʉm'ma n'da ra sʉi. 8Nu'bʉ mi zøh yʉ ją'i xʉn ngu bʉ mi 'bʉh ra Pilato, nu'ʉ bi xih ra Pilato di thøcpa n'da ra ofädi tengu nząi bi 'yøt' 'bʉ ra pa ram pɛti. 9Janangue a nu ra Pilato bi 'yɛ̨mp'ʉ:

―Ha gue'a ni hmuts'ʉt'abihʉ gyʉ́ israelhʉ, gyʉ́ judíohʉ, ga thøc'ahʉ, bi 'yɛ̨mp'ʉ.

10Nguetho mi pąh ra Pilato di sɛya thohoba ra Jesús yʉ ngʉrpa mbäją 'bʉ mi däp'a. 11Pɛ nu yʉ ngʉrpa mbäją bi parpa yʉ ją'i gue'a ra Barrabás da 'yäh yʉ ją'i. 12Nu ra Pilato xø bi 'yɛ̨mp'ʉ mahøn'a:

―Xina ni hmuts'ʉt'abihʉ, gyʉ́ israelhʉ, gyʉ́ judíohʉ, 'bɛ'a ga ørpä na bʉya, bi 'yɛ̨n'a.

13Nu yʉ ją'i bʉya nts'ɛdi bi 'yɛ̨n ʉ:

―Go gui cuarpʉ ja ra pont'i na ra Jesús.

14Pɛ nu ra Pilato bi 'yɛ̨mp'ʉ:

―'Bɛ'a gue man ts'o xʉ 'yøt'na, bi 'yɛ̨mp'ʉ.

Nɛ nu'ʉ yʉ ją'i man'da nts'ɛdi bi 'yɛ̨n ʉ:

―Go cuarpʉ ja ra pont'i na, bi 'yɛ̨n ʉ.

15Nu ra Pilato bi nde da 'yørpa rá pähä yʉ ją'i, janangue guehma go bi thøcpa a ra Barrabás. Nɛ bi manda da mba m'bɛi a ra Jesús nɛ da mba ma cuati bʉ ja ra pont'i.

16Nu yʉ dofʉi bʉya, bi zixa ra Jesús bʉ mbo guepʉ ja yʉ́n säya yʉ dofʉi, nɛ bi zo ʉ gätho yʉ́ mindofʉihʉ 'bʉpʉ. 17Nɛ bi mba ma hete n'da ra pahni xʉn jʉpoi a ra Jesús ngue tengu he yʉ ts'ʉt'abi, nɛ nts'ɛdi bi mba ma huspi n'da ra corona á m'be yʉ 'yʉ'uįni nguetho bi den thoho. 18Nɛ bi zɛngua ʉ nɛ bi 'yɛnspa yʉ́ biba ʉ: “Damim 'bʉmanho gra hmuts'ʉt'abi yʉ judío,” bi 'yɛ̨mp 'bʉ mi denthoho. 19Nɛ bi dɛspa rá yą yʉ za nɛ bi zots'i, nɛ bin dąnyahmu, ɛ̨na i thąnde pɛgue bi denthoho. 20Nu'bʉ mi jua'a bi denni bi tonspa a ra pahni xʉn jʉpoi nɛ bi het'a rá pahni zɛhɛ. Bi gʉc pʉya ngue bi zits'i da 'døm'pʉ ja ra pont'i.

Ra Jesús bi mba ma cuati bʉ ja ra pont'i nɛ bi du

21Nɛ nu'bʉ mi mba bʉ 'yu, bin c'athʉ ra Simón, ra mɛngu bʉ Cirene, rá ta ra Alejandro nɛ ra Rufo, bí 'yɛ̨ a huąhi a. Nɛ nu yʉ dofʉi bʉya bi 'yørpa ra ts'ɛdi a ra Simón da duspa rá pont'i a ra Jesús. 22Nɛ guepʉ ja ra nyuni Gólgota ní ts'ixa ra Jesús. Nu'a Gólgota in nde da ma “ra Nyuni Yąxmu.” 23Nɛ nu'bʉ mi zøm bʉ, bin t'un ra vino ngue ma uąnts'i n'da ra 'yɛ̨thi xʉn ju a ra Jesús. Pɛ nu'a him bi zi a. 24Nɛ nu'bʉ mi 'døm'pʉ ja ra pont'i bʉya, nu yʉ dofʉi bi 'yøt'a n'da ran tąha ʉ nangue yʉ́ he ra Jesús ngue i nde da bądi nda'a ní 'bø't'e da gąxa n'da ngu n'da. 25Gʉto xudi 'bʉ mi mba n'dø'mi bʉ ja ra pont'i a ra Jesús. 26Nɛ mán t'o't'i bʉ ja ra pont'i a í yąp'a bi 'yɛ̨na, “Rá hmuts'ʉt'abi yʉ judío na,” ɛ̨m bʉ.

27Nɛ bi mba ma cuatihʉ ra Jesús yoho yʉ bɛ̨. 'Da a n'da yʉ pont'i. Nɛ bi 'bäm'pʉ ja rán 'yɛi a n'da nɛ bi 'bäm'pʉ ja rá gąha a man'da. 28Nɛ nuna bin ja, mi mam bʉ ja rá t'ohni Oją maya'bʉ, bi 'yɛ̨na: “Da t'ɛ̨mbi ngue 'da'anguui ʉ yʉ dądits'oqui a.” 29Nɛ nu yʉ ją'i bi thopʉ, bi ʉcpi nɛ bi denthoho, bi 'yɛ̨mbi:

―Ha hinga gue e gá ma ngue gui xo't' ma nijąhʉ nɛ hyupa tho gui hyøh mahøn'a. 30Sä gui cąpʉ ja ra pont'i ya 'bʉ, nɛ gan yąnsɛ, bi 'yɛ̨mbi.

31Nɛ ximangutho bi man ʉ yʉ ngʉrba mbäją bin 'yɛ̨mp'ʉ:

―Nuna, bi yąnba yʉ́ te ʉ 'da, pɛ hingui sä din yąnsɛ ya. 32Gan nuhʉ ra Cristo, rá hmuts'ʉt'abi yʉ judío 'bʉ ba cąpʉ ja ra pont'i, gan nugähʉ, nɛ ga ɛ̨c'yɛihʉ bʉya, bi 'yɛ̨m 'bʉ mi denthoho. Nɛ ʉ mi cuathʉ bʉ, bi ʉcpa ra Jesús.

Bi du ra Jesús

33Nu'bʉ mi zøn a huxhyadi bʉya bim 'bɛxui gätho ra häi, ja gue'bʉ mi zøn a hyunde bin nɛqui mahøn'a. 34Nɛ nu'a ra ora a ɛ xø i huxhyadi, nts'ɛdi bi mbah ra Jesús, bi 'yɛ̨na:

―Eloi, Eloi, lama sabactani, bi 'yɛ̨na. Nde da ma: “Ma Oją i, ma Oją i, hanja xcá hyɛga thoho.”

35Nu'bʉ mi 'yø ʉ 'da 'bʉpʉ, bin 'yɛ̨mp'ʉ:

―Nuna, nzo a ra Elías, bin 'yɛ̨mp'ʉ.

36Nɛ bán ti a n'da mí hą n'da tengu ra fʉnjo xí 'yot'i, bi fospʉ ja ra vino xʉn ju, nɛ bi ndøct'a n'da ra xithi. Pi uąspa ra Jesús ɛ̨mbi da zi, nɛ bi 'yɛ̨mp'ʉ min 'yohʉ:

―Pɛ 'bɛ ga undä na, ga nuhʉ 'bʉ da zøh ra Elías di tongui, bi 'yɛ̨mp'ʉ.

37Pɛ nu'a ra Jesús nts'ɛdi bi mbafi nɛ 'bex bi du. 38Nɛ nubʉ mbo ra dąniją 'bex gue bin xɛngui nde ra 'bø't'e mi ndam bʉ. Bá fʉh magąts'i nɛ bi zøtahäi a bin xɛni. 39Nɛ nu'a rá hmu yʉ dofʉi, mi hɛ̨t'a ra Jesús bi mba 'bʉ mi du, nɛ bi 'yɛ̨na:

―Majuąni nuna ran 'yohʉ na, rá Ts'ʉnt'ʉ Oją na, bi 'yɛ̨n a ra hmudofʉi.

40Nɛ mi 'bʉpʉ 'da yʉ xisu bʉ ma'ueni ts'ʉ, mi hant'a ra Jesús. Nu'a n'da ra Salomé a, nɛ nu'a man'da ra María, ra mɛngu Magdala, nɛ nu'a man'da ra María, rá mbe ra Jacobo nɛ ra José. 41Guehya yʉ xisu mi tɛn ra Jesús 'bʉ mi 'bʉpʉ Galilea nɛ mi fäts'i. Nɛ ʉ mi'da yʉ xisu bi dɛn 'bʉ mi mba bʉ Jerusalén, mi 'bäpʉ.

Jesús bi mba nt'ägui

42-43Nɛ ya bin de, nɛ mim bɛ̨ni da 'yäcpa n'dihi rá ngøc'yɛi ra Jesús nguetho mi ts'ʉtho da dʉ'ma ra pa ran ts'äya, nɛ nu ra pa ran ts'äya njongui sä da t'ä a. Janangue a nu ra José ra mɛngu Arimatea, bi hyut'anzambʉi bi mba bán yąui ra Pilato, bi 'yäp a rá ngøc'yɛi ra Jesús. Nu ra José n'da rá ngʉrbi yʉ ją'i israel, pɛ gue'a n'da majuąni mi ɛ̨c'yɛ̨i Oją nɛ mi tøm'ma ra pa di manda ua rá ts'ɛdi Oją. 44Nu ra Pilato bi hyonya thoho 'bʉ mi sifi bi du ra Jesús. Nɛ nubʉya bi mbɛhna n'da ba si a rá hmu yʉ dofʉi ngue da 'yän 'bʉ majuąni ya bi du. 45Nɛ nu'bʉ mi man a rá hmu yʉ dofʉi gue bi du, nu ra Pilato bi 'yɛ̨mp'a ra José:

―Da zä gui tuxa rá ngøc'yɛi ra Jesús 'bʉ.

46Nu a ra José bʉya, bi dän a n'da ra 'bø't'e nɛ bi mba bi tongba rá ngøc'yɛi ra Jesús, nɛ bi mbant'a ra 'bø't'e xi däi nɛ bi cʉ't' pʉ ja n'da ra hyądo gue ran 'yägui xí mba nthɛ̨qui bʉ ja n'da ra t'ʉmba'ye. Nɛ bi juaspa n'da ra xįndo xʉn ndoho bʉ ja rá goxthi ran 'yägui. 47Nɛ nu'a ra María, ra mɛngu bʉ Magdala, nɛ man'da ra María ngue rá mbe a man'da ra José, bi nu hapʉ bi jät'i.

Currently Selected:

SAN MARCOS 15: otm

Highlight

Compare

Copy