Tsupuniyaxi 2
2
1Xekeneyuyetua, tixaɨtɨ xekatehɨmetɨtɨ xekenayuyeitɨa,
teɨteri xemɨkayukatetewiya,
2yaxeketenekakɨni mexi kahaye'awe kenemutayɨ,
mexi tukari xemɨkwewiyatsie xemɨtehayewakɨ xatsi yapauka kemɨre'enitsitɨariwa hepaɨ kayɨwe,
mexi xehetsie kakawewe Yawé haxɨaya mɨta'a,
mexi xehetsie ka'aye'awe Yawé haxɨaya tukariyari.
3Yawé xekeneutiwawa, yunaitɨ xeme tixaɨtɨ xemɨkatehayuyeitɨa 'ena kwiepa,
yaxemɨteyurie 'aitsikateya kemaine.
Xekeneutiwawa tita mɨtiheitserie meta 'axekeneu'uwani tixaɨtɨ xekatehayuyeitɨatɨ,
heiwatɨ 'ana xe'uti'awieta,
kepauka Yawé haxɨaya tukarieya maye'anitsie.
Piritsiteutsixi kememɨte'utahɨawarie
4Kahatsa kiekariyari yuxaɨtame kaniyuhayewamɨkɨ,
meta yaxeikɨa 'Atsikaruni kiekariyari 'unitɨ kaniyuhayewamɨkɨ.
'Atsiruri kiekatari mekanayeweiyariekuni hekɨta,
yaxeikɨata 'Ekuruni kiekatari mekanitaweiyariekuni.
5Xɨa'ui kereteutsixi teɨteriyari
haramara tetsita memɨtama.
Yawé niukieya xehepaɨtsita yakanaineni kemɨtixekwinitɨani,
piritsiteutsixi Kanani kwieyaritsie xemɨtama:
«Ne nekanixekwimɨkɨ
nixeimetɨma mana nepɨkahayewa».
6Haramara tetsita 'uweritɨ 'utsiɨraɨyetɨ kanayeimɨkɨ,
mɨratihɨriwa meta muxatsi wakuraru makumane.
7Mana muxatsi mekatenitikwaikuni
Kura nuiwarimama memɨyuhayewa watewama.
Taikai meputi'uxipiweni
'Atsikaruni kiekariyari muku'eiriwaxɨtsie,
Yawé wakakaɨyari waparewienike mana kaninuamɨkɨ
'aixɨa wayurienike.
Muhawi meta 'amunitsixi kememɨte'utahɨawarie
8«Ke'axamemutiyuane muhawitsixi nekaniwa'enieka,
meta 'amunitsixi wayuriyarika,
neteɨterima wahepaɨtsita kememɨteheuniuka
meta wakwie mewanawairietɨwetɨ.
9Yurikɨ mɨpaɨ nekanaineni,
—Mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya—,
Muhawi Tsuruma kwieyari hepaɨ 'anetɨ kanayeimɨkɨ,
meta 'amunitsixi Kumuxa kiekariyari hepaɨ mepɨ'itɨarieni:
witsaxa 'ɨtsiyari xeikɨa payani meta 'una maxuawe,
yuheyemekɨ 'akumawetɨ payani.
Neteɨterima memɨyuhayewa wapiini mepɨtewanawairieni,
meta neteɨterima 'akuxi memu'uwani wakwie yupiini mepayeitɨani».
10'Ikɨkɨ mekatenakapitɨariekuni memuyuta'ɨrixɨkɨ,
memɨwarutaniukimakɨ meta memɨwaxani'eriekaikɨ Yawé Naimekɨmɨtɨrɨkaɨye teɨterimama.
11Mepɨtimamani kepauka Yawé
yunaime kakaɨyarixi kwiepa memɨtama muwaka'una,
'ana nuiwarite teewanarixitɨtɨ,
mekanikatunuma'uikuni nenewieri me'ipitɨanike,
yuxexuitɨ yukwieyaritsie paitɨ.
'Etiupetsixi kememɨte'utahɨawarie
12«Yaxeikɨata xeme, 'etiupetsixi,
ne'ixiparakɨ xekanikwi'iwakuni».
'Atsiriyutsixi kememɨte'utahɨawarie
13Yawé yutɨrɨkariya kanitanɨ'amɨkɨ tayeta memukuma wahepa.
'Atsiriya kiekatari yunaime kaniwarakukwimɨkɨ,
meta Niniwe 'akumaweme kanayeitɨamɨkɨ,
xiekaripa makuwaki hepaɨ.
14Kiekari muyuta'ɨre maku'ɨxaya payani muxatsi memɨte'atikwa'ani
meta hipatɨ tewaxi.
Mana yukie mepayeitɨani meteyunaitɨ yeutari.
Nɨpe hamatɨa mikɨri tuxiyu mu'u'uni hetsie mepakayaxikeni.
Watsuari kii hixɨapa nenieremetsie mepayetsuatɨkani,
kitenie mɨranutahakitɨretsie pɨranu'u'unini,
kariuxa kɨyeyari kii hetsie manuyehe hayekɨa puyehini.
15'Ikɨ kiekari muyutemawiekai kanihɨkɨtɨni,
yu'iyarikɨ 'aixɨa 'iyari 'amukumakai,
yukɨmana mɨpaɨ mutainekai:
«Ne xeikɨa nepɨhɨkɨ, xewitɨ tawari pumawe».
Matsi neuxei puka'unarie meta
yeutari wakie patɨa.
Kehate mana memuyekɨne me'ixeiyame
mepuyukatemamawieni me'inanaimatɨ.
Currently Selected:
Tsupuniyaxi 2: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
