Mateu 28
28
Kemɨranukuke
(Mat 28:1-8 – Mar 16:1-8, Ruk 24:1-10)
1Merikɨtsɨ 'uxipiya tukari 'utaxɨku, tumikuti ximeri yuimuana Mariya Mararatanaka meta xewitɨ Mariya matɨa mana mekaniu'axɨani me'ixeiyake teukiya.
2Hikɨ kwie karima kaniutayuani, taheima kanakaneni niuki tuayame Ti'aitame hetsɨa mieme, hikɨ nuaka teté kaneukɨhɨani, meta hetsiena kanayerɨni. 3Merɨkariya hepaɨ pɨtiyuxexeiyakai, 'ixurikiteya pɨtuxakai 'ɨwi hepaɨ. 4Tehɨwemete kuyaxi me'imakatɨ meputiyɨyɨakaxɨ meta marikakɨ mekaniu'amɨxɨani.
5Hikɨ niuki tuayame mɨpaɨ katiniwarutahɨawe 'ukari:
—Xepɨkamamaka, ne mɨpaɨ nepɨtimate Ketsutsi xepɨkuwautɨwe, kuruxitsie mumierie. 6'Uwa pɨkayeka, panukuketɨarie kemainekai. Xekenakɨni xekeneutanenieri hakewa matekiekai. 7Hikɨ kwitɨwa xekenehu, mɨpaɨ xeketeniwaretahɨawi teyɨ'ɨkitɨwametemama: “Mɨkɨ panukuketɨarie mɨkite watsata, meta petɨari Karereyatsie paitɨ. Mana xekaneixeiyakuni”. Xekena'eriwani kenemɨtixe'utahɨawixɨ.
8Hikɨ 'ukarawetsixi mekanayekɨne meyumexɨitɨatɨ teukiyapa meyekɨneka, memamatɨ peru waɨkawa meyutemamawietɨ, meta mekaniutinautsa memɨtewataxatɨanikɨ teyɨ'ɨkitɨwametemama. 9Hikɨ mexi me'uhukai, Ketsutsi kaniwaranukunake, hikɨ kaniwarutawaɨritɨani.
Hikɨ mɨkɨ hurawa mekaniukɨne, 'ɨkateya mekaniu'ɨni meta mekaniutihɨxima'uni hɨxiena.
10Hikɨ mɨpaɨ katiniwarutahɨawe Ketsutsi:
—Xepɨkaheumamaka, xekenehu, xeketeniwaretaxatɨa ne'iwama Karereya mekehekɨne, mana mekanenexeiyakuni.
Kuyaxi kememutiyua
11Merikɨtsɨ mexi 'ukari huyeta me'uhukai, hipatɨ kuyaxi kiekaritsie mekanekɨne, kemɨtiuyɨ naime mekateniwarutaxatɨani mawari wewiwamete tewa'aitɨwamete. 12Hikɨ mɨkɨ 'ukirawetsixi wahamatɨa me'uyukuxeɨrieka me'uyu'enieka yunaitɨ, tumini waɨkawa mekaniwaru'ɨitɨani kuyaxi, 13mɨpaɨ metewarahɨawetɨ: «Xeme mɨpaɨ xekeneutiyuaneni: Mexi tekutsukai, teyɨ'ɨkitɨwametemama mekaniu'axɨani mekaninawani kaxari. 14Xɨka kuwexinaruri tiutamarieni, tame 'aixɨa tepɨteyurieni xehetsie mɨkarahɨiyanikɨ».
15Hikɨ mɨkɨ tumini me'anu'ɨka yamekaniutiyuanekaitɨni kememɨte'uta'aitɨariekai. Mɨpaɨ tiuyɨku mɨpaɨ pɨtikuxaxatsiwa naitsarie huriyutsixi watsata hikɨ 'akuxi.
Ketsutsi kemɨtiwaruhɨritɨa nɨ'ariekate
16Hikɨ teyɨ'ɨkitɨwamete tamamata heimana xewi Karereya mekanekɨne, mɨkɨ yemuritsie paitɨ Ketsutsi kemɨtiwarahɨawekai. 17Me'ixeiyaka hɨxiena mekaniukatunuma'uni, peru hipatɨ mɨkɨ 'akuxi yuri mepɨkate'eriekai xɨka yuritɨkaitɨni. 18Hikɨ Ketsutsi 'ahurawa kaniuyani, katiniwarutaxatɨani, mɨpaɨ 'utaitɨ:
—Naimekɨ heitserie nepexeiya taheima meta kwiepa. 19'Ayumieme, xekenehu, teyɨ'ɨkitɨwamete xekeniwarayeitɨa yunaime nuiwarite, xewaka'ɨyatɨ Ta'ukiyari meta Nu'aya meta 'Iyari Mɨtiyupata hetsiemieme, 20xetewa'ɨkitɨatɨ yamemɨtekahunikɨ naime xeme kenemɨtixe'u'aitɨa. Yurikɨ mɨpaɨ xeketenemaika, netsietɨ tukarikɨ xehamatɨa nekaniuyeikamɨkɨ, kepaukake kwie meutipare. Mɨpaɨ xeikɨa kani'aneni.
Currently Selected:
Mateu 28: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.