Mateu 27
27
Kura kemɨtiumɨ
1Merikɨtsɨ ximeri, yunaitɨ mawari wewiwamete tewa'aitɨwamete meta teɨteri wa'ukiyarima yunaitɨ mekaniuyukuxeɨrieni meyu'enienike Ketsutsi hepaɨtsita, memimienikɨ. 2Mekaneihana hɨakame, Piratu mekaniyetuirieni kuwexinaruri.
3Kepauka Kura miyetua mɨtiutamari kename 'itsɨkate mete'uta'aitaxɨ mɨmierienikɨ, yɨkɨ katiniyɨkɨhɨawekaitɨni meta watumini kaniwarekɨ'ɨitɨani mawari wewiwamete tewa'aitɨwamete meta 'ukirawetsixi, xeitewiyari heimana tamamata pɨrata tuminiyari, 4mɨpaɨ 'utaitɨ:
—'Axanepɨtiuyuri nemiyetuakɨ tewi hetsiena mɨkarahɨiya, xuriyaya mɨtayeurienikɨ.
Mɨkɨ mɨpaɨ mekatenitahɨawe:
—Tame mɨkɨ tepɨkateha'iwawa, 'ekɨri katini'amaiyatɨni.
5Hikɨ tukita heitaxɨrieka tumini kaniwayeyani, heyaka kaniuyukawieni.
6Mawari wewiwamete tewa'aitɨwamete me'iti'ɨka tumini mɨpaɨ mekaniutiyuani: «'Ikɨ pɨkayɨwe tuki tuminiyari muyemanetsie temeikamana, tewi xuriyaya mɨtayeuriyanikɨ mɨyetuiyakɨ». 7Me'uyu'enieka kwie mekaniunaneni mɨkɨ tuminikɨ xari wewiwame kwieya, mana 'ateewa kiekatari wateukiyapa mayanikɨ. 8'Ayumieme mɨkɨ kwie Xuriya Mataxɨri katiniuterɨwarɨwani 'akuxi hikɨ. 9'Ana kanaye'ani Keremiyaxi Kakaɨyari niukameya, mɨpaɨ kemutayɨ: «Mekanei'ɨni xeitewiyari heimana tamamata pɨrata tuminiyari, 'Ixaheritsixi teɨteriyari kememɨte'ika'inɨaritɨiri kemɨraye'akai, 10mɨkɨkɨ 'iwewame kwieya mepunanai, Ti'aitame kemɨnetiuta'aitɨa».#27:10 Keneuxeiya Tsak 11:12,13, Ker 19:1-13, 32:6-9.
Piratu Ketsutsi kemɨtiuta'iwawiyaxɨ
(Mat 27:11-26 – Mar 15:12-15, Ruk 23:2-3, 18-25, Wa 18:29–19:16)
11Merikɨtsɨ Ketsutsi kuwexinaruri hɨxie kani'atɨarieni, mɨkɨ mɨpaɨ katinita'iwawiya:
—¿'Ekɨ huriyutsixi teɨteriyari tiwa'aitɨwame petihɨkɨ?
Ketsutsi kayuku'imawatɨ mɨpaɨ katinita'eiya:
—'Ekɨ metsɨri mɨyapenaine.
12Mawari wewiwamete tewa'aitɨwamete meta 'ukirawetsixi me'ixanetakaku 'atsipɨkatiuta'a.
13Hikɨ Piratu mɨpaɨ katinitahɨawe:
—¿Pekatiwa'enie kepaɨmemekɨ memɨmatsixaneta?
14Peru Ketsutsi hawaikɨ pɨka'ita'ei, 'ayumieme waɨkawa ni'iyarixiekaitɨni kuwexinaruri.
15Merikɨte, mɨkɨ 'ixɨararitsie kuwexinaruri kaniyeiyarieyatɨkaitɨni memanutaxɨriya xeime mɨxɨnakɨ teɨteri kemɨ'ane memanayexeiya. 16'Ana 'anutahɨiyakame mekanexeiyakaitɨni waɨkawa mɨmariwakai Waxawaxi titewakame. 17Hikɨ me'uyukuxeɨrieku teɨteri, Piratu mɨpaɨ katiniwarutahɨawe:
—¿Kemɨ'ane pɨxenake nemɨxexɨnirieni: Waxawaxi nutsu Ketsutsi, Kɨritsitu mɨtiuterɨwarɨwa?
18(Mɨkɨ mɨpaɨ pɨtimaikai, huriyutsixi wa'ukiyarima mepiyetuakai mete'ikwatsirietɨ).
19Mexi Piratu 'itsɨkame 'uwenieyatsie 'akatei, 'ɨyaya niuki kaneinɨ'airieni mɨpaɨ 'utaitɨ: «Keneuhayewa mɨkɨ tewi heitseriemekɨ yamɨtikamie, kɨmana waɨkawa nepɨtiukwinixɨ neheinɨtsita hikɨ yɨwikɨta».
20Peru mawari wewiwamete tewa'aitɨwamete meta 'ukirawetsixi mekaniwarukemakaxɨani teɨteri Piratu memɨtawawirienikɨ Waxawaxi mɨxɨnakɨ meta Ketsutsi mɨmierienikɨ.
21Hikɨ mɨpaɨ katiniwarutahɨawe kuwexinaruri:
—¿'Ikɨ yuhutame kemɨ'ane pɨxenake nemɨxexɨnirieni?
Mɨkɨ mɨpaɨ meputiyua:
—Waxawaxi keneuxɨna.
22Piratu mɨpaɨ katiniwarutahɨaweta:
—Merikɨte, ¿keta ne'iyurieni Ketsutsi, Kɨritsitu mɨtiuterɨwarɨwa?
Yunaitɨ mɨpaɨ mekatenitahɨawe:
—Kuruxitsie ke'umierieni.
23Kuwexinaruri mɨpaɨ katiniwarutahɨawe:
—¿Titayarikuta? ¿titakɨ 'axatiuyuri?
Peru mɨkɨ kwinimieme matsi mekateniuhiwakaitɨni, mɨpaɨ me'utiyuatɨ:
—Kuruxitsie ke'umierieni.
24Kepauka Piratu mɨretima kename mekahei'eniekai, matsi waruxeiyaka kememɨteyutimɨirirɨmekai meniukixietɨ teɨteri, haa kaniuta'aita, hikɨ kaniukamaimani teɨteri wahɨxie mɨpaɨ 'utaitɨ:
—Nehetsie pɨkarahɨiwani 'ikɨ xuriyayakɨ, xeme pɨta xehetsie kerahɨiyani.
25Yunaitɨ teɨteri mɨpaɨ mekatenitahɨawe:
—Xuriyayakɨ tahetsie kerahɨiyani, meta tatɨɨriyama wahetsie.
26Hikɨ kaniwaruxɨnirieni Waxawaxi, peru Ketsutsi kaniuta'aita mɨkuweiyaxɨanikɨ, meta kaniyetuani kuruxitsie mɨmierienikɨ.
Kuyaxi Ketsutsi kememɨtenanaimakai
(Mat 27:27-31 – Mar 15:16-20)
27Kuwexinaruri hetsɨa miemete kuyaxi paratsiyu manuwe Ketsutsi mekanehana, meta mekaniwaruta'inieni yunaime kuyaxi waritana mekanaketɨkɨne. 28Me'itikemaripieka, 'ɨkari xetame mekanenakuwirieni. 29Meta xuya kurunayari me'utatsaka mu'uyatsie mekanenutimanirieni, meta haka 'itsɨyari mekanikweitɨani tserietana. Hikɨ hɨxiena metitunuma'uwetɨ me'inanaimatɨ mɨpaɨ mekatenikuhɨawekaitɨni:
«Ke'aku huriyutsixi tiwa'aitɨwame».
30Meta mekaniku'aɨtsikawiyakaitɨni, meta haka memikweitɨakaikɨ mɨkɨkɨ mu'uyatsie mekanitiwayakaitɨni. 31'Arike mɨya mete'itinanaimaka mekaninawairieni 'ɨkari, mekanitikemaritɨani 'ixurikieyakɨ, hikɨ mekaneihana kuruxitsie mɨmierienikɨ.
Ketsutsi kemɨtiumierie kuruxitsie
(Mat 27:33-44 – Mar 15:22-32, Ruk 23:33-43, Wa 19:17-24)
32Merikɨtsɨ mana me'uyehutɨ xeime mekaniutaxeiya Tsirene kiekame Tsimuni titewakame, mekaniwiya menutɨkirienikɨ kuruxieya.
33Kurukuta mɨrakutewatsie mekaniu'axɨani (taniukikɨ «Mɨki Mu'uya Manuka» mɨrakutewatsie). 34Mana mekani'itɨani kaxie winuyari tsiɨrika hepaɨ ma'ane nɨkame, peru he'inɨataka pɨkayuwaɨri menu'ieni.
35Kuruxitsie mekanikawieni meta kuyaxi mekaniyuta'iwa kememɨte'itahuriexɨanikekai 'ixurikiteya. 36Hikɨ mana mekutetɨ mekani'ɨwiyakaitɨni. 37Mu'uya heima mekaneiwera xapa, titakɨ mɨtiutaxanetsie mɨpaɨ re'ukame: «'Ikɨ Ketsutsi Kanihɨkɨtɨni, Huriyutsixi Tiwa'aitɨwame». 38Hamatɨana mekaniwarukawɨtɨani tenawayamete yuhutame kuruxitsie, tserietana xeime meta 'utatana xeime. 39Hikɨ mana memuyekɨkakai 'axamekatenikɨhɨawekaitɨni yumu'u me'utitsiketɨ, 40mɨpaɨ me'utiyuatɨ:
—'Ekɨ, pepika'unakekai tuki, haika tukari 'anukayayu hekwamekɨ pepitawewienikekai. Keneu'atawikweitsitɨa xɨka Kakaɨyari penu'ayatɨni, kuruxitsie kenakaye'a.
41Yaxeikɨata mawari wewiwamete tewa'aitɨwamete meta 'inɨarikɨ te'ɨkitamete meta 'ukirawetsixi yunaitɨ me'inanaimatɨ mɨpaɨ mekaniutiyuanekaitɨni:
42—Hipame waniu kaniwatawikweitsitɨwakaitɨni, peru pɨkayɨwe mɨyutawikweitsitɨani yɨkɨmana. Meta 'ixaheritsixi katatini'aitɨwametɨni waniu. Merikɨte, hikɨ ke'akayani kuruxitsie, 'ana yuri temɨteta'erienikɨ tame hetsiena. 43Mɨkɨ Kakaɨyaritsie yuri pɨti'erie, hikɨtsɨari xɨka 'inaki'erieka mɨkɨ ke'itawikweitsitɨani, mɨpaɨ mainekaikɨ: “Ne Kakaɨyari nekaninu'ayatɨni”.
44Meta tenawayamete 'auriena kuruxitsie memuyewɨkai yaxeikɨa 'axamekatenikɨhɨawekaitɨni.
Ketsutsi kemɨtiyetua yu'iyari
(Mat 27:45-56 – Mar 15:31-41, Ruk 23:44-49)
45Merikɨte tuka kaniukuyɨre naitsarie mana kwiepa, tau kɨa kawiekakuke kaniukuhekɨare. 46Hikɨ tau kɨa kawiekaku Ketsutsi karima kaniutahiwa mɨpaɨ 'utaitɨ:
—Herí, Herí, ¿rama tsawatani? (taniukikɨ manuyɨne: “Nekakaɨyari, nekakaɨyari, ¿titayari penetiuku'eiri?”)
47Kepauka hipatɨ mɨkɨ mana memɨti'ukai memu'enana mɨpaɨ mekaniutiyuani:
—'Eriyaxi kaniutahɨawe.
48Xewitɨ mɨkɨ 'unautsarɨmetɨ kaneyani, haa 'itsiweme 'utituka winu matsiwita heikahatsika, hakatsie 'iyeka kaneititserieni menu'ienikɨ. 49Hipatɨ mɨpaɨ mekaniutiyuanekaitɨni:
—Keneuhayewa, tepɨtaneniereni tsipara 'Eriyaxi kapunuani 'itawikweitsitɨanike.
50Hikɨ Ketsutsi tawari karima 'utahiwaka kaniyetuani yu'iyari.
51Hikɨ 'ixuriki 'emayetsuikai meuwiekai tukita hixɨata kanitsane heimana 'akayuaka. Kwie putayua meta tetexi kaniutitare. 52Teukiya nanutiyepierixɨani, yumɨiretɨ Kakaɨyari teɨterimama memukwikairi mekananuku'uni. 53Teukiyata mekanewatikɨne, 'arike Ketsutsi 'anukukeku, kiekari mɨpatsietsie mekaneutahaxɨani, meta yumɨiretɨ mepɨwaruxei.
54Xeitsienituyari kuyaxi tiwa'aitɨwame meta hipatɨ hamatɨana Ketsutsi memɨ'ɨwiyakai, kepauka kwie memuxei 'uyuaneme meta naime kemɨtiuyɨ mete'uxeiyaka, waɨkawa mekanimamakaitɨni meta mɨpaɨ mekaniutiyuani:
—Yurikɨ 'ikɨ Kakaɨyari punu'ayatɨkai.
55Yumɨiretɨta 'ukari mana mekaniti'ukaitɨni 'ateewa metanenieretɨ, mɨkɨ Ketsutsi hamatɨa mekaneyekɨnekaitɨni Karereyatsie mekaniparewiekaitɨni. 56Mariya Mararatanaka, xewitɨta Mariya Kakuwu Kutse mamaayatɨkai, meta Tsewereu niwemama wamaama, meta hipatɨ mana mekaniti'ukaitɨni.
Ketsutsi kemɨtiukateukie
(Mat 27:57-61 – Mar 15:42-47, Ruk 23:50-56, Wa 19:38-42)
57Hikɨ 'akayunirɨmekaku, tewi mana kaninuani xikutɨtɨ 'Arimateya kiekame Kutse titewatɨ mɨtiyɨ'ɨkitɨwametɨkai Ketsutsi hetsɨa mieme mɨhɨkɨtɨkai. 58Piratu hetsɨa nuaka kanitawawirieni Ketsutsi kaxarieya, hikɨ Piratu mɨpaɨ pɨtiuta'aitaxɨ mɨyetuiriyarienikɨ. 59Hikɨ Kutse Ketsutsi kaxarieya kanekweni kanita'eima rinu tsawanayari 'itiyakamekɨ. 60Yuteukiyapa kaneitateni mɨhekwakaitsie meripaitɨ mita'aitakai mɨwaye'inierienikɨ 'aitɨa. Meta tete 'amɨnena kaneukurupa kɨmana teukiya heunaka, kaneyani. 61Mana mekanititekaitɨni Mariya Mararatanaka meta xewitɨ Mariya, teukiya hɨxie.
Kuyaxi kememɨte'i'ɨwiyakai teukiya
62Merikɨtsɨ 'uxa'arieka, pienixi 'utaxɨku, mawari wewiwamete tewa'aitɨwamete meta paritseutsixi mekaniuyukuxeɨrieni Piratu hetsɨa, 63mɨpaɨ me'utiyuatɨ:
—Ti'aitame tame tepe'eriwa 'iya tiyu'itaiyame kemainekai 'ayeyuritɨ 'akuxi: “Haika tukari 'aye'ayu nepanukukeni”. 64'Ayumieme ketineuta'aita teukiya mɨta'ɨwiyarienikɨ haika tukari, kapa teyɨ'ɨkitɨwamete yɨwikɨta me'u'axɨame me'inawanikɨ, mɨpaɨ kapa metewarutahɨawekɨ teɨteri: “Mɨkite watsata panukuke”. Xɨka mɨpaɨ mete'uyurieni, 'imatɨrieka mieme 'itarika pe'iwa matɨari mieme.
65Piratu mɨpaɨ katiniwarutahɨawe:
—Kuyaxi xekeniwaranuwitɨki, xekenehu yemekɨ 'aixɨa renakame xekenehayewa teukiya.
66Hikɨ mɨkɨ mehekɨneka, teukiya mekaneunani tetekɨ, meta mekaniyu'inɨaritɨani, metatsiere kuyaxi mana mekaniwaru'uitɨani memihɨkakɨ.
Currently Selected:
Mateu 27: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.