Mateu 15

Mɨti'itiya meta mɨkati'itiya

(Mat 15:1-20 – Mar 7:1-23)

1Merikɨtsɨ 'ana Ketsutsi hetsɨa mekaniu'axɨani paritseutsixi meta 'inɨarikɨ memɨte'ɨkitametetɨkai, Kerutsareme memeyekɨnekai, mɨpaɨ mekatenita'iwawiya:

2—¿Titayari 'ahetsɨa miemete teyɨ'ɨkitɨwamete yamekatekahu yututsima wayeiyaritsie? Mepɨka'ukamaimawa kepauka memɨte'utikwa'a.

3Ketsutsi mɨpaɨ katiniwaruta'eiya:

—¿Titayarita xeme yaxekateyurie Kakaɨyari kemɨti'aita, yuyeiyaritsie xetewiyatɨ? 4Kakaɨyari mɨpaɨ katiniuta'aita: “Yaketinekamieni kememaitɨka 'apaapa meta 'amaama”, metatsiere: “Kemɨ'ane 'axamutaineni yupaapa meta yumaama wahepaɨtsita, ke'umierieni”. 5Xemeta, 'apɨta, mɨpaɨ xekateni'ɨkitani kename xewitɨ yɨwe mɨpaɨ mɨtitahɨawe yupaapa yatɨni yumaama: “Nepɨkayɨwe nemɨmatsi'uparewieni, naime nemɨrexeiya Kakaɨyari nemɨtiyetuirikɨri”. 6Merikɨte kemɨ'ane mɨpaɨ mɨtayɨni, waɨriyarika pɨkapitɨarieri yupapama muwaparewienikɨ. Mɨpaɨ yuyeiyari xete'uweiyatɨ tixaɨtɨ katihɨkɨtɨme xepayeitɨa Kakaɨyari niukieya. 7Xemɨte'itawamete. Kitsariyaxi 'aixɨa putayɨ tihekɨatatɨ xehepaɨtsita, mɨpaɨ 'utaitɨ:

8»“'Ikɨ teɨteri yutenikɨ xeikɨa 'aixɨa meputiyuane nehepaɨtsita,

peru wa'iyari 'ateewa puyeika.

9Yakɨ xeikɨa mekanenayexeiyani,

tita memɨte'ɨkita teɨteri wa'aitsika xeikɨa pɨhɨkɨ”».

10Merikɨtsɨ Ketsutsi yu'aurie waruta'inieka teɨteri, mɨpaɨ katiniwarutahɨawe:

—Xekeneu'enana meta xeketenemaiwaweni. 11Tita ka'itiyakame tewi mɨrayeitɨwa, tetana mɨranukayeikakɨ mɨkɨkɨ 'axapɨka'itɨarieni. Matsi tita tetana mɨratineikakɨ, mɨkɨkɨ pɨta ka'itiyatɨ payeika.

12Hikɨ teyɨ'ɨkitɨwamete 'ahurawa me'ukɨneka mɨpaɨ mekatenitahɨawe:

—¿Mɨpaɨ petimate, paritseutsixi 'aniuki me'u'enieka mɨkawarunakixɨ?

13Mɨkɨ mɨpaɨ katiniwaruta'eiya:

—Naitɨ 'iteɨri ne'ukiyari taheima makawe mɨka'ika'e pɨwatihunaxɨani. 14Xekeniwahayewani, me'akɨkɨpetɨ mepɨwarahapana hipame. 'Akɨpetɨ xeime makɨpe xɨka hehana, yuhutatɨ mewatixawatsie meneukaxɨriekuni.

15Hikɨ Pekuru mɨpaɨ katinitahɨawe:

—Ketaneutahekɨatsitɨiya 'ikɨ 'ɨkitsika.

16Ketsutsi mɨpaɨ katiniwarutahɨawe:

—Kari xemeta 'atsixepɨkatemate. 17Tamɨ tita teta mɨranukayeika yuriepa nikayuyuipikeni, 'ariketa kanihɨamɨkɨ. 18Peru tita teta mɨrayeneika 'iyaritsie patineika, mɨkɨkɨ tewi 'axakani'itɨarieka. 19Karikɨ 'iyaritsie katinatineikani 'axa'iyaritɨarika, xeime kemɨtiumieni, xeime kemɨtiukumayɨani kayɨ'ɨya kayɨkɨna, kememɨteyukumaɨwa teɨteri kemɨkatiheitserie, 'inawari, 'itarika meta 'axaniuki hipame wahepaɨtsita. 20'Ikɨ katinihɨkɨtɨni tewi ka'itiyakame memayeitɨwa, xɨka tiukwani kamaimatɨ mɨkɨkɨ tewi ka'itiyatɨ pɨkahayeika.

Yuri kemɨti'eriekai 'uka Kanani kiekame

(Mat 15:21-28 – Mar 7:24-30)

21Merikɨtsɨ mana mɨyetɨa Ketsutsi, kaneyani Tiru kwieyaritsie meta Tsiruni. 22Hikɨ mana 'uka Kanani kiekame, mɨkɨ kwieyaritsie heyeyaka, hepana kaniuyani mɨpaɨ 'utaitɨ:

—Kenenenenimayaka, Ti'aitame, Rawiri pemɨnu'aya. Neniwe 'uka waɨkawamekɨ pɨtiuka'eniwa, kakaɨyari 'axamɨ'ane 'inɨkaku.

23Peru Ketsutsi pɨka'ita'ei. Hikɨ 'ahurawa me'akɨneka teyɨ'ɨkitɨwamete, mɨpaɨ mekatenitahɨawe:

—Kenanunɨ'a, pɨtatsi'uweiya xeikɨa 'utahiwatɨ.

24Ketsutsi mɨpaɨ kaniutayɨni:

—Ne Kakaɨyari muxatsimama memeuyexɨri wahetsɨa xeikɨa nekaneyenɨ'arieni, 'ixaheritsixi teɨteriyari wahetsɨa.

25'Uka 'ahurawa 'ayaka kaniutihɨximakeni hɨxiena, hikɨ mɨpaɨ katinitawawirieni:

—Ti'aitame 'aku, keneneuparewi.

26Mɨkɨ mɨpaɨ katinita'eiya:

—'Aixɨa pɨka'ane xɨka yuniwema paa warunawairieni, tsɨikɨri pɨta xɨka warumini.

27'Uka mɨpaɨ katinitahɨawe:

—Yuri peputaine Ti'aitame, peru 'atsita tsɨikɨri temɨxikiyari mepukukwa'a wakutsiyarima wamexatsie manakawiwike.

28Hikɨ Ketsutsi mɨpaɨ katinita'eiya:

—'Uka 'aku, waɨkawa yuri pepɨti'erie. Yakereyɨni tita pemɨra'iwawa.

Hikɨ 'ana kwitɨwa 'aixɨa reu'erietɨ kanayani nu'aya.

Ketsutsi kemɨtiwarumi nauka miriyari

(Mat 15:29-39 – Mar 7:31-37, 8:1-10)

29Merikɨte Ketsutsi mana kaniyeyani, hikɨ Karereya harakunayari tetsita paitɨ kaninuani. Mana yemuritsie kanitiyune mana kanayerɨni. 30Hikɨ hetsɨana mekaniu'axɨani yumɨiretɨ teɨteri, mekaniwa'atɨani memɨ'ɨkatetutuni, memɨkaheuneniere, memɨwaritutuni, memɨkaniuwawe meta hipame tekwikwikate, hɨxiena mekaniwa'atɨani, mɨkɨta 'aixɨa meteheu'eriekame kaniwarayeitɨani. 31Hikɨ teɨteri mekanihɨxiyakaitɨni mewaxeiyatɨ memɨkaniuwawekai me'utiniukame, memɨwaritutunikai 'aixɨa me'aneneme, memɨ'ɨkatutunikai meku'uwame, meta memɨkaheunenierekai meheuneniereme mewaxeiyatɨ. 'Aixɨa mekaniutiyuanekaitɨni 'ixaheritsixi yukakaɨyari hepaɨtsita.

32Hikɨ Ketsutsi yu'aurie waruta'inieka yuhetsɨa miemete teyɨ'ɨkitɨwamete, mɨpaɨ katiniwarutahɨawe:

—Ne 'ikɨ teɨteri nepɨwareunenimaya, haika tukari mekaniyuriekari nehetsɨa meta 'ikwai mepɨkahexeiya. Nepɨkanewaɨriya mekatekwakame nemɨwarutateutɨani, kapa mehetiweranaxɨame mehekaxɨrieni huyeta.

33Hikɨ teyɨ'ɨkitɨwamete mɨpaɨ mekatenita'eiya:

—¿'Ena makumawetsie hakewa tepeikaxeiya paa mɨyapaɨmeme temɨtewaminikɨ teɨteri mɨyameyupaɨmeme?

34Ketsutsi mɨpaɨ katiniwaruta'iwawiya:

—¿Kepaɨmeme paa xepexeiya?

Mɨkɨ mɨpaɨ mekaniutiyuani:

—'Atahutame, meta tsapari yayupaɨmeme 'etsimepepeme.

35Hikɨ katiniuta'aita teɨteri 'amemukuyaxixɨanikɨ kwiepa. 36Paa 'atahutame 'anu'ɨka meta tsapari, pamɨpariyutsi Kakaɨyari kaniupitɨani, hikɨ kanititara paa meta kaniwayetuirieni teyɨ'ɨkitɨwamete. Mɨkɨta teyɨ'ɨkitɨwamete teɨteri mekaniwaruta'ɨitɨani. 37Yunaitɨ mekateniukwani yemekɨ mekaniutihuxani. 'Arike teyɨ'ɨkitɨwamete mekanikuxeɨrieni tarimeyari muyuhayewaxɨ, 'atahuta tsikɨiwitiyari hɨpɨnetɨ patɨa. 38Memɨte'ukwai 'ukitsi nauka miriyari mekaniyupaɨmekaitɨni, 'ukari meta tɨɨri meka'inɨaritɨ. 39Hikɨ warutateutɨaka teɨteri, kanuwatsie kanikayerɨni, Makarani kwieyaritsie kaneyani.

Currently Selected:

Mateu 15: hch

Highlight

Compare

Copy