Keremiyaxi 40
40
Keremiyaxi kemɨtiuxɨnarie
1Yawé niukieya Keremiyaxi hetsɨa kaninuani 'arike Nawutsararani kuyaxi tiwa'aitɨwame 'ixɨnaku Xama kiekariyaritsie. Nawutsararani mana nitaxeiyakaitɨni pɨretsutsiekame hɨakame tepɨakɨ, Kura kiekatari meta Kerutsaremetari wahamatɨa Wawiruniya memanuhapanienikekai. 2Kuyaxi tiwa'aitɨwame Keremiyaxi yuxaɨtame 'uta'inieka mɨpaɨ katinitahɨawe: «Yawé 'akakaɨyari 'ikɨ 'uximatɨarika hetsiemieme mɨpaɨ katiniu'aita 'ikɨ kwieyari hetsiemieme, 3hikɨri Yawé kemutayɨkai kaneye'atɨani. 'Ikɨ naitɨ yapɨtixeyurie Yawé hepaɨtsita 'axaxemɨte'uyurikɨ meta niukieyatsie yaxemɨkatekakɨkɨ. 4Peru hikɨ nekamenixɨnamɨkɨ 'amamatetsie tepɨakɨ pemɨhɨakɨ. Xɨka peheuyeimɨkɨni nehamatɨa Wawiruniya, hikɨmɨtsɨ, ne nekamaneta'ɨwiyamɨkɨ. Xɨkata yapekara'eriwani, keneukunua. Keneutanierixɨa kemakuyewa, hakewa metsihekunanakeni kenemie».
5Keremiyaxi 'atsikahainekaku, Nawutsararani tawari mɨpaɨ tinitahɨawe: «Kenemie Kerariyaxi 'Akikani nu'aya hetsɨa, Tsapani teukarieya, ti'aitame Wawiruniya kiekame kanenukakeni Kura kiekariyaritsie kuwexinaruri mɨhɨkɨtɨnikɨ, hamatɨana keneyeikani meta 'ateɨterima wahamatɨa, yatɨni tsepa hakewa mɨmatsihenakeni».
Hikɨ kuyaxi tiwa'aitɨwame tinimini 'ikwai meta 'imikieri, hikɨ nitatuani. 6Hikɨ Keremiyaxi neyani Kerariyaxi 'Akikani nu'aya hetsɨa, Mitsipa kiekariyaritsie, hamatɨana niuyuhayewa kiekari hixɨapa, kiekari 'akuxi muyuhayewanekai mɨkɨ kwieyaritsie.
Kerariyaxi kemɨtiumierie
(Ker 40:7-9, 41:1-3 – 2Te 25:22-26)
7Kepauka memɨtehetima memanuyetei meta kuyaxi yeuta memɨtitekai kename ti'aitame Wawiruniya kiekame Kerariyaxi 'anukakekai 'Akikani nu'aya, mɨkuwexinaruritɨnikɨ mɨkɨ kwieyaritsie, kename 'ihɨritɨakai 'aixɨa mɨtimaikaikɨ teɨteri 'ukitsi, 'ukarawetsixi metatsiere tɨɨri, meta tixaɨtɨ memɨkateheuxeiya mɨkɨ kwieyaritsie memɨtamakai 'akuxi Wawiruniya memɨkahehapaniewawekai, 8hikɨ menekɨne Mitsipa Kerariyaxi hetsɨa meheyutaxatake. Menihɨkɨtɨkaitɨni: 'Itsimaheri Netaniyaxi nu'aya, Kuhanahani Kunatani Kareya niwemama 'ukitsi, Tserahiyaxi Tanikumeti nu'aya, 'Epahi niwemama 'ukitsi Netupa kiekame, meta Ketsaniyaxi Mahaka kiekame nu'aya teɨterimama yunaitɨ. 9Kerariyaxi, 'Akikani nu'aya, Tsapani teukarieya, mɨpaɨ tiniwarutahɨawe meta teɨterimama: «Wawiruniyutsixi xepɨkawamakaka. Xɨka xeme 'ena xeyuhayewani 'ikɨ kwieyaritsie xeheyexeiyatɨ ti'aitame Wawiruniya kiekame, ne mɨpaɨ nepaine 'aixɨa 'iyari xepu'uwani. 10Ne Mitsipa neniyuhayewakamɨkɨ xehetsiemieme nemaniukanikɨ wawiruniyutsixi wahetsɨa 'enapai memɨye'axetsie. Peru xeme xeketenetsutɨaka xete'utatɨ kaxie winuyari, 'ikwaxi wita timieme meta hatseiti, kiekaritsie xekeneutiteni hakewa xemetitekai».
11Yunaitɨ huriyutsixi Muhawi memu'uwakai 'Amuni meta 'Erumi, metatsiere hipame kwieyaritsie memu'uwakai, mɨpaɨ metenetimani kename ti'aitame Wawiruniya kiekame yayupaɨmeme waruhayewakai Kura kwieyaritsie mieme, kuwexinarurikɨ 'enukakeka Kerariyaxi, 'Akikani nu'aya, Tsapani teukarieya. 12Hikɨ yunaitɨ huriyutsixi meniu'axɨani Kura kwieyaritsie, naitsarie hakewa memekɨnekai. Me'u'axɨaka Mitsipa meniyutaxata Kerariyaxi hetsɨa, mɨkɨtatsiere kaxie winuyari meniuti'ɨna meta 'ikwaxi wita timieme waɨkawame.
13Kuhanahani Kareya nu'aya, meta yunaitɨ memanuyetei, kuyaxi meyɨnɨtɨ yeuta memetitekai, meniyutaxata Kerariyaxi hetsɨa Mitsipa kiekariyaritsie, 14mɨpaɨ mekatenitahɨawe:
—¿Petimate Warixi ti'aitame 'Amuni kiekame, 'Itsimaheri meyenɨ'a Netaniyaxi nu'aya mumetsimienikɨ?
Peru Kerariyaxi, 'Akikani nu'aya yuri pɨkatiwaruta'eriri. 15Mitsipa kiekariyaritsie Kuhanahani Kareya nu'aya mɨpaɨ Kerariyaxi katiniutahɨawe 'awie:
—Keneneupitɨa 'Itsimaheri Netaniyaxi nu'aya nemumiemiekɨ. Xewitɨ 'atsikatimaikaku. ¿Ketitayari tete'i'eirieka mɨmetsimienikɨ? Matsi xɨka mɨpaɨ tiɨyɨni mekanitayeixɨakuni huriyutsixi 'a'aurie memu'axɨa, mekaneuyewekuni keyupaumetɨ memuyuhayewatɨwe Kura kiekariyaritsie.
16Peru Kerariyaxi, 'Akikani nu'aya mɨpaɨ Kuhanahani Kareya nu'aya katiniuta'eiya:
—Mɨpaɨ pepɨkatiku'eriwani. Pɨ'itarika kepemaine 'Itsimaheri hetsiemieme.
Currently Selected:
Keremiyaxi 40: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
