Keremiyaxi 31
31
1Yawé mɨpaɨ kanaineni: «'Iya tukaritsie, 'Ixaheri tɨɨriyamama Wakakaɨyari nepɨhɨkɨtɨni mɨkɨta neteɨterima mepɨhɨkɨtɨni».
2Yawé mɨpaɨ kanaineni:
«Teɨteri memuyuti'awietaxɨ tiyukwitɨnekaku,
makumawetsie 'aixɨa 'iyari mekateniuyaxe,
'Ixaheri kepauka 'uxipiya mukuwaunekaitsie».
3Mɨixa wiyari panuyemie kepauka Yawé mɨpaɨ mɨnetiutahɨawixɨ:
«Hawaikɨ kaheu'akamekɨ nepɨmetsinaki'erie,
'ayumieme 'aixɨa 'anemekɨ nepɨxe'ɨwiya,
4'Ɨimari 'ixaheri mieme.
Hekwamekɨ nekamenanukuketɨamɨkɨ,
puyuri, tawari petɨrɨkaɨyetɨ pepayani.
Hekwamekɨ tepu 'etsimɨyeyeu xekaniti'ɨikuni
temawierikakɨ xekatenikaneikuni.
5Tawari kaxie xekanika'ekuni
Tsamariya hɨriyaritsie,
kemɨ'ane memika'eni
meyutemamawietɨ mepikwaka.
6Tukari kanaye'amɨkɨ kepauka tehɨwemete
memɨtihiwa 'Epɨrahini hɨriyaritsie:
“Xekenatihuni, Tsiyuni paitɨ tepanutikɨne,
Yawé hɨrieyatsie takakaɨyari”».
7Yawé mɨpaɨ kanaineni:
«Xekeneutikwikani xeyutemamawietɨ Kakuwu hetsiemieme,
temawierikakɨ xekeneutihiwani nuiwarite 'aixɨa memɨ'itɨarie wahetsiemieme.
Nɨawarika kwi xekeneu'enitsitɨa mɨpaɨ xe'utiyuatɨ:
“Yawé, 'ateɨterima keniwarutawikweitsitɨa,
'Ixaheri hetsie memuyuhayewaxɨ keniwarutawikweitsitɨa”.
8Ne tayeta kiekari mukumatsie nekanixe'ayewitɨmɨkɨ,
nekanixekuxeɨrimɨkɨ tsepa hakewa paitɨ xeme'uwa.
Yumɨiretɨ mekani'axɨakuni.
Xehamatɨa mekani'axɨakuni memɨkaheuneniere meta memuhurietɨka,
memayehukatɨka meta memɨniwetɨka.
9Xe'utitsuatɨ xekani'axɨakuni,
nexenɨtɨatɨ nekanixe'ayewitɨmɨkɨ.
Hakewa haa mauyehane mana nekanixe'atɨamɨkɨ
huyeta 'uwerikaku
xemɨkahekaxɨrienikɨ.
Ne 'Ixaheri paapaya nepɨhɨkɨ,
neniwe 'Epɨrahini mexɨakame pɨhɨkɨ.
10»Nuiwarite, Yawé niukieya xekeneu'eni,
meta xekenekuxatani haramara tetsita meteewatsie paitɨ:
“Kemɨ'ane 'Ixaheritsixi mɨwareutaweiyaxɨa, mɨkɨ kaniwakuxeɨrimɨkɨ,
muxatsi wahɨweme hepaɨ nekatiniwa'ɨwiyamɨkɨ”.
11Yawé 'Ixaheritsixi puwarutawikweitsitɨa,
memɨtɨrɨkawi wahetsɨa kaniwarayewitɨni.
12Mekani'axɨakuni Tsiyuni hɨriyari 'amanutitewitsie paitɨ mekanitakwikakuni,
Yawé witsimɨtiuka'iyarikɨ mepuyutemamawieka:
nepɨtixeyetuirieni tɨriku, kaxie winuyari mɨhekwa meta hatseiti,
muxatsi waniwema meta wakaitsixi.
'Iteɨri 'aixɨa mɨreukuhatuiyarie hepaɨ xekani'anekuni,
tawariri xeweraranitɨ xepɨkahakɨne.
13Hikɨ 'ana 'ɨimarixi temawierikakɨ mepɨtekaneini,
temari meta 'ukirawetsixi yunaitɨ.
Wakukuiniya temawierika nekanayeitɨamɨkɨ meta nekaniwanɨtɨamɨkɨ,
kememɨte'uka'eniwa temawierika nekanayeitɨamɨkɨ.
14Mawari wewiwamete memɨtekwaka waɨkawa mepɨtehexeiyani,
meta 'aixɨa mekateniu'uwakuni neteɨterima»,
Yawé mɨpaɨ kanaineni.
15Yawé mɨpaɨ kanaineni:
«Xamatsie paitɨ hiwari pa'eniɨriɨkɨ,
tsuari meta hiwerika.
Xakeri kanetaineni, yuniwema 'ukitsi wahekɨ hetatsɨatɨ
meta mɨkɨ kapɨyɨnɨtɨarinɨa,
niwemamari 'ukitsi memɨka'u'uwakɨ».
16Yawé mɨpaɨ kanaineni:
«Ketineuhayewa pe'utatsɨatɨ,
'a'ukai kena'itiexɨa,
kepemɨtiuka'eniwakɨ mɨkɨkɨ pepɨrakapitɨarieni:
'aniwema 'ukitsi kiekari muwaraye'unietsie mekanayekɨnikuni
—Yawé mɨpaɨ kanaineni—.
17Tita pemɨtitakwewie pepɨkahetɨtɨmaiyani:
'aniwema 'ukitsi yukiekaritsie mekani'axɨakuni
—Yawé mɨpaɨ kanaineni—.
18»Nekani'enieniri 'Epɨrahini kiekatari wahiwerika:
“Tepɨtekwinitɨarie tuuru mɨkamaxiu hepaɨ,
hikɨ yatepɨteha'eriwa pemɨtatsitimaxiutakɨ.
Ketane'atɨa, 'aixɨa ketaneuyuri,
'ekɨtsɨ, takakaɨyari, Yawé pekanihɨkɨtɨni.
19Tame tepumatsi'uku'eiriekai, peru tepaye'eri,
mɨpaɨ teteheyutimaika tatawitsie tepeuyuhutsunakai.
Tepeuyutetewiya tixaɨtɨ tepɨkatehayuyeitɨa
temariyari ketemɨte'utewinɨarie mɨtimɨirekɨ”.
20»'Epɨrahini tewiyari neniwe 'uki neminaki'erie pɨhɨkɨ.
'Ikɨ neniwe 'uki kanihɨkɨtɨni waɨkawa neminaki'erie.
Kepauka nemɨtikwinitɨa,
nepeye'eriwa ne'inaki'erietɨ.
Mɨkɨ hetsiemieme waɨkawa nepɨne'iyaritɨa,
mɨkɨ waɨkawamekɨ nepeunenimaya
—Yawé mɨpaɨ kanaineni—.
21»'Ahuyeta 'inɨari keneuyewɨtɨaxɨa,
peha'inɨaritatɨ hakewa pemeuyetɨa,
huyeta 'aixɨa ketineyɨ'ɨwiya.
'Ixaheri 'ɨimari kenenua,
kenakunua tawari 'akiekaritsie.
22¿Kepaukake pepɨtihayewa pekuyeikatɨ,
neniwe 'uka yapemɨkatikamie?
Yawé tihekwame katininetɨamɨkɨ 'ena kwiepa,
'ukaratsi yukɨna hetsɨa kaninuamɨkɨ».
23Mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: «Kepauka ne 'aixɨa pe'itɨariekame nemɨmatsi'ayeitɨani, Kura kwieyaritsie meta kiekariteyaritsie mɨpaɨ mekaniutiyuanekuni:
»“Hɨri mɨpatsie, heitserie mexeiya kie:
Yawé kexe'ɨwiyani”.
24Mana 'axeikɨa mekanititekuni Kura meta kiekariteyari, yunaitɨ 'etsamete meta muxatsi wahɨwemete. 25Mɨyeharimɨne nekaniharitɨamɨkɨ meta mɨyehakamɨne nekatinimimɨkɨ».
26'Ana nekananutaniere, meta nehɨxite nekananutayepiexɨani. Witsiti'anemeri netiuheinɨka.
27Yawé mɨpaɨ kanaineni: «Tukari kanaye'amɨkɨ, teɨteri waniwema meta tewaxi waniwema nekaniwaka'emɨkɨ, 'Ixaheri meta Kura kwieyaritsie nekaniwatamɨiriyamɨkɨ. 28Mɨpaɨ kenemɨtiwata'ɨwiya nemɨwaka'unakɨ meta kenemɨtiwarakumaweriya, 'uximatɨarika newapitɨatɨ, yaxeikɨata nemɨwaranuku'uitɨanikɨ meta nemuwaranukayatsakɨ nepɨyɨwe —Yawé mɨpaɨ kanaineni—. 29'Iya tukaritsie mɨpaɨ pɨkatitaniukieni:
»“Wapaapama kaxie takari matsina meputikwai,
waniwemata 'ukitsi watamete pɨkɨitsietɨka”.
30'Apɨtata, kemɨ'ane kaxie hatsiname mɨtikwani tameteya kanikɨitsiexɨamɨkɨ, tatsɨaritɨtɨ yuxexuitɨ ke'axamemɨte'uyurikɨ mekanikwikuni».
31Yawé mɨpaɨ kanaineni: «Tukari kanaye'amɨkɨ, tɨratu hekwame nemɨwewienitsie 'ixaheri teɨteriyari meta Kura xiɨyarimama wahamatɨa. 32Tɨratu kenemɨtiuwewi wa'ukiyarima wahamatɨa mɨpaɨ pɨka'aneni, kepauka 'Ekipitu nemɨwarayewitɨ mɨkɨ yamepɨkatekakɨ, tsepa ne wakɨna nemɨhɨkɨtɨkai —Yawé mɨpaɨ kanaineni—.
33»'Ikɨ tɨratu kanihɨkɨtɨni 'iya tukari 'anuyeyayu nemɨwawewirieni 'ixaheri teɨteriyari —Yawé mɨpaɨ kanaineni—: Wa'eriwametsie ne'inɨari niukiyari nepɨwapitɨani meta wa'iyaritsie nekanika'utɨamɨkɨ. Ne wakakaɨyari nekanihɨkɨtɨkamɨkɨ mɨkɨta neteɨterima mepɨhɨkɨtɨni. 34Pɨkayɨweniri xewitɨ yuhepaɨ tewi mɨti'ɨkitɨakakɨ meta yu'iwa mɨpaɨ haitɨ: “Yawé kenemateni”, karikɨ yunaitɨ, 'etsimemuyumate paitɨ meta 'amemuyumate mekanenetimaikuni —Yawé mɨpaɨ kanaineni—. Ne ke'axamemɨte'uyurikɨ nekatiniwareuyehɨwiriemɨkɨ, hatsuakuri nepɨkahaye'erieni».
35Yawé mɨpaɨ kanaineni,
Yawé Naimekɨmɨtɨrɨkaɨye pɨtitewa,
kemɨ'ane tau mɨtatsiyetuirie tukarikɨ mɨkɨxenikɨ,
metseri meta xurawetsixi, tɨkarikɨ memɨhekɨariwiekakɨ,
meta haramara muwatayuitɨwa hamewarieya mutatɨrarɨkanikɨ:
36«Xɨka 'ikɨ 'inɨarikɨ mekatehaye'atɨaka
—Yawé mɨpaɨ kanaineni—,
hikɨ 'ana 'Ixaheri xiɨyarimama
tawariri hatsuaku nenuiwarima mepɨkahɨkɨtɨni».
37Yawé mɨpaɨ kanaineni:
«Xɨka muyuawi kemeutitewa yu'inɨatsinɨakake,
meta kwie tsutɨmeyari yuxeiyanɨakake,
hikɨ ne 'Ixaheri nuiwarieya nepuwaruku'eirienike
naimekɨ ke'axamemɨte'uyurikɨ.
—Yawé mɨpaɨ kanaineni—.
38Yawé mɨpaɨ kanaineni: «Tukari kanaye'amɨkɨ Yawé kiekarieya manukuketɨarienikɨ, tuxiyu Kananeri manuwe tsutɨarietɨ kitenie 'Itsikina mɨtitewatsie paitɨ ye'atɨkaitɨ. 39Kaunari ti'inɨnɨatame heitserie kanihaniemɨkɨ, mana Karewi hɨriyaritsie paitɨ, Kuha paitɨ kanititunimɨkɨ. 40Naitɨ mayeweri hakewa mɨkite memeukaxɨriwa meta naxi, naitɨ kwietsanari, Kiruni 'akiyaritsie paitɨ meta kawayutsixi wakitenieyaritsie, mutatsikuri tau manatineika hepatsie, mɨkɨ kanipatsiekamɨkɨ Yawé hetsiemieme. Hatsuakuri kiekari pɨkahahunarieni meta pɨkaka'unarieni».
Currently Selected:
Keremiyaxi 31: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
