Kitsariyaxi 50
50
'Ixaheri ke'axamɨtiuyuri meta ti'uximayatsiriwame kemɨreu'ena
1Yawé mɨpaɨ kanaineni:
«Ne xemaama, nepuku'eiri,
¿Peru hakewa 'eiriya xapayari?
¿Yatɨni kemɨ'ane nemɨrapiinirie hetsɨa nepɨxe'utua?
Xeme xekaniutuiyani 'axaxemɨte'uyurikɨ,
xeme xekaniutuiyani,
'axaxemɨteyuriekaikɨ xeme
xemaama kaniuku'eiriwa.
2¿Titayari nemunuatsie xeime tɨma nekatiutaxei?
¿Titayari xewitɨ kanetiuta'ei nemɨxe'utahɨawixɨtsie?
¿Kamɨtsɨ nekatiyɨwe nemɨxe'utawikweitsitɨanikɨ?
¿Kamɨtsɨ netɨrɨkariya katiyɨwe mɨxe'uxɨna?
'Etsiwa ne neyutahaxɨatɨayu haramara kanakawaukeni,
meta hatɨa makumawe nekanayeitɨwani,
haa heuyewekakaku tsapari mekanitakukuweni hariyakɨ,
meta mekanitipɨkeni.
3Muyuawi yɨriyakɨ nekaniukemaritɨani
meta naxi nekanikawiriwani muyuhiwerieka hepaɨ».
4Yawé naimekɨmɨyɨwe pɨnetsi'upitɨa
nemeutaniuwenikɨ netimaiwetɨ,
kemɨ'ane mu'uxe neniukikɨ nemutuikanikɨ.
Ximeri yakanetinanutahɨtuwani,
meta nenakata neheu'ename kanenayeitɨaka
para nemeu'enanikɨ teyɨ'ɨkitɨwamete wahepaɨ.
5Yawé naimekɨmɨyɨwe neheu'ename kanenayeitɨani,
hawaikɨ nepɨkahe'eiyani, meta ne'utɨa nepɨkayeyeika.
6Newari nepɨyetua kemɨ'ane memɨnetsikuwayakai wahetsɨa,
ne'auri nepɨyetua kepauka hipatɨ nemɨxiya memanuyehunakai,
neyuriyariekaku meta kepauka nemuku'aɨtsikawiyarɨwakai
nenierika nepɨka'uti'awietaxɨ.
7Yawé naimekɨmɨyɨwe matsi mɨnetsiparewiekɨ,
hatsuaku tixaɨtɨ mekanete'ayeitɨatɨri mepɨkahakɨne.
'Ayumieme nenierika neputseiriyaxɨ tete mɨtse'i hepaɨ,
mɨpaɨ nepɨtimate hawaikɨ nepɨkatewiyatsitɨarieni.
8Ne'aurie hurawa kaniuyeikani kemɨ'ane nehetsie mɨtanuani.
¿Kemɨ'ane kamɨtsɨ pɨnetsitaniukimani?
Kehamieni nehetsɨa.
¿Kemɨ'ane pɨnetsixaneta?
Kenetsi'utaxaneta kuta.
9Yawé naimekɨmɨyɨwe kanihɨkɨtɨni mɨnetsiparewie.
¿Kemɨ'ane pɨnetsi'anutahɨani?
Yunaitɨ mɨkɨ mepukumawere,
'ixuriki mutaxɨ tepaxietɨ hepaɨ.
10¿Kemɨ'ane xeme Yawé payemakaxe
meta kemɨ'ane xeme tiyu'uximayatsiriwame peu'enie?
Tsepanetɨ yɨwikɨta mumie,
'etsiwa tɨma kahekɨariwiyarietɨ,
Yawé hetsie yuri keti'erieka,
meta Kakaɨyari hetsie ketiwiyani.
11Peru xeme tai xemukutaiya
meta 'utsi xemuti'ɨwe,
kɨmana xeyukɨxirietɨ xemuhunikɨ,
xemitaiyatɨka xehekɨariwiyakaku.
'Ayumieme nepɨxe'anunɨ'airieni:
'uximatɨarika waɨkawa, mana xepɨkwini.
© 2020, Wycliffe Bible Translators, Inc.