Kitsariyaxi 47
47
Wawiruniya kemɨtiuka'unixɨ
1»Kenanakaye'a, tumuanaripa keneutayexi,
Wawiruniya niweya 'uka 'ɨimari,
kwiepa keneutayexi, 'uka karireutsixi waniwe,
'uweni kaniumaweniri.
Hatsuakuri witsipetiyɨritɨ witsipe'anetɨ
pepɨkatitahɨawarieni.
2Tete murinayari keneutitu'i, harina keneuyetɨxi,
'ixuriki 'ahɨxie pemeukuwera keneɨkɨxɨna.
'A'iwi keneukutuka, 'a'ɨkate keneutimaweriyaka,
hatɨatetsie kenanuye'a.
3Kepemɨtimawe kanihekɨarimɨkɨ,
'atewiyarika pekanihekɨatamɨkɨ.
Ne nekaninekɨhɨamɨkɨ,
nixeime nepɨkareuyehɨwirieni».
4Tatsiwikweitsitɨwame Mɨpatsie 'Ixaheri hetsiemieme kanihɨkɨtɨni,
Yawé Naimekɨmɨtɨrɨkaɨye katinitewaka.
5«Kayuwatɨ ketineuyexi, 'uka karireutsixi waniwe,
yɨwita keneutahaki.
Tawariri hatsuaku “'uka nuiwarite tiwa'aitɨwame”
pemɨkatiterɨwarienikɨ.
6Ne neteɨterima wahetsiemieme nepɨha'akai,
'ayumieme mekapatsiekame nepuwarayeitɨa nehetsiemiemete.
Nepuwayetua 'amamatsie,
'ekɨta pepɨkawarutinenimayataxɨ.
'Ukirawetsixi waɨkawa raheteme
pepɨtiwaruta'aitɨa.
7Mɨpaɨ peputayɨ: “'Uka neheyemekɨ ti'aitame nepɨhɨkɨtɨni”.
Peru mɨpaɨ pepɨkatimaikai,
meta pepɨkaheitimaixɨa kepemɨreutiparekekai.
8»Hikɨ 'ikɨ keneu'eni, pemɨtiukahiwe'erie,
'ekɨ kayuwatɨ pemuyeika, mɨpaɨ pemuti'akɨhɨawe:
“Ne nekanihɨkɨtɨni, tawarita xewitɨ kaniumaweni.
Hatsuaku wiura nepɨkahayani meta neniwema nekawarexeiyatɨ nepɨka'ayani”.
9Yapauka, xeitukaritsie,
naitɨ mɨkɨ 'ahetsie katinaye'amɨkɨ:
'aniwema pekaniwareuyehɨamɨkɨ meta wiura pekanayeimɨkɨ,
mɨkɨ mekamenitimariutakuni,
tsepa waɨkawa pemɨti'akewaiya
meta kepemɨtiuyemate yɨkɨ pemɨtiyurienikɨ.
10'Ekɨ 'axapemɨtiyurienetsie pepɨtiwiya,
mɨpaɨ pekaniutaineni: “Nixewitɨ pɨkanetsixeiya”.
Kepemɨtimaiwe meta kepemɨtimate pɨmati'itaiya
kepauka 'axɨata mɨpaɨ pemutaine:
“Ne nekanihɨkɨtɨni, tawarita xewitɨ kaniumaweni”.
11Peru 'uximatɨarika kaninuamɨkɨ 'ahetsie
pemuwaranayexɨrieni pepɨkayɨweni kepemɨtiuyematekɨ,
kwiniya 'ahetsie kaninuamɨkɨ
'ekɨ pepɨka'itawikweiya.
'Ahetsie katininuamɨkɨ kepemɨkati'akɨhɨawetsie,
yapauka 'ahetsie katininuamɨkɨ.
12»Merikɨte, keneyeweiyani, peti'akewaiyatɨ
'ikewari kepaɨmeme pemuyematekɨ,
nunutsiyari paitɨ pemiti'ati'ɨkitɨa.
Heiwatɨ petiunakitsitɨani,
heiwatɨ pemakaxiwatɨ pe'ayani.
13Waɨkawa 'ɨxatsikɨ pepu'uxe.
Muyuawitsie miemekɨ memɨteyɨ'ɨkitɨa 'ahetsɨa miemete meke'uyukuxeɨrieni,
xurawetsixi memɨwaxeiya,
kemɨtiyɨni memɨtekuxata xeimetseri 'anukayeikakaku,
mekematsi'utawikweitsitɨani tita 'ahetsie mɨraye'aximekɨ.
14Keniwaruxeiya. Mɨaxa hepaɨ mekani'aneni,
tai kaniwatixɨtsitɨamɨkɨ.
Yɨkɨmana taipa memuyutawikweitsitɨani mepɨkayɨwawe.
'Ena tɨɨ pumawe muyutaxɨriyakɨ,
meta tai 'auriena mutiyerɨni.
15Mɨpaɨ mekani'aneneni teyukewaiyamete 'ahetsiemieme
wahetsɨa pemuta'axekai,
wahamatɨa nunutsiyari paitɨ pemuyuharerutakai.
Mɨkɨ yuxexuitɨ 'axamepɨteyurie,
xewitɨ pumawe mɨwatawikweitsitɨanikɨ.
© 2020, Wycliffe Bible Translators, Inc.