Kitsariyaxi 22
22
Niuki Kerutsareme hepaɨtsita mieme
1Niuki mayeweri hepaɨtsita mieme kenemɨtiuxeiyatsitɨarie:
Hikɨta kepeyɨane,
kii heima paitɨ pepanutitɨa,
2kiekari waɨkawamekɨ 'axamɨretainetsie,
mepɨkayu'enie meta mepɨ'ietɨwe.
'Ateɨterima nixewitɨ 'ixiparakɨ pɨka'umierie
meta mepɨkahekwi'iwaxɨ mɨrayukwitɨnetsie.
3Meyunaitɨ 'ahetsɨa memanuyetei mepuyuta'unaxɨ meyunɨtɨ,
matsi mekaniutiwiyarieni
tupi mekahapaxɨawawetɨ 'akuxi.
Yunaitɨ pemuwaranutaxɨrie mekaniutiwiyarieni
mexi'akuxi meyuta'unarɨmekai.
4'Ayumieme mɨpaɨ neputayɨ: «Nexaɨtame xekeneneuhayewa,
nekanitatsuamɨkɨ netiuka'eniwatɨ.
Waɨriyarika xepɨkanetsikunɨtɨwani:
Nekiekari niweya kaniuka'unarieni».
5Ti'aitame, Yawé Naimekɨmɨtɨrɨkaɨye,
yakaniutayɨni xeitukari marika mɨtixuawerekɨ,
xeitukaritsie tixaɨtɨ temɨkate'ayeitɨarienikɨ meta temeuyuyexɨriekakɨ
mayeweri nemuxeiyatsitɨarietsie,
xeitukaritsie kuraru mɨka'unarienikɨ
meta hɨritetsie temekahiwanikɨ.
6Kaxetate yukukuyame hetsie me'utetɨ,
'Erami yu'ɨrɨ kaniuti'ɨni,
Kixi yuheima nunuwame kaniwaruxeiyatsitɨani.
7Kaxetate yukukuyame pɨhɨpɨne
mayeweri manayexeiyarietsie,
'akitenie me'utetɨ mepuyutsaipɨna.
8Kura kwieyari mɨyɨkɨhɨani pɨkayɨwe.
Mɨkɨ tukaritsie xeme xepɨyu'ɨwiyaxɨ
Paratsiyuta makukariuxaya kuyaxa timieme mɨtiyepikai.
9Xepunenierixɨ Rawiri kiekariena
waɨkawamexɨa meutahani pɨyɨwekai,
haputsu kiekari hetɨamiemetsie
haa xeputi'utaxɨ,
10Kii Kerutsareme mieme xeputi'inɨataxɨ
hipame xeputi'unaxɨ kuraru 'aixɨa xemuyurienikɨ,
11huta kuraruyari tsata xeime haputsu xeputawewi
haa mukamarekɨ haputsu meripaitɨ mieme taɨta,
peru xepɨkayu'ɨwiyaxɨ kemɨ'ane mɨtiyurienekai,
meta kemɨ'aneri meripaitɨ mɨpaɨ mutayɨkai.
12'Iya tukaritsie Ti'aitame,
Yawé Naimekɨmɨtɨrɨkaɨye,
pɨxe'utahɨawixɨ xemutitsuananikɨ xeyuhiwerietɨ,
yumu'utsie xemuyukaxinikɨ meta xemuyutihiwerienikɨ.
13Peru neuxei, temawierika puxuawe.
Wakaitsixi mepɨmawarie, muxatsi mepɨtakwikwiwa,
wai pukwaiya meta winu pɨ'iya.
«Tepɨtekwaka tepɨ'ietɨweni,
'uxa'a temɨkwinikɨri».
14Yawé Naimekɨmɨtɨrɨkaɨye mɨpaɨ kanetiniu'enitsitɨiya: «'Ikɨ 'axakememɨte'uyurikɨ hatsuaku nepɨkatiwareuyehɨwirieni kepaukake memukwini. Ne nekanaineni Ti'aitame, Yawé Naimekɨnemɨtɨrɨkaɨye».
15Ti'aitame mɨpaɨ kanaineni, Yawé Naimekɨmɨtɨrɨkaɨye: «Kenemie Tsewina hetsɨa, paratsiyu mɨhɨritɨarie, mɨpaɨ ketinetahɨawi:
16»“¿'Ena kepetiyuriene?
¿Kemɨ'ane heitserie pɨmatsi'upitɨa
'uwa teukiya pemɨti'inekɨ?
¿Titayari meutitewatsie 'a'uxipiweme petiwewiene,
ketitayari 'aitsie perewaye'ine?
17»”Neuxei tewi pemɨtɨrɨkaɨye
Yawé 'ari kameniwiyarɨmeni
metsihehɨanike metsinanaimatɨ.
18Perúta hepaɨ kametinikurupamɨkɨ,
meta kwie 'ahakuyeumetsie kameneutahɨamɨkɨ.
Mana pekanemɨmɨkɨ, manari kaniyuhayewamɨkɨ
'akaxetate witsimɨ'anenekai kuyaxa miemete.
Mati'aitɨwame kiita pekanitewiyatsitɨariemɨkɨ.
19Nekamenanakahɨamɨkɨ kepemɨtihɨritɨarietsie,
meta pemɨra'uximayatsie pekananayehɨiyamɨkɨ”.
20»'Iya tukaritsie neti'uximayatsiriwame 'Eriyakini Kirikiyaxi nu'aya nekanitahɨawimɨkɨ. 21'Akamixa 'amɨtewi nepenakatɨtɨani, 'ahɨiyamekɨ nepenahɨani, kepemɨti'aitakai mɨpaɨ nepɨtihɨritɨani. Kerutsareme kiekatari wapaapa hepaɨ 'anetɨ payani meta Kura nuiwariyari wahetsiemieme. 22Rawiri kiiya yawiyari naiparieyatsie nepayatsa, mɨkɨ tita mɨreuyepieni nixewitɨ mɨreunani pɨkayɨweni meta tita mɨkɨ mɨreunani nixewitɨ pɨkayɨweni mɨreuyepieni. 23Kutsunu hepaɨ kwiepa 'a'uweme nekanikatsunamɨkɨ, meta 'uweni 'aixɨa mɨtixeiyarie hepaɨ pɨ'aneni paapaya xiɨyarimama wahetsiemieme. 24Mɨkɨ hetsie pɨtiyeyani naitɨ 'aixɨa mɨti'ane waniwematsie: nuiwarimama neta wayɨrari, ye'ɨ 'etsimupe hetsie, tekɨxite hetsie meta ye'ɨrɨte hetsie.
25»'Iya tukaritsie ―Yawé mɨpaɨ kanaineni Naimekɨmɨtɨrɨkaɨye― kɨtsunu kanakainimɨkɨ makuweritsie muwe, kanahunariemɨkɨ nanari'ɨaritɨ kanatiwemɨkɨ, naime kemɨre'ikakai ratɨtɨ». Yawé mɨpaɨ kanaineni.
© 2020, Wycliffe Bible Translators, Inc.