Kitsariyaxi 11
11
'Itsahi yɨrariyari
1'Itsahi kutsunuyaritsie xewitɨ yɨrari kananemɨkɨ,
mɨkɨ yɨrari nanaritsie kananemɨkɨ.
2Yawé 'Iyarieya mɨkɨ hetsie kanika'uxipiemɨkɨ:
'iyari mɨtimaiwenikɨ meta meti'enatɨyeikanikɨ,
'iyari 'ɨxatsi mexeiya meta tɨrɨkariya,
'iyari waɨkawa mɨrakumate meta Yawé mayemakaxe.
3Mɨkɨ puyutemawieka Yawé 'ayemakatɨ,
kemɨtinierekɨ mɨkɨkɨ pɨkawaxanetani,
meta yapɨkatiyurieni kemɨti'enakɨ,
4matsi heitseriemekɨ 'aixɨa pɨtiyurieni memɨnanaimarie wahetsiemieme,
meta 'aixɨa pɨtiyurieni
tixaɨtɨ memɨkatehexeiya wahetsiemieme 'ena kwiepa.
Kwie pɨka'una kɨye 'iwaɨyɨpame yuteta miemekɨ,
'axatiyuruwame yu'iiyakɨ pumieni.
5Tita mɨtiheitserie hɨiyame yunaiparie manakateika pɨhɨkɨtɨni
meta yuri mɨraine hɨiyame manakuteika pɨhɨkɨtɨni.
6Yawi muxa hamatɨa 'apuyeikani,
tɨwe tsipu 'etsimupe hamatɨa pukuhuneni,
meta tsikeru temaikɨ meta maye temaikɨ yuhamatɨa mepuku'uwani,
nunutsi 'etsiyumaitɨ pɨwaku'arieneni.
7Wakaxi hutse 'ukaratsi hamatɨa pɨtitikwani,
waniwema yuhamatɨa mepukuhitɨweni,
meta maye tuuru hepaɨ 'ɨxa pɨtikwani.
8Nunutsi mɨtsitsewe kuu 'amumu'uyewa 'uaye mumɨya mexeiya
muwayekie 'aurie pɨtiwaika,
meta nunutsi yutsitsi muku'eiritsitɨarieke
kuu 'ituayatsie peukameni.
9Xewitɨ pumaweni 'axamɨwayurienikɨ meta mɨtiwakwinitɨanikɨ
nehɨri naitɨ mɨpatsie hetsie,
kwie kanitahɨnimɨkɨ
Yawé memaitɨ memakɨne mɨ'ayumiemekɨ
haramara hakɨ kemɨranatiyeuriwe hepaɨ.
10'Iya tukaritsie 'Itsahi nanarieya panukukeni
teɨteri wa'inɨari hepaɨ,
mɨkɨ hepa nuiwarite mepɨtinautsa,
meta witsi'anetɨ payani hakewa mɨkɨ metayerɨni.
11'Iya tukaritsie Yawé tawarita yumamá kaneutatseramɨkɨ
yuteɨterimama memuyuhayewatɨwe muwakuxeɨrienikɨ,
'Atsiriyatsie memuyuhayewaxɨ,
'Ekipitu, Paturutsi meta Kutsi,
'Erami, Tsinaxi meta Kamati,
meta haramara hatetsitayari 'ametetewatsie.
12Patera panuwieni nuiwarite wahetsiemieme,
'ixaheritsixi memutaweiyarie puwaxeɨrieni,
naitsarie kwiepa
Kura nuiwarimama memeutaweiyariexɨa puwakuxeɨrieni.
13'Epɨrahini 'ɨtetsarikaya pukumawere,
Kura memaye'unie mepukumaweriyarieni,
'Epɨrahini Kura tawariri pɨkatitikwatsirieni,
Kura 'Epɨrahini tawariri waɨriyarika pitɨatɨ pɨkatita'aitɨani.
14Yunaitɨ tau makayuyuipike hepatsie mepeutayune,
piritsiteutsixi wakwie mukɨatsie mepɨwatakwini,
yunaitɨ tau manatineika kiekatari mepɨtewanawatsirieni,
'Erumi meta Muhawi wahetsie mepɨteta'aita,
metatsiere 'amunitsixi mekateniwata'aitɨakuni.
15Yawé 'Ekipitu haramarayari kanikawatsiɨxamɨkɨ,
yumamá haa 'Eupɨrate hetsie kaneutatseramɨkɨ,
meta 'eka xɨkame kanikuwiwimɨkɨ,
'atahutame 'akiyari kaniuyetuamɨkɨ
mana memɨkɨnekɨ yukakaitsie me'u'utɨ.
16Teɨterimama memuyuhayewaxɨ wahetsiemieme,
'Atsiriya memuyuhayewaxɨ wahetsiemieme,
huye kanitixuawerimɨkɨ, kemɨtiɨyɨ hepaɨ 'ixaheritsixi wahetsiemieme
'Ekipitu kepauka memayekɨtsie.
Currently Selected:
Kitsariyaxi 11: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
