'Utseyaxi 9
9
'Ixaheri 'uximatɨarika kemɨtipitɨarieni
1Merikɨte 'Ixaheri, pepɨka'atemawieka,
'ixɨarari pepɨkawewieka nuiwarite wahepaɨ.
'Axapekatiniuyurieni:
'Akakaɨyari pekaniuku'eirieni.
Tɨriku tuminiyari kepaɨmeme pemukaxexeiya kakaɨyarixi pepuwayetuiriwa.
2Tɨriku meta kaxie takari pɨkatixuawere,
ni winu mɨhekwa pumaweni 'aixɨa ha'anetɨ.
3Yawé kwieyatsie xepɨka'u'uwaniri,
'Epɨrahini 'Ekipitu kanakunuamɨkɨ
meta 'Atsiriya timieme mɨkati'itiya pepɨtitikwani.
4Tawariri Yawé winu xepɨkayetuirieni,
mɨkɨri pɨka'inakeni xemawarika.
Mɨkɨ paa pɨkaxetanaki'eririeni, 'ayumieme xepɨtitsuani,
kemɨ'ane memitikwani mɨkɨ meka'itiyatɨ mepakɨne.
Haaka nunuitɨwame xeikɨa pɨhɨkɨ,
peru Yawé yutukita pɨka'inaki'erie.
5¿Kexeteyurieni 'ixɨarari matineikatsie,
yatɨni Yawé hetsiemieme waɨkawa kɨkamete xemuyukuxexeɨriwatsie?
6Tsepa xemuyuta'unaxɨ xemɨka'unarienitsie,
'ekipitutari mepɨxetiwiya, Menipitsi kiekariyaritsie mepɨxekateuku.
Witsimɨti'anene xemɨtehexeiya pɨratakɨ, mɨtiwewiyatɨka tupiriyatsata pɨtiyuhayewa,
xexamaru xuya penukanani.
7'Uximatɨarika tukariyari paye'ari,
meta tukari paye'a memɨte'ayukatuanikɨ.
'Ixaheri mɨpaɨ ketinemaika
'Ariri pɨwaɨkawa 'axakepemɨtiuyuri,
mɨixari pepɨkaheu'ena,
Kakaɨyari niukameya mɨka'uka'iyari xeikɨa pepɨxata,
tewi Kakaɨyari 'iyarieya mɨkahexeiya pɨkaheyuta'eriwa.
8Kakaɨyari meta niukameya,
'Epɨrahini mɨtaniere kanihɨkɨtɨni,
peru naitsarie huyeta pepiwiniyane,
pepitixani'eri Kakaɨyari kiitana.
9Kemɨkatiheitserie xeteyurietɨ 'ari xepakɨ,
Kiweya mɨtiuyɨ hepaɨ,
Peru Kakaɨyari pɨkaratɨmaiya waɨkawa kexemɨte'uyuri
'uximatɨarika pɨxepitɨani 'axaxemɨte'uyurikɨ.
10Mɨpaɨ kanaineni Yawé: «Kepauka 'Ixaheri nemutaxei,
makumawetsie kaxie takari nemutaxeiya hepaɨ nepuyɨ,
kepauka 'atutsima nemɨwaruxei meripai miemete,
xapa takari yɨyɨrime nemuxeiya hepaɨ nepuyɨ.
Peru mɨkɨ mepekɨ Wahari-Pehuxi kakaɨyariyari hetsɨa,
mepɨnetsi'uku'eiri, tewiyarikatsie mepuyuyetua,
'anari wahepaɨ 'axame'anenetɨ mepakɨ
menaki'eriwatɨ hepaɨna.
11'Epɨrahini kemɨrexeiyakai 'aixɨa ti'anekame, mɨkɨri kanitawimɨkɨ wiki hepaɨ kanayeyeimɨkɨ,
'anari 'aniwema mepɨkatinunuiwa meta 'ukari mepɨkatihukataxɨani.
12Tsepa tɨɨri memɨwaxeiya hipame mewawereme,
ne nepɨwarakuyeitɨani 'ena kwiepa.
Xɨa'ui kepauka mɨkɨ memɨxeku'eirieni.
13'Epɨrahini mɨpaɨ nepɨtixeiya, Tiru kwieyari hepaɨ witsimɨraku'anetsie mɨye'etsieka hepaɨ.
Peru 'Epɨrahini pɨwayetuaya yuniwema memɨkwi'iwakɨ».
14Neuxei Yawé, ¿Ketita petiwayetuirieni?
'Uka 'anuye'ikwitɨwame meta tsitsi ka'ayemaneme.
15«Kirikari mepikatsutɨa 'axameteyurietɨ,
mana nepikatsutɨa newa'uxiwe'erietɨ.
'Axameteyuriekaku,
nekiita nepɨwaranuyexɨrieni.
Ne nepɨkawatanaki'erieniri,
yunaitɨ wa'itsɨkate 'axamemɨteyuriekɨ meteyukahiwe'erietɨ.
16'Epɨrahini kaniutayɨnare:
nanari kaniutiwani takari pɨka'ukayaxixɨ.
Tsepa mutiutihukataxɨ,
nekanenuyemiemɨkɨ nunutsi tsepa witsimɨ'ane».
17Xemɨkahenu'enikɨ, 'ayumieme ne Kakaɨyari pɨkaxetanaki'erieni,
kɨkamete xepakɨne nuiwarite watsata.
Currently Selected:
'Utseyaxi 9: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
