'Utseyaxi 10
10
1'Ixaheri Kaxie takari waɨkawa meukatei hepaɨ pɨ'anekai
putixuxuawerekai witsi'anenetɨ kayunewierinɨatɨ.
Peru kepauka matsi waɨkawa mutixuxuawerekai,
matsi waɨkawa mawari taiyamete mepɨtiwewiwakai,
kepauka wakwiepa waɨkawa mɨtiutixuaweriyakai,
waɨkawa matsi tetexi patsietɨkaime witsi'anenekame mepɨtiwewiwakai.
2'Iyarieya pɨharuani,
peru yɨkɨmana katinayukatuamɨkɨ kemɨtiuyuri.
Yawé wamawari taiyamete kaniti'unamɨkɨ
meta naime tetexi mɨpatsietɨka memeyexeiyakai.
3Heiwatɨ mɨpaɨ me'utiyuani: «Yawé tepɨkahayemakaxe,
'ayumieme tati'aitɨwame tepɨkahexeiya».
Peru xɨka teheixeiyanike,
¿Ketiyurienikekai tahetsiemieme?»
4Mekatenikuxatani xeikɨa kememɨteyukuhɨawe,
yuri hepaɨ me'utiyuatɨ peru yakɨxeikɨa tɨratu mekanikuwewiwani,
'ayumieme 'axamɨ'ane xeikɨa kanixuaweni watsata
kanikaxutuweni tupiriya 'axamɨ'anene yeuta mieme hepaɨ.
5Tsamariyatari waɨkawa mekanimamaka
tsikeru Weti-'Aweni kakaɨyariyari memayexeiyakɨ.
Tsikeru teteyari memayexeiya waɨkawa mepɨyutihiwerieni,
yaxeikɨata mawari wewiwamete memɨwarayexeiya kakaɨyarixi.
Waɨkawa meyuhiwerietɨ mepɨtihiwa mɨmariwekaikɨ,
wakakaɨyari xeime kwieyaritsie manutɨkienikɨ.
6Tsikeru nanutɨkiemɨkɨ 'Atsiriya paitɨ
'imikieri hepaɨ ti'aitame mɨmariwe mekaniyetuiriekuni.
'Epɨrahini kaniyutitewiyamɨkɨ,
'Ixaheri meta kaniyutitewiyamɨkɨ yukakaɨyarixi wahetsiemieme.
7Tsamariya kiekariyari kanikumawerimɨkɨ meta ti'aitame,
kɨye 'etsipetɨ mehautsitɨarieni hepaɨ.
8Watukite 'etsimupepe kaniti'unariemɨkɨ kwiepa mieme,
hakewa 'Ixaheri 'axatiyurienetɨ matɨa.
Xuya meta tupiriya kanitiwawerimɨkɨ mawari taiyame matiwewiwakaitsie.
Hikɨ hɨri mɨpaɨ mekatenitahɨawikuni:
«Xeketananukanama», hɨrite 'etsimɨpepe:
«Tahetsie keneukaxɨri mɨtatsikwinikɨ».
9«'Ekɨ, 'Ixaheri, 'axapetiyurienetɨ pepumie
Kiweya paitɨ mɨtiyukatsutɨatsietɨtɨ,
pepɨkatihayewa 'axapetiyurienetɨ.
Kiweya kanitamieriemɨkɨ
'axamɨtiuka'iyarikɨ.
10Kepauka ne yanemɨra'eriwa, nepɨtiwakwinitɨani,
'ana nuiwarite meyukuxeɨrieme mekanitamiekuni,
mewaranutaxɨrienike waɨkawari 'axamemɨte'uyurikɨ.
11'Epɨrahini tsikeru mɨmaxiutɨarie pɨhɨkɨ,
mɨkɨ pinake tɨriku mu'uneni,
peru ne yuku nepɨka'enutitekiri.
Peru hikɨ 'Epɨrahini yuku nekananutitekiriemɨkɨ,
Kura kanitakwietsanamɨkɨ,
Kakuwu kwie 'aixɨa kaniyurimɨkɨ».
12Xekeneuka'etsa yuhetsiemieme kemɨtiheitserie,
Naki'eriya takariyari xekeneuka'itsana,
kwietsanaripa xeketene'uximayaka.
'Ari tukari paye'ari Yawé xema'eriwanikɨ,
kepaukake munuani penɨ'ani heitserie mɨtiyupitɨwa wiyeriyari.
13Peru xeme 'axamɨti'ane xepuka'e, 'ayumieme mɨkatiheitserie xepɨka'itsana,
'itarika takariyari xekaniutikwani,
wakaxetatetsie xemeuwawaɨrekaikɨ
meta wakuyaxi memɨyumɨirekaikɨ.
14Kuyaxa payani tɨranari kemɨtiutayuane pɨti'eniɨriɨkɨni,
kememɨteyuku'awietatɨka naitɨ pɨtiti'unarieni,
kemɨtiuyuri Tsarimani Weti-'Axiweri kuyaxa matɨatsie,
kepauka wamamama memutixitekie
meta tɨɨri yunaitɨ.
15'Ikɨ Weteri kiekatari mɨyamekanixe'uyurieni,
'axaxemɨteyuriekɨ kwinimieme.
'Ixaheri kwieyaritsie ti'aitame kanimieriemɨkɨ yuheyemekɨ
'amɨtikataretsie.
Currently Selected:
'Utseyaxi 10: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
