Hepɨrayutsixi 1

Kakaɨyari pɨtatiutaxatɨa nu'aya yatikuxatakaku

1Kakaɨyari, meripaitɨ katiniwakuxaxatɨwakaitɨni tapaapama, Kakaɨyari niukametemama yametekuxatakaku, yuxexuitɨ kememɨte'upitɨarie niuki yɨkɨ mɨ'anene hepaɨtsita. 2Hikɨ tukari taparirɨmekaku pɨtatiutaxatɨa tame, kemɨ'ane nu'aya mɨhɨkɨ pɨta yatikuxatakaku. Mɨkɨ yuniwe kaniukayeni hetsiena mɨtinakenikɨ naitɨ, mɨkɨ hetsie Kakaɨyari tita 'amɨtikuma katiniunetɨani. 3Mɨkɨ hetsie Kakaɨyari kemɨtixawatɨ kanimatsiɨkɨni meta kemɨtimariwe, Kakaɨyari kani'inɨarieyatɨni kaniyuritɨni. Naime meta pɨratɨkɨ yuniuki mɨtɨrɨkaɨyekɨ, mɨkɨ yɨkɨmana 'aixɨa 'iyurieka tita 'axatemɨte'uyuri hepaɨtsita mɨtatsi'itienikɨ, 'ana kemɨ'ane mɨmariwe tserieta kanayerɨni muyuawitsie.

Nu'aya pumariwe, niuki tuayamete taheima miemete hepaɨna mekamamariwawekaku

4Mɨkɨ kaniupitɨarieni yemekɨ mɨmariwanikɨ kemɨ'ane mɨhɨkɨ, peru taheima miemete niuki tuayamete hepaɨna mepɨkate'upitɨarie, yaxeikɨata mariwetɨ kanayani, mɨkɨ hepaɨna mekamamariwawekaku.

5¿Kakaɨyari kemɨ'ane mɨpaɨ pɨtiutahɨawixɨ niuki tuayamete xeime heiwa:

«'Ekɨ pepɨneniwe,

hikɨri nekamaniutinuiwitɨani»,

'utaitɨ, nutsu keri 'utayɨ:

«Ne 'ukiyarieya nepayani,

mɨkɨ neniwe payani»?

6Matsi tukari hepaɨtsita tikuxatatɨ kepauka kwiepa mi'atɨani yumatɨari mɨpaɨ pɨta kanaineni:

«Yunaitɨ Kakaɨyari hetsɨa miemete niuki tuayamete meke'eyexeiyani».

7Niuki tuayamete wahepaɨtsita mɨpaɨ paine:

«Yuniuki tuayamete 'eka kaniwarayeitɨwani,

te'i'uximayatsiriwamete meta tai nerɨkwari kaniwarayeitɨwani».

8Yuniwe pɨta xatatɨ mɨpaɨ paine:

«'Ekɨ, Kakaɨyari, 'a'uweni hakewa pemɨra'aita yuheyemekɨ 'apuwe,

kanixeuraɨyeni 'a'itsɨ pemakwe'e pemɨti'aitamekɨ 'inɨari kanihɨkɨtɨni heitseriemekɨ kepemɨtikamie 'ekɨ.

9Pepinaki'erie tita mɨtiheitserie, pepi'uxiwe'erie tita 'aitsika mɨtititsana,

Kakaɨyari 'aku kemɨ'ane mɨ'akakaɨyari pɨmatsi'anayexei, temawierika metsipitɨatɨ,

'inɨaritɨme 'ahamikuma kawaranayexeiyaka».

10Mɨpaɨ paineta:

«'Ekɨ, Ti'aitame, tsutɨapai kwie pepukama,

muyuawi peputawewi 'amamakɨ.

11Mɨkɨ pukumawere, 'ekɨ pɨta 'apeniuwemɨkɨ.

'Ixuriki hepaɨ mɨkɨ naitɨ kanitaye'irimɨkɨ.

12Muyuawi pepɨtatuna 'ɨkari hepaɨ,

kamixa hepaɨ pɨpatsieni,

matsi 'ekɨ yaxeikɨa pe'anetɨ pepɨ'ahayewa,

'atukari pɨkatixɨni».

13¿Keri hatsuaku titahɨawiwe niuki tuayamete xeime mɨpaɨ tikɨhɨawetɨ:

«Netserieta kenayexi,

ne nekaniwaka'unamɨkɨ memɨmetsi'aye'unie,

'ahɨxie nekaniwa'atɨamɨkɨ»?

14¿Kamɨtsɨ niuki tuayamete yunaitɨ 'iyarite mekatehɨkɨ, Kakaɨyari memɨte'uximayatsiriwamete, memɨtanɨ'ariwa memɨwaparewienikɨ kemɨ'ane wahetsie mɨtinakirɨme memɨtawikweitsitɨarienikɨ?

Currently Selected:

Hepɨrayutsixi 1: hch

Highlight

Copy

Compare