'Etsekieri 24
24
Xari mɨkwana
1Hikɨ tamamata tukari 'umiekaku meta tamamata metseriyaritsie yaxeikɨa 'atanauka wiyaritsie, Yawé yuniuki kaneniutaxatɨani: 2«Tewi pemunu'aya, 'ikɨ tukariyari kenaka'utɨa, 'ikɨ tukariyaritsie kwitɨwa, karikɨ Wawiruniya kwieyaritsie ti'aitame hikɨ 'ari kanayeyani Kerutsareme hepaɨtsita. 3'Ikɨ teɨteri 'axamemɨteyurie 'inɨarikɨ ketiniwarutaxatɨa, keniwarayemari'itɨa Yawé naimekɨmɨyɨwe mɨpaɨ kanaineni:
»“Taipa xari keneuyetsa
meta haa keneukatuaka.
4Wai 'etsipepekame keneukanɨitɨa,
Teuri keneutiwiteki meta kutsuri,
meta 'umete 'aixɨa mɨ'anene.
5Muxa meta keneumi'a waɨkawa mɨwaiya,
meta kɨyexi kenanutanetɨa hetɨana,
para haa 'aixɨa mɨtikwanakɨ,
meta 'umeyarieya 'aixɨa mɨtikwanikɨ.
6»”Yawé naimekɨmɨyɨwe mɨpaɨ kanaineni:
»”Xuriya kiekaritsie waɨkawa kanixuaweni.
Mɨkɨ xari pewayukukwitama,
mɨpaɨ mɨ'anene pɨkayɨwe muwaku'itienikɨ.
Kenewatitɨki wai xexuime 'etsipepeme,
tsepa ke'anenetɨ mɨwatitɨkirixɨ.
7Kiekari hixɨapa katini'aneneni, xuriya mɨhɨne,
mɨkɨ tete mɨharuanitsie kaneiyeurieni,
kwiepa pɨka'itayeuri,
tumuanari mɨkahenukananikɨ.
8Tete mɨharuanitsie xuriyaya nekaniutayeurieni,
kwiepa mɨka'anukayuyuipikenikɨ.
Mɨpaɨ nekatiniyuriemɨkɨ nehaxɨakɨ,
nekaneixeiyakamɨkɨ kenemɨtiyurieni.
9»”Yawé naimekɨmɨyɨwe mɨpaɨ kanaineni:
»”Xɨa'ui kiekari waɨkawa mɨrayukwitɨne,
Neta tsiere kɨyexi nepukuxeɨrieni.
10Hikɨmɨtɨka, kɨyexi 'axɨa xeketeneutuaka xekeneutitaiya,
Wai xekeneuka'itsarita meta tupiriya 'aixɨa meyuruwa xekeneukanɨitɨa,
meta 'umeyarieya naitɨ ke'utitani.
11Xari tɨɨtsie xekenayetsa 'uyewakime,
xɨkake purunitse mɨxeta 'uhekɨare xɨkatɨ.
Kemɨtiwayukukwitama mɨkɨ pɨwaku'itiere,
yukɨmana 'aixɨa pɨtayɨni.
12Tsepanetɨ xari mɨwayukukwitama,
tsepa taikɨ 'aixɨa mɨwakɨyɨni pɨkayɨwe.
13»”Kerutsareme, ne nepɨmatsi'itimɨkɨkai 'aixɨa nematsiyurimɨkɨkai, ke'axapemɨtiyurienekai 'ahiwe'erikakɨ, peru pepɨka'uyutawaɨri 'aixɨa nematsiyurienikɨ. 'Ayumiemeri, peka'itiyatɨ pekanayeimɨkɨ, 'atsitake petikwineme nehaxɨakɨ. 14Ne, Yawé mɨpaɨ nekanaineni, meta nekaneye'atɨamɨkɨ. Nekɨmana yanekatiniyurimɨkɨ, neka'ipatatɨ. Nepɨkamatsitinenimayata 'axakepemɨtiyuriene kemɨmatinake meta kepemɨtiuyeika. Yawé naimekɨmɨyɨwe mɨpaɨ nekanaineni”».
'Etsekieri 'ɨyaya kemɨtiumɨ
15Yawé mɨpaɨ kanetiniutaxatɨani: 16«Tewi pemunu'aya, 'a'ɨya nekamaninawairiemɨkɨ 'atsipekatimaikaku mɨmatsinake pemixeiyanikɨ. Peru pepɨkahatsuakani nimeta pepɨka'ahiwerieka, pepɨka'ipitɨaka meta 'a'ukai manayeneikani. 17Ketineunewi xeikɨa kayuwatɨ, pepɨka'ahiwerieka mɨkite wahetsiemieme. 'Amu'utsie kenayuhɨa tuwaxakɨ, 'akakaitsie keneukexɨa, meta 'amɨxiya pɨkamatsiheukunaka meta paa pepɨkakwaka hiwerikapa mieme».
18Ximeri nekatiniwaretaxatɨani teɨteri, peru taikai ne'ɨya kanemɨni. 'Uxa'arieka yanekatinekayani kemɨnetiu'aitɨa. 19Teɨteri kiekatari mekaneneta'iwawiya: «¿Kamɨtsɨ pekatatitaxatɨani ketita mɨti'inɨariyari, 'ikɨ 'inɨari titahetsiemieme yapemɨtiyuriene?» 20Ne mɨpaɨ netiwareta'ei: «Yawé neretaxatɨaka yuniukikɨ mɨpaɨ pɨneretahɨawixɨ, 21keniwaraye'eritɨa 'Ixaheri teɨterimama, Yawé naimekɨmɨyɨwe mɨpaɨ kanaineni: “Ne netuki kapatsiekame nekanayeitɨamɨkɨ, tuki xexeiyatɨ xepauyɨ'ɨ witsixepɨte'ixeiya, waɨkawa xeminaki'erie. Xeniwema 'ukitsi meta 'ukari xemɨwaruku'eiri, 'ixiparakɨ mekanikwi'iwakuni, 22xemeta yaxeikɨa xekateniyurikuni nehepaɨ, mɨxiya xepɨka'anuku'eima meta paa hiwerikapa mieme xepɨkatikwani. 23Tuwaxakɨ yumu'utsie xekenayuhɨaxɨa, meta yukakaitsie xepeu'uixuani. Hawaikɨ xeka'utitsuatɨ xekayuhiwerietɨ, matsi pɨta xekanitipɨnikuni 'axamɨti'anekɨ xete'uka'eniwatɨ hipatɨta xehamatɨa. 24'Etsekieri matsi kani'inɨaritɨkamɨkɨ, xemeta yaxeikɨa xepɨteyurieni mɨkɨ mɨtiuyuri hepaɨ. Kepauka mɨpaɨ mɨtiyɨni, 'ana mɨpaɨ xekatenetimaikuni ne Yawé naimekɨmɨyɨwe nemɨhɨkɨ”.
25»'Ekɨ tewi pemunu'aya, tukari maye'anitsie tuki nemɨwanawairienitsie muwanake memixeiyanikɨ, yu'iyaritsie ketita memɨtehiwe'erie, ketitatsie memɨteuyɨ'ɨ, wananai meta watemawierika, meta waniwema 'ukitsi 'ukari, 26xewitɨ yu'uname kamatinitaxatɨamɨkɨ kemɨreyɨ. 27Mɨkɨ tukaritsie kwitɨ 'anení pukuyuani peniuwetɨ pepayani. Hikɨ 'anari pepɨtitaxata yu'uname hamatɨa, 'inɨari pepayani wahetsiemieme, hikɨ mɨpaɨ mepɨtehetimani ne, Yawé nemɨhɨkɨkɨ».
Currently Selected:
'Etsekieri 24: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
