'Etsekieri 19
19
Hiwerika 'Ixaheri kwieyaritsie memanuyetei wahetsiemieme
1»'Ikɨ hiwerika 'Ixaheri kwieyaritsie memanuyetei keniwarutaxatɨa:
2»“Mayetsi wahixɨapa,
'amaama maye 'ukaratsi pɨhɨkɨtɨkai.
Mayetsi 'etsi mepepeme watsata pukatei,
yuniwema pɨwatsitsitɨakai.
3Mɨkɨ xeime putaweriyaxɨ,
mɨkɨ maye mayu'eriya patɨa
pɨretima kemɨtiuhupa mɨtiwiyakɨ tita mɨtitakwani
meta teɨteri wakwaiwetɨ patɨa.
4Nuiwarite mepitamari,
mepiwiniyaxɨ putsuta 'uyewakikaku,
mepeiha 'Ekipitu me'iwiwitɨatɨ tepɨakɨ.
5Kepauka maamaya maye 'ukaratsi,
yuniwe takwewietɨ muyutatexi,
xeimeta kananayexeiya,
kwinie rayu'eriyame matsi kanayeitɨani.
6Kepauka 'ikɨ maye mutatɨrɨkaxɨa,
mayetsi wahamatɨa kaniuyeikakaitɨni 'uyuta'ɨretɨ.
Pɨretima kemɨtiuhupa mɨtiwiyakɨ tita mɨtitakwani,
meta teɨteri wakwa'atɨ kanayani.
7Paratsiyute puka'unaxɨa,
kiekarite kiɨripa payeitɨwakai,
pɨwamariutakai yutsuarikɨ
yunaime kwiepa kiekatari.
8Hipatɨ nuiwarite 'auriena kiekatari
mekaniyuti'uitɨani me'imienike.
Mekaniwiniya,
putsuta kaneukaweni.
9Tepɨakɨ hɨatɨ meta tepɨa kiiyarita 'ayewetɨ,
kanehanieni ti'aitame Wawiruniya kiekame hetsɨa.
Tepɨata 'ayewetɨ kanehanieni,
tsuarieya mɨkahayu'eniɨriɨkɨnikɨ
'Ixaheri hɨriyaritsie.
10»”Kaxie haraweriyari mayema wahixɨapa,
kaxie nanari 'amaama pɨhɨkɨtɨkai
haa manuyehane 'aurie 'etsietɨ:
waɨkawa 'ukaxuxuaweretɨ meta waɨkawa yɨratɨ,
haa waɨkawa muxuawekaikɨ.
11Mamateya waɨkawa putiwawerixɨ,
pɨyɨwekai te'aitamete wa'itsɨ mayanikɨ.
Waɨkawa putawerixɨ hipame pɨwara'iwakai
yukɨtsimeyarikɨ.
'Ateewa paitɨ puyuxeiyanɨakai 'amutewikaikɨ
meta waɨkawa mɨyɨrakaikɨ.
12Peru kanahunarieni haxɨakɨ,
kwiepa kanatihɨiyani.
'Eka tau manatineika mieme pitiwatsiɨxaxɨ,
teɨteri 'ikwaxi meukatekai mepukamuraxɨ.
Putiwa mamateya 'amɨpapa,
meta taikɨ putixɨtsitɨarie.
13Hikɨri makumawetsie puyuhayewaxɨ,
kwie mɨwakitsie 'etsietɨ.
14Xeime mamayatsie tai kananeni,
mɨkɨ tai 'ikwaxiyari kaniutixɨtsitɨani.
Nitixaɨtɨ pɨkatiyuhayewaxɨ mamateya 'amɨpapa,
'aixɨa mɨ'anenekai te'aitamete wa'itsɨ mɨtiwewierekekai”.
'Ikɨ hiwerika kwikariyari kanihɨkɨtɨni, kehepaɨ manuyɨne mɨpaɨ xeikɨa ketinɨawarieka».
Currently Selected:
'Etsekieri 19: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
