Memeyekɨ 19
19
'Ixaheritsixi Tsinahi kememɨte'u'axɨa
1'Ixaheritsixi mekaniu'axɨani makumawe Tsinahi mɨrakutewatsie, haika metseri 'anukamiekaku 'Ekipitu kepauka memɨyekɨ. 2Kepauka Xepirini memɨyekɨ, mɨkɨ kwieyaritsie mepeutahaxɨa Tsinahi makumawetsie, mana mekanikuyaxe hɨri hɨxie, 3mɨkɨ hɨritsie Muitsexi kanitiyune Kakaɨyari hamatɨa mɨretaxatakɨ. Mana Yawé, mɨpaɨ katinitahɨawe:
«Mɨpaɨ ketiniwarutahɨawi Kakuwu tɨɨriyamama,
yaxeikɨata 'Ixaheri nuiwarimama:
4“Xeme xemunenierixɨ xepɨhɨkɨ kenemɨtiuyuri 'Ekipitu,
meta nehetsɨa kenemɨtixe'atɨa
werika 'anayatsie xe'atetɨ xemu'axɨani hepaɨ.
5Xɨka hikɨ xeme naimekɨ yaxetekakɨne,
netɨratu xɨka xehaye'atɨani,
neteɨterima xepɨhɨkɨtɨni
yunaime nuiwarite kwiepa memɨtama wahɨxie.
Tsepa naitɨ kwie nehetsɨa mɨmieme,
6xeme nehetsiemieme mawari wewiwamete nehetsɨa miemete xepɨhɨkɨtɨni,
meta nuiwari xemɨpatsie”.
»Naime 'ikɨ 'ixaheritsixi ketiniwarutaxatɨa».
7Hikɨ Muitsexi 'ukateka kaniwarukuxeɨrieni wa'ukiyarima naime tiwataxatɨanike Yawé kemɨrehɨawekai, 8meta mɨkɨ yunaitɨ mɨpaɨ mekaniutiyuani: «Yatepɨtekakɨne naimetsie Yawé kemɨtatita'aitɨani».
Hikɨ Muitsexi kaneyani Yawé katinetaxatɨani kememutiyua teɨteri, 9hikɨ Yawé mɨpaɨ katinitahɨawe:
—Ne 'ahetsɨa nepɨnehekɨata haiwitɨritsie ka'anuyehekɨakametsie, nepɨmatsitahɨawe 'ixaheritsixi memɨnetsi'enienikɨ, yuri memɨmate'eririekakɨ yuheyemekɨ.
Muitsexi Yawé yakatiniutahɨawe teɨteri kememaitɨkatei, 10hikɨ Yawé mɨpaɨ katinitahɨawe:
—Kenemie mepatsiekame keniwarayeitɨa 'ixaheritsixi hikɨ meta 'uxa'a. Mɨpaɨ ketiniwaretahɨawi mekeheyuti'ekwa, 11hairieka tukaritsie mekeheha'aritsieka, 'ana mɨkɨ tukaritsie nepɨnehekɨata Tsinahi yemuriyaritsie nepɨkateni yunaitɨ teɨteri menetsixeiyakaku. 12'Inɨari kuraruyari kenateka hɨri warie mana 'ixaheritsixi memɨka'utikɨkanikɨ. Mɨpaɨ ketiniwarutahɨawi xewitɨ pɨka'anɨtiyeikani hɨritsiepai meta yu'ɨka tapa miemekɨ mana pɨkaheutakekani, meta kemɨ'ane mimayɨani kanimɨmɨkɨ. 13Tsepa mɨtewi yatsepa tewatsiekame mɨyɨane, kanimɨmɨkɨ. Kemɨ'ane mimayɨani, kanimieriemɨkɨ tetexikɨ yatɨni 'ɨrɨtekɨ. Kepaukake kuxineta metayuani karima 'anake mepɨyɨwaweni.
14Hikɨ Muitsexi kaniukateni hɨritsie 'akaneka, mepatsiekame 'ixaheritsixi kaniwarayeitɨani, mɨkɨta mekaniyuti'ekwa. 15Mɨpaɨta Muitsexi katiniwarutahɨawe: «Xekeneyukuha'aritɨa hairieka tukaritsie miemekɨ, yu'ɨitama xepɨkawakumaɨwani».
16Hairieka tukaritsie ximeri tɨranari kaneyuani muyuawitsie meta merɨkariya, hikɨ mana hɨritsie panukate haiwitɨri ka'anuyehekɨakametsie. Meta kuxineta karima kanetayuani naitsarie 'ixaheritsixi memakutei putayuanekai. 17Hikɨ Muitsexi 'ixaheritsixi kaniwarayewitɨni Kakaɨyari memanunakekɨ, mɨkɨ Tsinahi yemuriyaritɨa mekaniti'uni. 18Hɨri pɨkahekɨakai kɨtsikɨ, Yawé mɨkɨtsie muyeikakaikɨ taitsie yewetɨ. Pɨwaɨkawakai kɨtsi hɨritsie metineikakai, teka hepaɨ pɨtiyuxexeiyakai, meta naitɨ hɨri karima putayuanekai, 19meta kuxineta matsi karima peyuatɨyeikakai. Hikɨ Muitsexi kaniutaniuni, Kakaɨyari meta kanita'eiya tɨranarikɨ.
20Yawé kananukateni Tsinahi hɨriyaritsie 'amanutitewitsie paitɨ, mana Muitsexi kaniutahɨawe manutiyanikɨ. Kepauka Muitsexi hɨritsie mana mutine, 21Yawé mɨpaɨ katinitahɨawe:
—Kenanukayaka 'ixaheritsixi keniwareta'imaiya kuraru 'inɨariyari manuyeka mepɨka'anayekɨkani menetsixeiyakutɨ, kapa yumɨiretɨ me'ukwinikɨ. 22Yaxeikɨata mawari wewiwamete hurawa xɨka me'ukɨne mekepatsieka, xɨka mɨpaɨ meka'aneneni, ne nekaniwakwimɨkɨ.
23Muitsexi Yawé mɨpaɨ katiniutahɨawe:
—Teɨteri mepɨkayɨwawe memanutikɨnekɨ 'ikɨ hɨri Tsinahi hetsie paitɨ, 'ekɨtsɨ 'ari pekatanayehɨtɨani, mɨpaɨ pepɨnetiutahɨawixɨ: “Kuraru 'inɨariyari kenateka hɨriwarie, meta nehetsɨa mieme patsiekame kenayeitɨa”.
24Yawé mɨpaɨ katinita'eiya:
—Keneukayaka 'Aruni keneta'ini 'ahamatɨa matiyanikɨ. Peru pɨkayɨweni mawari wewiwamete meta teɨteri mematikɨnekɨ 'enapaitɨ nehetsɨa, xɨka mɨpaɨ me'uyɨni, mekanikwikuni.
25Hikɨ Muitsexi 'uye'aka 'ixaheritsixi yaxeikɨata katiniwarutahɨawe.
Currently Selected:
Memeyekɨ 19: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
