'Amuxi 8
8
Naurieka kemɨtiunierixɨ meta mari'itɨarika
1Yawé naimekɨmɨyɨwe kaneniuxeitsitɨanita xeitsikɨiwitiyari 'ikwaxi kwakwaxime, 2hikɨ mɨpaɨ kanetiniuta'iwawiya:
―¿'Amuxi, tita petixeiya?
Ne mɨpaɨ nekatinita'eiya:
―Xei tsikɨiwitiyari 'ikwaxi kwakwaxime.
Hikɨ Yawé mɨpaɨ kanetiniutahɨawe:
―'Ari kanaye'ani 'Ixaheri makaweni 'ikwaxi mukwaxi makaweni hepaɨ, tawariri nepɨkareiyehɨwirieni.
3»Yawé naimekɨmɨyɨwe mɨpaɨ kanaineni:
―'Iya tukaritsie, kwikari paratsiyuta mieme hiwerika kwikariyari kanayeimɨkɨ. Yuwaɨkawatɨ mepɨkwini naitsarie mɨkite mepeutiheni. 'Ayumieme kayuwatɨ».
4'Ikɨ xekeneu'eni, xeme memɨteheuyehɨwa xemɨwatiketsina
meta haweri memɨ'anene xemɨwakuya 'ena kwiepa.
5Xeme mɨpaɨ xekaniutiyuaneni:
«¿Kepaukari payeika metseri mɨhekwa 'ixɨarariyari
'iku 'uriyari temutuanikɨ,
yatɨni, kepaukari 'uxipiya tukari paye'ani
tɨriku temutuanikɨ?»
Xeme xepiwautɨwe
'inɨari 'etsipeme xemeyeitɨanikɨ
meta matsi 'amɨraye'akakɨ,
tepɨa ti'inɨnɨatame tinawayame xemayeitɨakɨ
6meta tɨriku meuyewexime xemutuakɨ,
xepɨwanane teɨteri haweri memɨyɨa,
meta memɨteheuyehɨwa, kakai xeiparitsikɨ xepɨtewapatsirie.
7Yawé kaniyuhɨritɨani Kakuwu kemɨtiyuta'ɨrixɨkɨ: «Ne nepɨkaratɨmaiya kexemɨte'uyuri.
8»'Ikɨ naimekɨ kwie kaniwatayuamɨkɨ.
Mana kiekatari mekanitinutuixiekuni.
Kwie kanitiyeimɨkɨ Niru hayari hepaɨ,
kaniwatayuamɨkɨ meta kanikayeimɨkɨ,
'Ekipitu hatɨayari hepaɨ.
9»Yawé naimekɨmɨyɨwe mɨpaɨ kanaineni: 'Iya tukaritsie,
»tuka tau nepanukayunitɨani,
meta naitsarie kwiepa kanikuyɨrimɨkɨ.
10Memɨte'ayexeiya wa'ixɨarari hiwerika payani,
meta wanɨawari hiwerika kwikariyari nekanayeitɨamɨkɨ.
Nutuixiya kamixayari nekaniwaranakatɨtɨamɨkɨ
meta wakɨpate nekanikaximɨkɨ.
Kemɨtiyuhiwerieka raniwe muyuxewi tiumɨyu mɨpaɨ mekatenitsuakuni,
'imatɨrieka ratsiwitɨ pɨrayani.
11»Yawé naimekɨmɨyɨwe mɨpaɨ kanaineni: Tukari kanaye'amɨkɨ,
kepauka 'ikɨ kwieyaritsie haakaxa nemanɨ'ani,
matsi paa haakaxayari pɨka'ayani meta hariya,
Yawé niukieya mepɨ'eniekuni matsi
pukumawere mɨkɨ haakaxayari pɨtixuawere.
12Teɨteri mepeu'uwani xeime haramaratsie xeimetsieta,
mepeu'uwani xeikɨa tayeta meta tau manatineika hepatsie,
Yawé niukieya mekuwautɨwetɨ,
peru mepɨka'itaxeiya.
13»Mɨkɨ tukaritsie hariyakɨ mepɨ'amɨxɨani
'ukari witsimemɨte'ɨimarixi meta temari memɨtɨrɨkawi.
14Meta mepatixɨrieni yuheyemekɨ
'iya Tsamariya kakaɨyariximama wahetsɨa memɨyuhɨritɨa,
meta mɨpaɨ me'utiyuatɨ: “Rani kakaɨyariximama, me'ayeneniereme memɨwa'erie.
Meta Weritsewa kakaɨyariximama pemɨwarayexeiya”».
Currently Selected:
'Amuxi 8: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
