'Amuxi 2
2
1Yawé mɨpaɨ kanaineni:
«Muhawi ke'axamɨtiuyuri waɨkawa katiniuyurieni,
'ayumieme nepɨkareiyehɨwirieni:
'Erumi kwieyaritsie ti'aitame 'umeteya memutitaiyaxɨkɨ,
naxi memeyeitɨakɨ,
2tai nekananunɨ'amɨkɨ Muhawi hetsie
Keriuti kiekariyari 'aixɨa mɨ'ane mɨtaxɨtsitɨanikɨ,
'ana Muhawi kanimɨmɨkɨ waɨkawa tɨranariyatsata
meta me'utihiwakaku yukukuyamete meta kuxineta hayuanekaku.
3Ti'aitame wahetsɨa mieme nekanikumaweriyamɨkɨ,
meta yunaitɨ memiparewie nepɨwakwini»,
Yawé mɨpaɨ kanaineni.
4Yawé mɨpaɨ paine:
«Kura ke'axamɨtiuyuri waɨkawa katiniuyurieni,
'ayumieme nepɨkareiyehɨwirieni:
Mɨkɨ yu'itarikatsie metewitɨ mepeuyexɨri,
kememɨte'uyuri watutsima,
mepiku'eiri Yawé 'aitsikaya
mepɨkaheye'atɨa kemɨtiu'aitaxɨ.
5'Ayumieme tai nepanunɨ'ani Kura hetsie,
Kerutsareme kuraruya 'aixɨa mɨ'ane mɨtaxɨtsitɨanikɨ».
'Ixaheritsie ke'axamemɨte'anuyekɨne
6Yawé mɨpaɨ kanaineni:
«'Ixaheritsixi waɨkawa 'axakememɨte'uyurikɨ,
'ayumieme, nepɨkatiwareuyehɨwirieni.
Teɨteri 'aixɨa memɨte'u'iyari mepɨwatua tuminikɨ,
tixaɨtɨ memɨkatehexeiya, kakai xeiparitsikɨ mepɨtepata.
7Haweri memɨyɨa wamu'utsie mepa'uwe
kwie tumuanariyari memɨhɨkɨtɨni hepaɨ,
meta memɨteheuyehɨwa wahuye mepɨyeitɨa.
Paapaya meta nu'aya xeime xeikɨa 'ukaratsi hamatɨa mepukahipite,
mɨpaɨ meteyurietɨ kenemɨtipatsie nekapatsiekame mepɨnetsi'ayeitɨwa.
8Tsepa kemɨ'ane mawari taiyame 'aurie
mepahipite, 'ixuriki tixaɨtɨ mɨkarexeiya miku'eiri mɨtiupataxɨ mɨkɨ hetsie mekanahipiteni,
meta winukɨ hipame mewarutiwiyaka memɨte'akapitɨariekɨ
Kakaɨyari tukita kɨmana mekani'ieka.
9»Mɨya mekateniyurieka, tsepanetɨ wahetsiemieme
'amuxeutsixi nemɨtiwaruka'unaxɨ,
wa'ikwaxi nekaniukawani wapaitɨ
meta wananari nekanatekixɨani wahetɨa,
tsepanetɨ 'amemutɨkai kariuxa hepaɨ
meta tsepa memɨtɨrɨkawikai xiu hepaɨ.
10»Ne 'Ekipitu nekanixe'ayewitɨni,
meta nekaniwaruwitɨximekaitɨni huta tewiyari wiyari makumawetsie,
'amuxeutsixi wakwiepa nemɨye'anikɨ xehetsiemieme.
11Meta nekaniwarunetɨani Kakaɨyari niukametemama xeniwema watsata
metatsiere 'aitsika memuyuhɨritɨa temari watsata.
¿'Ixaheritsixi 'aku, mɨpaɨ katiɨyɨ?
Yawé mɨpaɨ kanaineni.
12Peru xeme winu xepɨwaranu'itɨaxɨa 'aitsika memuyɨhɨritɨa
meta Kakaɨyari niukametemama xepɨkawarupitɨa nehetsiemieme memɨtehekɨatanikɨ.
13»'Aixɨa kani'aneni, hikɨri ne 'ari nekanixetipɨnarɨmeni,
kemɨtiyupɨna kaxeta tɨriku 'atɨtɨ.
14Hikɨ xewitɨ muyuta'una pɨkayɨweni kwinimieme mɨranautsawe,
meta mɨtɨrɨkaɨye tɨrɨkariyaya hawaikɨ pɨkarenake,
meta kwinimieme mɨreuyutamieme yutukari pɨkatawikweitsitɨani.
15'Ɨrɨkɨ kwinimieme mɨreutamɨiwe pɨkayuta'una,
meta kwinimieme mɨranautsawe pɨkatawikweni,
meta kawayutsie meutayerɨwe pɨkayuta'una.
16'Iya tukaritsie matsi tixaɨtɨ karapitɨ kaniyuta'unamɨkɨ,
tsepanetɨ kuya kwinimieme mɨreuyutamiewe»,
Yawé mɨpaɨ kanaineni.
Currently Selected:
'Amuxi 2: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
