2 Te'aitamete 9
9
Kehú 'Ixaheritsie ti'aitame mayanikɨ kemɨranayexeiyarie
1Merikɨtsɨ heiwa Kakaɨyari niukameya 'Eritseu xeime Kakaɨyari niukameya kaniuta'inieni, mɨpaɨ katinitahɨawe: «'Aixɨa keni'akuyuri yatewa pemɨmiekɨ. Ka'i 'ikɨ puteyu huriwa hatseitiyari mayema, kenemie Xamuti Karaha kwieyaritsie. 2Kepauka mana pemeta'ani, Kehú mɨtitewa kenetiwawa Kutsapati nu'aya Nimitsi teukarieya. Hetsɨana keneye'axi tsepa hakewa mekani, kenanaye'ini xɨka hipame wahamatɨa hekani, kenanuwitɨki kiita paitɨ. 3Hikɨ muwa huriwa hatseitiyari pehewatihaname kɨmana mu'uyatsie kenekawiri meta mɨpaɨ ketinetahɨawi: “Yawé mɨpaɨ kanaineni: ‘Hikɨ nekamenanayexeiya 'Ixaheri kwieyaritsie ti'aitame pemayanikɨ’ ”. Hikɨ 'ana kwitɨwa kitenie pereuyepieme kene'ata'una, kenamie pekahewakekatɨ».
4Hikɨ kanayeyani temaikɨ Kakaɨyari niukameya kaneyani Xamuti Karaha kwieyaritsie paitɨ. 5Kepauka munua mana, kaniwarutaxeiya meyuxeɨriekame kuyaxi wa'ukiyarima, mɨpaɨ katiniwarutahɨawe:
—Ne kuyaxi wa'ukiyari nepɨtikuxatɨane.
Kehú mɨpaɨ katinita'iwawiya:
—¿Kemɨ'ane yemekɨ pepɨtikuxatɨane tame?
Kakaɨyari niukameya mɨpaɨ kaniutayɨni:
—'Ekɨ yemekɨ, kuyaxi wa'ukiyari.
6Kehu 'anukukeka kaneyani yukiita paitɨ. Hikɨ Kakaɨyari niukameya muwapaitɨ hatseitikɨ kaneika'ɨya, meta mɨpaɨ kaniutayɨni:
«Yawé mɨpaɨ kanaineni, 'Ixaheri Kakaɨyarieya: “Hikɨ temeniuka'ɨya 'Ixaheri kiekariyaritsie pemɨtita'aitakɨ. 7'Ekɨ pekaniwaka'unamɨkɨ 'Akawi tɨɨriyamama, mɨpaɨ mekatenayukatuakuni Kakaɨyari niukametemama wahetsiemieme. Ketsaweri xetekwinitɨatɨ, nete'uximayatsiriwamete wahetsiemieme. 8Yunaitɨ 'Akawi tɨɨriyamama mekanakumawerikuni yunaime 'Ixaheri nuiwarimama manuniere memɨtama nekaniwareuyehɨamɨkɨ, waɨriyarika ti'uximayatame meta memɨxɨxɨni. 9Yaxeikɨa nekaniwayurimɨkɨ, hipame nemɨwaruyuri hepaɨ Keruwuhani niwemama Nawati nu'aya, yaxeikɨa Watsaha niwemama 'Ahiyaxi nu'aya. 10Ketsaweri hetsiemiemeta, tsɨikɨri mekanitakwaikuni Ketsireri maku'etsatsie meta xewitɨ mɨkɨ pɨka'ikateuku”».
Hikɨ reuyepieka kitenie Kakaɨyari niukameya kaniyuta'una. 11Kepauka Kehú mɨwayetɨa yu'iwama kuyaxi wa'ukiyarima wahetsɨa nuanike, xewitɨ mɨkɨ mɨpaɨ katinita'iwawiya:
—¿Kereyɨ? ¿Ketita rayexeiyakai mɨkɨ ruku?
Kehú mɨpaɨ kaniutayɨni:
—Xemeri 'ari xepimate meta xekanimaikari kemɨtiuxaxata.
12'Iwamama mɨpaɨ mekatenitahɨawe:
—Pepɨtiku'itawa. Yurikɨ ketatineutaxatɨa.
Kehú mɨpaɨ katiniwarutaxatɨani:
—Mɨkɨ mɨpaɨtsɨ kanetinetaxatɨani: “Yawé mɨpaɨ kanaineni: ‘Hikɨ ne nekamenanayexeiya 'ixaheritsixi tiwa'aitɨwame pemayanikɨ’ ”.
13Hikɨ yapauka, yunaitɨ mekaniyukumexɨitɨani yu'ɨkari manutiyanitsie mekanikaweraxɨani Kehú hetɨa. Hikɨ meta kuxineta me'utahɨtsieka mɨpaɨ mekateniuhiwa: «Kehú ti'aitame kanihɨkɨtɨni».
Kehú kemɨtiwarukwi Kurami meta 'Ukutsiyaxi
(2Te 9:21-29 – 2Kem 22:7-9)
14Hikɨ Kehú Kutsapati nu'aya Nimitsi teukarieya, tiyu'aitɨwame Kurami 'aye'unietɨ kanayani. Ti'aitame Kurami yunaime yukuyaxima 'ixaheritsixi wahamatɨa Xamuti Karaha kwieriyatsie nuatɨ kaniyumienekaitɨni Katsaheri Tsiriyatsie ti'aitame kanimienekaitɨni, 15peru kaneyakaitɨni Ketsireri paitɨ mana meyuyutɨanikɨ tsiriyutsixi memɨte'ikwinitɨakaikɨ mewakwitɨwekaku. Hikɨ Kehú kemɨ'ane hetsiena memɨtewiyakai mɨpaɨ katiniwarutahɨawe: «Xɨka xeme yaxeteha'eriwani ne ti'aitame nemayanikɨ, nixeime xepɨkapitɨaka manuyeyeikani kiekaritsie, kapa reuxatamienikɨ Ketsireri». 16Hikɨ Kehú kananutiyerɨni yukaxeta kuyaxa miemetsie kaneyani Ketsireri, mana mekateikɨ Kurami tikuyetɨ. Metatsiere 'Ukutsiyaxi Kura kwieyaritsie ti'aitame mana pekatei, mana peyakai Kurami ku'iwatanetɨ.
17Kepauka kiekari hɨweme Ketsireri tuxiyuyaritsie paitɨ 'akawetɨ muwaruxei Kehú kuyaximama 'ame'ahukame, mɨpaɨ katiniuhiwa:
—Hipatɨ Kuyaxi tahepa mekanahuni.
Hikɨ Kurami mɨpaɨ katiniuta'aita:
—Xeime keneta'inieka kenetanɨ'a 'anutiyerɨme kawayutsie mɨwaranukunakekɨ kuyaxi muwareta'iwawiyakɨ xɨka 'aixɨa 'iyari mekɨyɨaka.
18Hikɨ xewitɨ kuya 'anutiyerɨka kaneyani Kehú kananukunake, mɨpaɨ katinita'iwawiya:
—Ti'aitame pɨremaimɨkɨ xɨka 'aixɨa 'iyari xekɨyɨaka.
Kehú mɨpaɨ katinita'eiya:
—'Ekɨ pepɨkatatsiha'iwawiyani xɨka 'aixɨa 'iyari tekɨyɨaka. Ta'utɨma keneukexi.
Hikɨ kiekari hɨweme mɨpaɨ kaniutayɨni:
—Temitanɨ'a kaniuye'anitɨtɨ wahetsɨa, peru nepɨka'ixeiya 'apɨta hamiekame.
19'Ayumieme, ti'aitame tawari xeime kanenɨ'ani kawayutsie 'anakaime, mɨkɨta kaniwaranukunake, yaxeikɨa mɨpaɨ katiniwarutahɨawe:
—Ti'aitame pɨremaimɨkɨ xɨka 'aixɨa 'iyari xekɨyɨaka.
Kehú mɨpaɨ katinita'eiya:
—'Ekɨta pepɨkatatsiha'iwawiyani xɨka 'aixɨa 'iyari tekɨyɨaka. Ta'utɨma keneukexi.
20Tawarita kiekari hɨweme mɨpaɨ kaniutayɨni:
—Temitanɨ'a kaniuye'anitɨtɨ wahetsɨa paitɨ, peru yaxeikɨata mɨkɨ nepɨka'ixeiya 'apɨta hamiekame. Meta kaxeta mana manɨ'axime Kehú Nimitsi nu'aya hepaɨ pɨtimatsiɨkɨ, ruku hepaɨ kaniwayɨximeni tahepa.
21Hikɨ Kurami mɨpaɨ kaniutayɨni:
—Nekaxeta kuyaxa mieme xekenekuha'arita.
Hikɨ kaniukuha'aritɨiyarieni. Yapauka Kurami, 'Ixaheritsie ti'aitame, meta 'Ukutsiyaxi, Kura kwieyaritsie ti'aitame, yuxexuitɨ yukaxetate mewaruhapatɨ, mekanayekɨne hikɨ Kehú mekananukunake Nawuhuti Ketsireri kiekame kwieya makumatsie. 22Kepauka Kurami Kehú muxei, mɨpaɨ katinita'iwawiya:
—Kehú 'aku, ¿'aixɨa 'iyari petikɨyɨane?
Mɨkɨta kanita'eiya:
—¿Tiyɨwekuta mɨpaɨ mete'anekaku kakaɨyarixi, 'aixɨa 'anekamekɨ pemɨnuani, 'amaama katiniyukewaiyani Ketsaweri?
23Kurami ta'aurie kanaweni yuta'unake, mɨpaɨ tiuhiwatɨ:
—'Ukutsiyaxi, 'ikɨ tatsi'uku'eirieka pɨyɨane.
24Peru Kehú yutupi karima kanahapani Kurami kaniutamɨni kani'axe warieyatsie, 'ɨrɨ 'iyarieyatsie kaniuyekeni. Kurami kanatiweni mɨkitɨ yukaxetatsie, 25hikɨ Kehú yuparewiwame Wirikaxi mɨpaɨ katiniutahɨawe:
—Kenanukukweka kenehɨwa, Nawuhuti kwieyatsie Ketsireri kiekame. Kenaye'eri kepauka 'ekɨ meta ne te'utetɨ temuhukai 'Akawi Kurani paapaya 'utɨa, Yawé mɨpaɨ kaniutayɨni mɨkɨ hepaɨtsita 'ikɨ xatatɨ: 26“Takai 'ena nepixei, Nawuhuti xuriyaya meta niwemama. 'Ayumieme hikɨ mɨkɨkɨ pekatinayukatuamɨkɨ, 'ena 'axeikɨa. Ne, Yawé mɨpaɨ nekanaineni”. Kenanukukweka kaxarieya, mana kenehɨwa mɨkɨ kwieyaritsie, mɨpaɨ Yawé niukieya kemainekai.
27Kepauka 'Ukutsiyaxi Kura kwieyaritsie ti'aitame, munierixɨ kemɨtiyɨanekai, heitserie kaniyuta'una Weti Hakani paitɨ. Peru Kehú kanenukuweiya, mɨpaɨ katiniuta'aita:
—Mɨkɨtsiere xekenemi'a.
Hikɨ kaniumɨiyani yukaxetatsie 'atiwetɨ Kuxi me'ukahutɨ hehurakaku 'Iwurehami, peru mɨkɨ ya'anetɨ 'akuxi kaneta'ani, Mekiru paitɨ mana kaniumɨni. 28Mɨkɨri 'iparewiwamete memeweiyakai, kaxarieya mekanekweni Kerutsareme paitɨ, Rawiri kiekarieyatsie, mana mekaneikateuku 'ukiyarimama wahamatɨa. 29'Ukutsiyaxi pitsutɨakai ti'aitatɨ kepauka tamamata heimana xewi wiyari mɨti'aitakairi Kurami 'Akawi nu'aya.
Ketsaweri kemɨtiumɨ
30Kepauka Ketsaweri mɨtiutamari kename Kehú 'uhamiekai Ketsireri kiekariyaritsie, mɨkɨ yuhɨxita katina'utɨaxɨani, kaniuyukatsike hikɨ kitsie wapaitɨ kananierekaitɨni mahekɨatsie. 31Kehú kepauka meutaha kiekari kitenieyaritsie, Ketsaweri mɨpaɨ katinita'iwawiya:
—¿Keperaka'iyuniwa Tsimɨri, mati'aitɨwame pemumi?
32Kehú kii heima 'etsimayewatsie heutiniereka, mɨpaɨ katiniuhiwa:
—¿Kemɨ'ane pɨnetsiparewie? ¿Kemɨ'ane?
Hikɨ mana mekaniukɨne kuyaxi yuhutatɨ yuhaikatɨ, 33hikɨ Kehú mɨpaɨ katiniwaruta'aitɨani:
—Mana xekenakahɨwa.
Hikɨ mɨpaɨ mekateniuyurieni, xuriyaya 'ixumeritsie paitɨ kaniukaxɨrieni meta kawayutsixi memitaketsi wa'ɨkate kaniutiwiriere. 34Hikɨ Kehú mɨkɨ kiekaritsie kaneutahani katiniukwani meta katiniu'ieni, 'ana mɨpaɨ katiniuta'aita:
—Xekenehu 'ukaratsi 'axatiyuruwame kaxarieya xekenexeiyayu, xekenekateuki, ti'aitame nu'aya kanihɨkɨtɨkaitɨni.
35Peru kepauka meheikateukuke memekɨ, mu'uya 'umeyarieya xeikɨa mekanetaxeiya, 'ɨkateya meta mamateya. 36Hikɨ mekanakunuaxɨani Kehú metetaxatɨanike, hikɨ mɨkɨ mɨpaɨ kaniutayɨni.
—Yakatinaye'ani Yawé kemutayɨ ti'uximayatsiriwame 'Eriyaxi Titsiwe kiekame kemɨtitahekɨataxɨ, mɨpaɨ kaniutayɨni: “Ketsireri kwieyaritsie tsɨikɨri Ketsaweri kaxarieya mekanitakwaikuni”. 37Mɨpaɨ katiniɨyɨni, Ketsaweri 'umeteya heyakɨa kaniuyuhayewa tewaxi wakwitarai hepaɨ yeuta Ketsireri kwieyaritsie, xewitu pɨkayɨwekai mɨpaɨ mɨtayɨni: “'Ikɨ pɨhɨkɨ Ketsaweri”.
Currently Selected:
2 Te'aitamete 9: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
