2 Te'aitamete 13
13
Kuhakatsi, 'Ixaheritsie ti'aitame
1Kuhatsi 'Ukutsiyaxi nu'aya, xeitewiyari heimana haika wiyari ti'aitakaku Kura kwieyaritsie, Kuhakatsi Kehú nu'aya kanitsutɨani 'Ixaheri kwieyaritsie ti'aitatɨ, hikɨ Tsamariya kiekariyaritsie katiniuta'aita tamamata heimana 'atahuta wiyari. 2Kuhakatsi Yawé kemɨkatinake katiniuyurieni, karikɨ Keruwuhani Nawati nu'aya kemɨtiuyuri hepaɨ katiniuyurieni, pɨkatiuhayewaxɨ 'axamɨti'ane 'ixaheritsixi kɨmana memekaxɨri. 3'Ayumieme Yawé kaniuyeha'ani 'ixaheritsixi wahepaɨtsita, 'ayumieme mɨixa wiyari muwakwinenikɨ Katsaheri Tsiriyatsie ti'aitame kaniupitɨani, meta nu'aya Weni-'Arari mɨtitewa kaniupitɨani.
4Hikɨ Kuhakatsi Yawé kaniutahɨawe, mɨkɨta kani'enieni, munierixɨkɨ 'ixaheritsixi kwinimieme Tsiriyatsie ti'aitame mɨtiwananaimakaikɨ. 5Hikɨ Yawé xeime kananayexeiya wawikweitsitɨwame mayanikɨ, 'ixaheritsixi mekaniuyɨwekaxɨani tsiriyutsixi mekawakwitɨwetɨ mekanakɨne 'aixɨa 'iyari me'u'uwatɨ mekanakɨne meripaitɨ hepaɨ. 6Mɨyatɨtɨ, 'ixaheritsixi mepɨkate'uhayewaxɨ yaxeikɨa 'axameteyurietɨ, Keruwuhani tɨɨriyamama ke'axamemɨte'uyuri wahepaɨ mepɨteyuriekai, 'uka 'Atserá kakaɨyariyari 'amekaniutakeni paitɨ Tsamariya kiekariyaritsie.
7Kuhakatsi kuyaximama meputixɨtɨarie, huta tewiyari heimana tamamata kawayutsixi wahetsie memutei xeikɨa, tamamata kaxetate kuyaxa miemete meta tamamata miriyari kuyaxi yu'ɨkama memuhu, Tsiriyatsie ti'aitame kaniwarutixɨtɨakaitɨni, yunaime kaniwarukwini hipame.
8Hipatɨta Kuhakatsi ti'aitakaku kemɨtiuyɨ meta naime kemɨtiuyuri meta kemɨtitɨrɨkaɨyekai, katinaka'utɨarieni kemɨtiuyɨ xapayaritsie 'Ixaheri kwieyaritsie te'aitamete waxapatsie. 9Kuhakatsi kaniumɨni, Tsamariya kiekariyaritsie kaniukateukieni. Nu'aya Kuhatsi kanitsutɨani hetsiena mieme ti'aitatɨ 'uwenieyatsie.
Kuhatsi, 'Ixaheritsie ti'aitame
10Xeitewiyari heimana tamamata heimana 'atahuta wiyari ti'aitakaku Kuhatsi Kura kwieyaritsie, 'Ixaheri kwieyaritsieta Kuhatsi Kuhakatsi nu'aya kanitsutɨani ti'aitatɨ, Tsamariya kiekariyaritsie 'ukaitɨ katiniuta'aita tamamata heimana 'ataxewi wiyari. 11Kuhatsi Yawé kemɨkatinake katiniuyurieni, Keruwuhani Nawati nu'aya ke'axamɨtiuyuri hepaɨ katiniuyurieni, ke'axamɨtiyurienekai nixeimetɨma pɨka'uhayewaxɨ, mɨpaɨ tiyurienetɨ 'ixaheritsixi ke'axameteyuriekame muwarayeitɨa.
12Hipatɨta kemɨtiuyɨ Kuhatsi ti'aitakaku meta kemɨtiuyuri metatsiere kemɨtitɨrɨkaɨyekai, meta 'Amatsiyaxi Kura kwieyaritsie ti'aitame kemɨtiutami, mɨkɨ naitɨ katinaka'utɨarieni kemɨtiuyɨ xapayaritsie 'Ixaheri kwieyaritsie memɨte'uta'aitaxɨ waxapayaritsie. 13Kuhatsi kaniumɨni, Tsamariya kiekariyaritsie kaniukateukieni 'Ixaheri kwieyaritsie te'aitamete memakɨ wahamatɨa. Hikɨ Keruwuhani hetsiena mieme katiniuta'aita 'uwenieyatsie.
'Eritseu kemɨtiumɨ
14Kepauka 'Eritseu kwiniyakɨ kwinimieme mɨ'anekai, Kuhatsi 'Ixaheri kwieyaritsie ti'aitame kaneikuxeiya. Hikɨ hɨxiena nuaka, 'utatsuatɨ mɨpaɨ kaniutayɨni:
—Nepaapa, nepaapa, kaxeta kuyaxa mieme pemɨhɨkɨ 'Ixaheritsie mieme pemɨtɨrɨkaɨye.
15'Eritseu mɨpaɨ katinitahɨawe:
—Xeime tupi kenekuwawa meta 'ɨrɨte waɨkawame.
Kuhatsi mɨpaɨ katinikayani. 16Hikɨ 'Eritseu mɨpaɨ katinitahɨawe:
—Tupi 'ari 'aixɨa ketineukwe'i.
Kepauka ti'aitame tupi mutikwei, 'Eritseu ti'aitame mamateya kaniuwiyaxɨani, 17hikɨ mɨpaɨ katinitahɨawe:
—'Itupari 'etsimɨyewa keneuyepi tau manatineika hepa mauwietsie.
Kuhatsi katineuyepieni, hikɨ 'Eritseu mɨpaɨ katinitahɨawe:
—Ketineutamɨ'i.
Hikɨ katiniutamɨni. Hikɨ 'Eritseu heitseriemekɨ mɨpaɨ kaniutayɨni:
—Mɨkɨ 'ɨrɨ Yawé 'inɨarieya kanihɨkɨtɨni. Kameniparewimɨkɨ tsiriyutsixi pemuwara'iwakɨ. Pekaniwatakwimɨkɨ 'Apeki kiekariyaritsie yunaime pekaniwakwimɨkɨ. 18Tawarita mɨpaɨ katinitahɨawe:
—Hikɨ 'ɨrɨte keneuti'ɨi.
Hikɨ 'Ixaheri kwieyaritsie ti'aitame kaniti'ɨni, meta 'Eritseu mɨpaɨ katinitahɨawe:
—Kwiepa ketinekawa kɨmana.
Kuhatsi haikakɨa kwiepa rekawaka hikɨ 'ana katiniuhayewa. 19Mɨya xeikɨa mɨtiuwakɨ, tewi Kakaɨyari hetsɨa mieme kaniuyeha'ani mɨpaɨ katinitahɨawe:
—'Auxɨwimexɨa yatɨni 'ataxewimexɨa kwiepa pemɨtiniukawaxɨakaitɨni, hikɨ 'ana pekaniwara'iwakekaitɨni tsiriyutsixi meta yemekɨ pekaniwakwinikekaitɨni yunaime. Peru hikɨ haikakɨa xeikɨari pekaniwara'iwamɨkɨ.
20Mɨpaɨ 'utayɨka 'Eritseu kaniumɨni, meta kaniukateukieni.
Xeiwiyari 'anuyeyeikakaku muhawitsixi mekaniuta'axekaitɨni mewakwitɨwetɨ 'Ixaheri kwieyaritsie kiekatari. 21Heiwa, 'ixaheritsixi xeime kaxarieya meka'awietakeyu, yapauka mekaniwaruxeiya 'ame'ahukame memɨwaraye'unie, hikɨ mɨkɨ kaxari 'Eritseu makateukietsie mekaneukahɨani. Kepauka mɨkɨ kaxari 'Eritseu 'umeyariteyatsie manutate, tewi tukari hexeiyatɨ kanayani kananukukeni.
Katsaheri 'ixaheritsixi kemɨtiwa'uximatɨakai
22Kepauka Kuhakatsi mɨti'aitametɨkai, Katsaheri Tsiriyatsie ti'aitame waɨkawa 'ixaheritsixi kaniwaruhiweritɨani. 23Peru matsi Yawé kaniwarutinenimayata. Meripaitɨ tɨratu muwewiekaikɨ 'Apɨrahami, 'Itsahaki meta Kakuwu wahamatɨa, 'ayumieme 'ixaheritsixi kaniwarutinenimayata wahetsie putanua, hikɨ 'akuxi yaxeikɨa pɨkawataunie memɨkaka'unarɨwanikɨ meta memɨka'ayeweiyarienikɨ hɨxiena.
24Kepauka Katsaheri mumɨ Tsiriyatsie ti'aitame, nu'aya Weni-'Arari hetsiena mieme ti'aitame kanayani. 25Hikɨ 'ana Kuhatsi Kuhakatsi nu'aya, kaniuyɨwekaxɨani kiekarite minawairienikɨ Weni-'Arari Kuhakatsi munawairiekai. Haikakɨa Kuhatsi kane'iwa, 'ana kiekarite kemɨ'ane 'Ixaheri kwieyaritsie mɨmiemetetɨkai kaniu'axe.
Currently Selected:
2 Te'aitamete 13: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
