1 Tetsarunikatari 5

1'Iwamarixi, witarite tukarite hepaɨtsita tixaɨ xepɨkateheuyehɨwa xemɨteta'utɨiyarienikɨ, 2xeme heitseriemekɨ mɨpaɨ xepɨtemate, Ti'aitame tukarieya mɨpaɨ katinaye'amɨkɨ tinawayame tɨkakɨta mɨ'axe hepaɨ. 3Kepauka mɨpaɨ memutiyuaneni: «Kayuwatɨ tepexeiya, tepɨkakweriwa'a», 'ana mekanika'unariekuni, yapauka pɨwa'axe 'uka mɨtiniwerɨme kwiniyaya mi'axe hepaɨ. Mepɨkatawikweni.

4Xeme pɨta ta'iwama, yɨwipa xepɨka'u'uwa, 'iya tukari pɨkaxe'axe tinawayame hepaɨ. 5Xeme yunaitɨ hekɨaripa xekanimiemetetɨni, tukaritsie xepɨmiemete kexemɨte'ununuiwa. Tɨkakɨta tepɨkamiemete, yɨwipa tepɨkamiemete. 6Merikɨte, 'ayumieme tepɨka'u'itutupeni hipame wahepaɨ, tepayeneniereni pɨta, tepɨtamaika. 7Kukutsumete tɨkakɨta mekanikutsuni, tarɨwekarixi tɨkakɨta mekanitarɨweka. 8Tame tukaritsie pɨta temɨmiemete tenitamaikakuni, yuri ketemɨte'erie, ketemɨtetakanaki'erie, mɨpaɨ tetenenakatɨkɨkuni kuya kamixaya hepaɨ temɨtakwerienikɨ tatawitsie, tamu'utsie kuya xupureruya hepaɨ tepenakeni ketemɨteta'ikwewakɨ temɨtawikweitsitɨarienikɨ, 9Kakaɨyari 'ena pɨkatatsi'ukaye temɨhekarienikɨ, pɨtatsi'ukaye temaye'axɨanikɨ pɨta ketemɨtetawikweitsitɨarieni, Tati'aitɨwame Ketsutsi Kɨritsitu yatatipitɨakaku. 10Mɨkɨ tahetsiemieme pumɨ, tame 'axeikɨa temayeyuyurinikɨ hamatɨana, tsepa temayeneniere tsepa temukwi. 11'Ayumieme xekeneyuwaɨriyani, xekeneyutseiriyani xemɨyutaxewirekɨ, yaxeikɨa kexemɨteyurie.

Papuru kemɨtiwatuikakai 'iwamarixi

12'Iwamarixi, 'ipaɨ tetenixewawirieka, xemɨwamatenikɨ mɨkɨ memɨte'uximaya xetsata, mɨkɨ memɨxe'ukiyarima Ti'aitame hetsie metewiyatɨ, mɨkɨ memɨxe'imaiya. 13Waɨkawa memɨmamariwawe xekeniwa'erieka xewanaki'erietɨ mɨpaɨ memɨte'uximayakɨ. 'Aixɨa xeketeneyuxeiyani yunaitɨ. 14'Iwamarixi, 'ipaɨta tetenixetawawirienikeyu, xekeniwaruta'imaiya mɨkɨ memi'ɨraxie 'aitsika, xekeniwawaɨriyani mɨkɨ memɨkatɨrɨkawi yu'iyaritsie, xekeniwatuikani mɨkɨ memɨwerarani, mɨixa xeketeneukanenewieka yunaime wahetsiemieme. 15Xekeneyukweriwayurieka kapa xewitɨ 'axarekapitɨani xeime 'iya 'axamiyurikɨ, matsi yuheyemekɨ xeketenekuwawa 'aixɨa xemɨyuyuriekakɨ yuxexuitɨ, 'aixɨa xemɨwayuriekakɨ yunaime.

16Xekeneyutemamawieka yuheyeme. 17Xekatehayewatɨ xekeneyunenewieka. 18Pamɨpariyutsi xekenepitɨaka Kakaɨyari naime hepaɨtsita, mɨpaɨ katininakeni Kakaɨyari yaxemɨteyuriekakɨ Kɨritsitu Ketsutsi hetsie xetewiyatɨ.

19'Iyari xepɨkakutɨtsani, 20xepɨka'itawe'erieka Kakaɨyari niukametemama waniuki, 21matsi xeketeneuta'inɨata naime, tita 'aixɨa mɨti'anetsie xeketenewiyani, 22tinaime 'axamɨti'anene tsepa kemɨ'ane xeketeneuhayewa.

23Mɨkɨtɨtɨ Kakaɨyari mɨtatsipitɨa ta'iyaritsie temɨka'uximatɨariekakɨ, mɨkɨ kexe'aye'atɨani xepatatɨ naime yuhetsiemieme ―xe'iyaritsie, kexemɨteyumate meta xewaiyari― xehetsie karahɨiwakaku kepauka Tati'aitɨwame Ketsutsi Kɨritsitu munuani. 24Kemɨ'ane mɨxe'uta'ini yakatinikamieni, mɨpaɨ katiniyuriemɨkɨ.

25'Iwamarixi, tahetsiemiemeta xekeneyunenewieka. 26Xekeniwawaɨritɨaka yunaime 'iwamarixi patsiekate kememɨteyuwaɨritɨa. 27Ne nepɨxehɨritɨa Ti'aitame netsi'eniekaku, yunaitɨ 'iwamarixi memakaterɨwiyarienikɨ 'ikɨ xapa.

28Tati'aitɨwame Ketsutsi Kɨritsitu 'aixɨa ketiuka'iyarini xehetsiemieme. Mɨpaɨ xeikɨa kani'aneni.

Currently Selected:

1 Tetsarunikatari 5: hch

Highlight

Copy

Compare