Lituto za Siraki 50
50
Simoni muprisita yo muhulu
1N'e li Simoni muprisita yo muhulu,
mwan'a Oniasi,
ya n'a lukisize sinca Tempele
ka nako ya bupilo bwa hae,
mi mwa mazazi a hae a sileleza sibaka
se si kenile.
2A eza mutomo wa limota
le ne li potolohile Tempele,
ili mutomo o mukima hahulu.
3Ka nako ya hae kwa yepwa siliba
sa mezi,
se ne si swana ni liwate.
4Ka ku lata ku pulusa batu
kuli ba si ke ba timela,
a sileleza muleneñi ka tata kuli lila,
niha li ka u beya mwahali,
li palelwe ku kena.
5Ha si mw'a n'a bezi ni maata
h'a beilwe ki batu mwahali,
h'a zwa mwa Sibaka se si Kenile Hahulu,
se si beilwe masila!
6N'a swana inge naleli ya kakusasana
mwahal'a malu,
ni kweli ha i se i li kwa busweu.
7N'a bonahala bunde hahulu
sina lizazi le li benya fa Tempele,
ni ku swana ni nambwamutalati
ya benya fa malu a kanya.
8A benya hande sina lipalisa
ha li tubula,
ni mulilima mwa mezi.
N'a swana sina palisa ye nunka hande
ka nako ya litabula,
ni wa insense ye fa mulilo.
9Hape n'a buheha hande hahulu
sina piza ya gauda ye tulilwe,
i kabisizwe ka macwe a mande
a mibala ya mifuta-futa.
10N'a swana ni kota ya olive
ye shakatezi miselo ye miñata,
kapa inge kota ya kiprese ye telele
ha i lendile ku y'o fita kwa malu.
11H'a apala siapalo sa hae sa kanya,
ni ku ikabisa ka bunde
bo bu swanela luli,
mi h'a ya kwa katala ka ka kenile,
n'a hulisa sibaka se si kenile
ka maata a hae.
12H'a amuhela likabelo mwa mazoho
a baprisita,
a yemi kwatukw'a mulilo wa katala
mi a beilwe mwahali ki buñata
bwa banabahabo,
a swana inge kota ye nca ya sidare
ya Lebanoni,
sina ye mwahal'a sikwenda sa mikoma.
13Bana ba Aruni kaufela ka maata
a bona,
ha ba nze ba sweli limpo za Muñ'a Bupilo
mwa mazoho,
ba yema fapil'a mukopano wa Isilaele
kaufela.
14Mi yena a feza lisebelezo
kwa katala ni ku beela hande
Mulena Mulimu ya Maata Kaufela limpo.
15A swala sinwelo,
mi a sela mpo ya waine mwatas'a katala,
i be muunko o munde hahulu
ku ya Maata Kaufela,
Mulena wa linto kamukana.
16Cwale ka yona nako yeo
bana ba Aruni ba huweleza
ni ku liza litolombita za bona
za sipi.
Ba eza mulumo o munde hahulu,
o utwahala,
kuli i be kupuzo
ku Mulimu ya Maata Kaufela.
17Cwale kapili-pili batu kamukana
hamoho ba wela fafasi ku kuteka
Mulen'a bona,
yena Mulimu ya Pahami Hahulu,
ya Maata Kaufela.
18Mi baopeli ba kala ku opela
lipina ze nde hahulu
za ku lumbeka Mulimu,
ka manzwi a bona a mande hahulu.
19Batu ne ba eza cwalo ba nze
ba lapela fapil'a hae,
yena ya musa hahulu,
ku fitela musebezi wa Muñ'a Bupilo
u fela
mi ni yona sebelezo ya fela.
20 #
Lipa 6.24-27
Cwale kihona a taha ku t'o nanulela
mazoho a hae fahalimw'a
bana ba Isilaele kamukana,
ku ba fa limbuyoti za Mulimu
ze zwa mwa mulomo wa hae,
ha s'a bile ni litohonolo la ku bulela
Libizo la Muñ'a Bupilo le li Kenile.
21Ku tuha foo hape batu ba inama
hahulu
ku amuhela tohonolofazo ye zwa
ku Mulena Mulimu ya kwa lihalimu.
Kelezo
22Cwalehe, mu lumbeke Mulimu
wa linto kaufela,
ya eza likezo ze tuna mwa lifasi
kamukana,
ya kondisize mazazi a luna
lu sa li mwa limba,
mi u lu ezize ka musa.
23A lu fe lipilu ze tabile,
mi a lu tiseze kozo ka nako ya luna,
mwa Isilaele kuya kuile.
24Musa wa hae u sepahale hande ku luna,
mi ka nako ya luna a lu sileleze.
Nuguli ya macaba a hanilwe
25Ku na ni macaba a mabeli a sa latwi
ki pilu ya ka,
mi sa bulalu ha si sicaba
ni hanyinyani.
26Ki bañi ba Lilundu la Seiri
ni Mafilisita,
ni likuba zeo ze pila kwa Sikemi.
Mafelelezo
27Tuto ya butali ni zibo i ñozwi
mwa buka ye,
ki Jesu mwan'a Sira wa Eleazare,
wa mwa Jerusalema,
ya tisize hahulu butali bo bu zwa
mwa pilu ya hae.
28U litohonolo mutu ya ipatehisa
ka zona lika ze,
mi u ba ni butali ka ku li buluka
mwa pilu.
29Haiba a li sebelisa u ka tiya
mwa lika kamukana,
kakuli liseli la Muñ'a Bupilo ki yona
nzila ya hae.
Currently Selected:
Lituto za Siraki 50: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.