Lituto za Siraki 41
41
Lifu
1Oho lifu,
ku butuku cwañi ku ku hupula
ku mutu ya pila ka kozo mwahal'a
tutu ya hae,
ya si na lipilaelo, ni ku fuma linto
kaufela,
mi ili ya sa kona ku ikuta ili yena.
2Wena lifu, katulo ya hao
ya amuheleha ku mutu ya nyandile,
ya felelwa ki maata,
mutu ya supezi hahulu,
ya katazwa ki lika kamukana,
ya filikani ni wa ndiulu.
3U si ke wa saba katulo ya lifu.
Hupula ba ba ne ba li teñi
pili ku wena ni ba ba ta ba teñi
mwamulaho wa hao.
4Ye ki yona katulo ye filwe libupiwa
kaufela ki Muñ'a Bupilo.
Cwale u hanyelezañi se si bonahala
ku ba bunde ku Ya Pahami Hahulu?
Bupilo bwa hao niha bu ka fitelela
lilimo ze lishumi,
ze mwanda kapa ze sikiti,
ha u na ku buziwa ka butelele
bwa zona mwa libita.
Mupuzo wa ba ba maswe
5Bana ba ba si ka luka ki bana
ba baezalibi,
ba ba kopanelanga mwa libaka
za ba ba maswe.
6Sanda sa bana ba baezalibi
si se si felile,
mi baikulu ba bona ba ta ba
ni manyando a sa feli.
7Mushemi ya maswe u ta nyazwa
ki bana ba hae
kabakala manyando a' ba tiselize.
8Bumai ki bwa mina, ba ba sa lati
Mulimu,
mina mu hana Mulao
wa Mulimu Ya Pahami Hahulu.
9Ha mu pepwa ne mu pepezwi
sikuto,
mi ha mu shwa, sona sikuto sani
si ta ba sona kabelo ya mina.
10Ze zwa mwa mubu li kutela
mwa mubu.
Cwale ki mo ku inezi ni ku ya maswe.
U kala ka sikuto
mane a y'o kena mwa lifu.
11Batu ba silisa mufu wa bona
kono libizo le li si na tuso
la muezalibi li ta takulwa.
12U tokomele kabubo ka hao
kakuli ka ta nga nako ye telele
ku wena,
ku fita mabunda a matuna a gauda
a sikiti.
13Bupilo bo bunde bu nga mazazi
a likani feela,
kono kabubo ka kande kona ka ta ina
kuya kuile.
Ku ba ni maswabi
14Bana ba ka, mu buluke likelezo
za ka mi mu pile ka kozo.
Ki tuso mañi ya butali bo bu patilwe
ni bufumu bo bu sa bonahali?
15Mutu ya pata bukuba bwa hae
ki yo munde ku fita ya pata butali
bwa hae.
16Cwale mu ipuluke hande
mu ikutekile
mi mu mamele se ni ta bulela,
kakuli maswabi kamita h'a lukeli
ku ekelezwa,
kamba kuli taba ni taba kamukana
i utwisiswa hande ki batu kaufela.
17U swabe fapil'a ndat'aho ni m'aho
ka mulatu wa bubuki,
ni fapil'a malena ni babusi
ka ku bulela buhata.
18U swabe fapil'a muatuli ni mubusisi
yo muhulu wa mulao
ka ku eza kezo ye maswe.
U swabe ha u li fapil'a mukopano wa
nyangela
ka ku loba mulao wa buiswalo.
U swabe fapil'a mulikan'a hao
ni mwanahenu
ka ku sa sepahala,
ni fapil'a y'o bapani ni yena
kabakala ku mu uzweza.
19U swabe
kabakala buniti bwa Mulimu
ni bulikani bwa hae ni luna.
U swabele mikwa ye maswe
ni ku yendamena fa tafule ka liñokolwa.
U swabele ka ku fa
ni ku amuhela limpo ka lishwau,
20ni ka ku kuzeza ba ba ku lumelisa.
U swabele ku buha musali wa lihule,
21ni ku fulalela mwanahenu.
U swabele ku amuha wahenu
kabelo ya hae kamba mpo,
ni ku talima maswe musal'a yo muñwi.
22U swabele ku eza bunyazi
ni mutang'a hae wa musizana.
U si ke wa sutelela kwa mumbeta
wa hae.
U si ke wa bulela manzwi a swabisa
fapil'a mulikan'a hao,
ni ku bulela maswe ku y'o file.
23U si ke wa kuta-kutela u nze u seba
ni ku patulula likunutu.
Haiba u utwisisa zeo kaufela,
fohe u ta ziba hande mw'a inezi
maswabi a niti,
mi u ta fumana kuli u latwa
ki mañi ni mañi.
Currently Selected:
Lituto za Siraki 41: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.