Mateu 6

Tuto bakeñisa lituso

1 # Mat 23.5 “Mu tokomele kuli mu si ke mwa bonahaza bunde bwa mina kwa nyangela kuli batu ba bone ze mu eza. Haiba mu eza cwalo, ha mu na ku fumana mupuzo ku Ndat'a mina ya kwa lihalimu.

2“Cwale, ha u tusa babotana, u si ke wa bonisa batu patalaza s'o eza, sina mo ba ezeza baipi mwa masinagoge ni mwa mikwakwa. Ba eza cwalo kuli ba lumbiwe ki batu. Luli na mi bulelela kuli ba se ba fumani kale mupuzo wa bona! 3Kono wena, ha u tusa babotana, u ba tuseze kwa mukunda kuli nihaiba mulikan'a hao yo mutuna a si ke a ziba s'o eza. 4I be mpo ye sa zibwi ki batu, mi Ndat'aho, ya bona s'o eza kwa mukunda, u ta ku fa mupuzo.

Tuto bakeñisa tapelo

(Luk 11.2-4)

5 # Luk 18.10-14 “Mi ha mu lapela, mu si ke mwa eza sina baipi! Batu bao ba lata ku yema ni ku lapela mwa masinagoge ni mwa manganandila kuli ba bonwe ki batu kaufela. Luli na mi bulelela kuli ba se ba fumani kale mupuzo wa bona. 6Kono wena, ha u lapela, u ye kwa musiyo wa hao, u kwale munyako, mi u lapele Ndat'aho, ya sa bonwi. Mi Ndat'aho ya bona s'o eza kwa mukunda, u ka ku fa mupuzo.

7 # Litu 7.14 “Ha mu lapela, mu si ke mwa bulela manzwi a mañata-ñata sina mo ba ezeza bahedeni. Ba hupula kuli Mulimu u ka ba utwa ka ku bulela hahulu. 8Mu si ke mwa swana sina bona, kakuli Ndat'a mina wa ziba se mu tokwa mu si ka si kupa kale. 9Mu lapele ka mukwa wo, mu li,

‘Ndat'a luna ya kwa lihalimu,

libizo la hao li be le li kenile.

10Ku tahe mubuso wa hao.

Se si latwa ki wena si ezwe mwa lifasi,

sina mo si ezezwa mwa lihalimu.

11U lu fe kacenu lico ze lu tokwa.

12U lu swalele bumaswe bo lu ezize, sina luna ha lu swalela ba ba lu foselize.

13U lu tuse kuli lu si ke lwa kena mwa miliko,

mi u lu lamulele ku Ya Maswe.’

14 # Mar 11.25-26; Litu 28.1-5 “Kakuli haiba mu swalela ba bañwi lifoso za bona, Ndat'a mina ya kwa lihalimu u ka mi swalela ni mina. 15Kono haiba mu sa swaleli lifoso za ba bañwi, fohe Ndat'a mina ya kwa lihalimu h'a na ku mi swalela ni mina.

Tuto bakeñisa ku itima lico

16“Ha mu itima lico, mu si ke mwa sosobanya lifateho sina mo ba ezeza baipi. Ba isinya lipata kuli batu kaufela ba bone kuli ba itima lico. Luli na mi bulelela kuli ba se ba fumani kale mupuzo wa bona. 17#Judi 10.3 Kono wena, ha u itima lico, u tape kwa pata, mi u kamune milili ya hao. 18U eze cwalo kuli ba bañwi ba si ke ba ziba kuli u itima lico. Ku zibe feela Ndat'aho ya sa bonwi. Mi Ndat'aho ya bona z'o eza kwa mukunda, u ta ku fa mupuzo.

Ku ipulukele bufumu mwa lihalimu

(Luk 12.33-34)

19 # Jak 5.2-3 “Mu si ke mwa ipulukela bufumu mwa lifasi, mo ku na ni mafele ni mafumi a kona ku bu sinya, ni masholi ba ba kona ku punya mandu ni ku uzwa. 20#Litu 29.11 Kono mu ipulukele bufumu bwa lihalimu, bo bu sa sinywi ki mafele ni mafumi, ni bo bu sa koni ku uzwiwa ki masholi. 21Kakuli pilu ya hao kamita i ka ba koo ku inzi bufumu bwa hao.

Liseli la mubili

(Luk 11.34-36)

22“Meeto ki lumonyi lwa mubili. Haiba meeto a hao a bona hande, mubili wa hao kaufela u ka ba mwa liseli. 23Kono meeto a hao h'a sa boni hande, mubili wa hao kaufela u ka ba mwa lififi. Cwale haiba liseli le li inzi ku wena li fetuha lififi, lififi leo li ka ba le lituna cwañi!

Lipilaelo li be siyo

(Luk 16.13; 12.22-31)

24“Ha ku na mutu ya kona ku sebeleza malena ba babeli, kakuli u ka toya yo muñwi, mi a late yo muñwi, kapa u ka kuteka yo muñwi, mi a shwaule yo muñwi. Ha ku konahali kuli mu sebeleze Mulimu ni mali.

25“Kiha ni mi bulelela kuli, mu si ke mwa bilaela ka ze mu tokwa mwa bupilo bwa mina, i be za ku ca kapa za ku nwa, ni ka za mubili wa mina, ze mu ka apala. Kikuli bupilo ha si bwa butokwa ku fita lico, ni mubili ha si wa butokwa ku fita liapalo? 26A mu bone linyunywani mwa mbyumbyulu. Ha li cali, ha li kutuli, mi ha li buluki lico mwa matuli, kono Ndat'a mina ya kwa lihalimu wa li uta! Kana mina ha mu li fiti hahulu? 27Kana u teñi ku mina ya ka kona ku ekeza nako ya bupilo bwa hae ka ku bilaela ka bona?

28“Mi kikabakalañi ha mu bilaela ka za liapalo? A mu bone mayangayanga a mwa naheñi mw'a melela. H'a li sebezi kapa ku ikezeza liapalo. 29#1 Male 10.4-7; 2 Lita 9.3-6 Kono na mi bulelela, ni li, ‘Nihaili Salumoni, ya n'a fumile hahulu mwa bulena bwa hae, n'a si na liapalo ze nde sina le liñwi la ona. 30Ki Mulimu ya apesa cwalo bucwañi bwa mwa naheñi, ili bucwañi bo bu li teñi kacenu, mi habusa bu omile ni ku nepelwa mwa mulilo. Kana a si ke a mi apesa cwalo ni mina, mane ni ku fita? Kanti tumelo ya mina ki ye nyinyani cwañi!’

31“Cwalehe, mu si ke mwa bilaela kuli, ‘Lu ka cañi? Lu ka nwañi? Lu ka apalañi?’ 32Kakuli zeo, ki zona ze batiwa hahulu ki bahedeni. Ndat'a mina ya kwa lihalimu u ziba kuli mwa li tokwa zeo kaufela. 33Kono mu bate pili Mubuso wa Mulimu ni ze latwa ki yena, mi u ta mi fa ni ze ñwi kamukana. 34Mu si ke mwa bilaela ka za kamuso, kakuli la kamuso li ka taha ni lipilaelo za lona. Lizazi li likanwa ki ziezi ya lona.

Currently Selected:

Mateu 6: Lozi09

Highlight

Copy

Compare