Mateu 17

Sibupeho sa Jesu ha si fetuha

(Mar 9.2-13; Luk 9.28-36)

1 # 2 Pit 1.17-18 Mwamulaho a mazazi a silezi, Jesu a nga Pitrosi, Jakobo ni munyan'a hae Joani, mi a kambama ni bona fa lilundu le litelele, fo ba iz'o ina ba li nosi. 2Sibupeho sa hae sa fetuha ba nze ba talimezi. Pata ya hae ya benya sina lizazi, mi liapalo za hae za ba ze sweu twaa, sina liseli. 3Balutiwa bao ba balalu kiha ba bona Mushe ni Elia ba ambola ni Jesu. 4Honafo, Pitrosi a li ku Jesu, “Mulena, ha si bunde bo ha lu inzi kwanu! Ha u lata cwalo, ni ta yaha maongo a malalu. Lo luñwi lu be lwa hao, lo luñwi lwa Mushe mi lo luñwi lwa Elia.”

5 # Sim 22.2; Mul 18.15; Lipi 2.7; Isa 42.1; Mat 3.17; 12.18; Mar 1.11; Luk 3.22 Ha n'a sa bulela cwalo, kwa taha lilu le li benya fahalimw'a bona, mi mwa lilu kwa utwahala linzwi le li li, “Yo ki Mwan'a ka ye ni lata, ye ni katelwa hahulu. Mu mu utwe.”

6Balutiwa ha ba utwa linzwi leo, ba saba hahulu, mane ba wela fafasi ka lipata. 7Jesu a taha ku bona, mi a ba swala, a li, “A mu zuhe. Mu si ke mwa saba!” 8Cwale ba inamuluha, ba talima, kono ha ba si ka bona mutu haisi Jesu feela.

9Ha ba nze ba shetumuka ku zwa fa lilundu, Jesu a ba laela, a li, “Mu si ke mwa bulelela mutu ka pono ye mu boni, konji na, Mwan'a Mutu, ha se ni zuhile kwa bafu.”

10 # Mala 4.5 Balutiwa kiha ba buza Jesu, ba li, “Kanti kikabakalañi Baluti ba Mulao ha ba bulela kuli Elia u na ni ku taha pili?”

11 # Litu 48.10 Jesu a ba alaba, a li, “Ki niti, Elia u na ni ku taha pili ku t'o lukisa lika kaufela. 12#Mat 11.14 Kono ni mi bulelela kuli Elia u s'a tile kale. Batu ha ba si ka mu ziba mi ba mu ezize mo ne ba latela kaufela. Ba ka nyandisa cwalo ni na, Mwan'a Mutu.”

13Cwale balutiwa ba utwisisa kuli n'a ba bulelela ka za Joani Mukolobezi.

Jesu u folisa mushimani wa moya o maswe

(Mar 9.14-29; Luk 9.37-43a)

14Ha ba sutelela kwa nyangela, munna a taha ku Jesu, a t'o kubama fapil'a hae. 15A li, “Muñ'a ka, a ku shwele mwan'a ka makeke! U kula kanono, u nyanda hahulu, mi i se li hañata a wela mwa mulilo kamba mwa mezi. 16Ni mu tisize kwa balutiwa ba hao, kono ba palezwi ku mu folisa.”

17Jesu a alaba, a li, “Mina, batu ba ba maswe, ba ba si na tumelo! Ni ta ina ni mina nako ye kuma kai? Ni ta konana lili ni mina? A mu ni tiseze mwanana yo!” 18Jesu a laela moya o maswe kuli u zwe. Wa zwa, mi mwanana a fola ka yona nako yeo.

19Balutiwa kiha ba taha ku Jesu kwatuko, mi ba mu buza, ba li, “Kanti kikabakalañi luna ha ne lu palezwi ku leleka moya o maswe?”

20 # Mat 21.21; Mar 11.23; 1 Bakor 13.2 Jesu a ba alaba, a li, “Ki kabakala kuli tumelo ya mina ki ye nyinyani. Ni mi bulelela niti. Kambe mu na ni tumelo ye kuma fa peu ya masitete, ne mu ta kona ku bulelela lilundu le kuli, ‘Shimbuluka fa, u ye fani,’ mi ne li ta ya! Ne mu ta kona ku eza lika kamukana! 21Ki ka tapelo ni ka ku itima lico kuli moya wa mufuta wo u kona ku lelekwa. Kwand'a zeo, ha ku na.”

Jesu u talusa hape ka za lifu ni zuho ya hae

(Mar 9.30-32; Luk 9.43b-45)

22Zazi le liñwi, balutiwa ha ne ba kopani kaufela hamoho mwa Galilea, Jesu a li ku bona, “Na, Mwan'a Mutu, ni ka tuha ni fiwa mwa mazoho a batu. 23Ba ta ni bulaya, kono ka lizazi la bulalu ni ta be ni zuhile kwa bafu.”

Balutiwa ba swaba hahulu.

Mutelo wa Tempele

24 # Mut 30.13; 38.26 Jesu ni balutiwa ba hae ha ba fita mwa Kapernauma, batelisi ba mutelo wa Tempele ba taha ku Pitrosi, mi ba mu buza, ba li, “Kana muluti wa mina h'a telangi mutelo wa Tempele, nji?”

25Pitrosi a alaba, a li, “Batili, wa telanga.”

Cwale, Pitrosi ha s'a keni mwa ndu, Jesu a kala ku bulela, a li, “Simoni, muhupulo wa hao wena ki ufi? Ki mañi ya lifanga kamba ku telanga kwa malena ba lifasi le? Kana ki bañi ba naha kamba bazwahule?”

26Pitrosi a alaba, a li, “Ki bazwahule.”

Jesu a mu alaba, a li, “Kanti, ku bonahala kuli bañi ba naha, bona, ha ba telangi. 27Kono ha lu lati ku foseza batu ba. Kabakaleo, u ye kwa lisa, u y'o shuta, mi mwa mulomo wa tapi ya pili y'o ta swala, u ta fumana mali a likana mitelo ye mibeli ya Tempele, wa ka ni wa hao. U a nge, mi u ba life mitelo ya luna.”

Currently Selected:

Mateu 17: Lozi09

Highlight

Copy

Compare