Mateu 11

Mañusa a zwa ku Joani Mukolobezi

(Luk 7.18-35)

1Jesu ha s'a felize ku fa balutiwa ba hae ba lishumi ka ba babeli litaelo zeo, a zwa mwa sibaka seo, a y'o luta ni ku bulela Linzwi la Mulimu mwa minzi ye fakaufi.

2Joani Mukolobezi h'a utwa za misebezi ya Kreste, a nz'a li mwa tolongo, a lumela ku yena balutiwa ba hae ba bañwi. 3Ba mu buza, ba li, “U lu bulelele, kana ki wena ya n'a bulelwanga ki Joani kuli wa taha, kamba lu libelele yo muñwi hape?”

4Jesu a ba alaba, a li, “Mu y'o bulelela Joani ka ze mu utwa ni ze mu bona. 5#Isa 35.5-6; 61.1 Libofu za bona, lihole za zamaya, ba mbingwa ba foliswa, bo susu ba utwa, ba ba shwile ba zuswa, mi Litaba ze Nde za Mubuso wa Mulimu li bulelelwa babotana. 6U na ni litohonolo ya si ke a sitatala ka na!”

7Balutiwa ba Joani ba sa z'o funduka feela, Jesu a bulela ka Joani kwa nyangela ye ne li teñi, a li, “Ha ne mu ile ku Joani h'a li mwa naheñi, ne mu libelela ku y'o bona sika mañi? Kana ne li lutaka lo lu nyanganyiswa ki moya? 8Ne mu il'o bona nto mañi? Kana ne li mutu ya n'a apezi liapalo ze buheha? Batu ba ba apala ze cwalo ba pila mwa mandu a bulena! 9Cwale mu il'o bona sika mañi? Mupolofita, nji? Ee, na mi bulelela kuli mane mu boni ya fita mupolofita. 10#Mala 3.1 Kakuli ku ñozwi cwana bakeñisa Joani, ‘Ki yo, numwana wa ka, ku bulela Mulimu. Ni ka mu luma fapil'a hao ku y'o ku lukiseza nzila.’ 11Kaniti na mi bulelela kuli, Joani Mukolobezi ki yo mutuna ku fita batu kaufela ba ba pilile fafasi! Nihakulicwalo, yo munyinyani ka ku fitisisa mwa Mubuso wa Lihalimu ki yo mutuna ku yena. 12#Luk 16.16 Ku zwa f'a kalezi Joani ku bulela Linzwi la Mulimu ku fita nako ye, Mubuso wa Lihalimu u lwanisizwe ka buhali, mi ba ba buhali ba lika ku u hapa. 13Mulao wa Mushe ni bapolofita kaufela, ku fitela Joani h'a taha, ba bulezi ka za Mubuso. 14#Mala 4.5; Mat 17.10-13; Mar 9.11-13 Haiba mu lata ku lumela linzwi la bona, Joani ki yena Elia, yo ku taha kwa hae ne ku bulezwi pili. 15Ya na ni lizebe, a utwe!

16“Cwalehe, batu ba nako ye ni ka ba swanisa niñi? Ba swana sina banana ba ba inzi fa patelo, ba huwelezana ba nze ba li, 17‘Lu mi lizelize lipina za mikiti ya manyalo, kono ha mu si ka bina! Lu opezi lipina za maswabi, kono ha mu si ka lila!’ 18Joani u tile a sa ci lico, a sa nwi, mi batu ba li, ‘Wa pulumuka!’ 19Na, Mwan'a Mutu, ni tile nze ni ca ni ku nwa, mi batu ba li, ‘A mu bone mutu yo! Ki mutu wa micomibi ni cakolwa, mi ki mulikan'a batelisi ni baezalibi!’ Nihakulicwalo, butali bwa Mulimu bu pakiwa ki likezo za bona.”

Minzi ye hana ku lumela

(Luk 10.13-15)

20Cwale Jesu a kala ku omanya minzi mw'a n'a ezelize buñata bwa limakazo za hae, kakuli ne i si ka baka. 21#Isa 23.1-18; Ezek 26.1—28.26; Joel 3.4-8; Am 1.9-10; Zak 9.2-4 A li, “U na ni bumai, wena Korazini! U na ni bumai, ni wena Betsaida! Kakuli kambe limakazo ze ezelizwe ku mina ne li ezelizwe mwa Tire ni Sidoni, batu bao kambe ki kale ba apala masaka ni ku itamba mulola wa fa liiso ku bonisa kuli ba bakile! 22Ki lona libaka ha ni li ku mina kuli, ka Lizazi la Katulo, Mulimu u ka ba ni musa kwa batu ba Tire ni Sidoni ku fita ku mina! 23#Isa 14.13-15; Sim 19.24-28 Mi haili ka wena Kapernauma! Kana n'o bata ku ipahamiseza kwahalimu? U ka nepelwa fafasi, mane mwa lyangalilo! Kakuli kambe limakazo ze ne ezelizwe ku wena ne li ezelizwe mwa Sodoma, kambe munzi wo u sa li teñi ni kacenu! 24#Mat 10.15; Luk 10.12 Kiha ni li ku wena, ‘Ka Lizazi la Katulo Mulimu u ka ba ni musa kwa Sodoma ku fita ku wena.’ ”

Mu tahe ku na, mu t'o pumula

(Luk 10.21-22)

25Honafo, Jesu a li, “Oho Ndate, Mulena wa lihalimu ni lifasi, ni itumela ku wena ha u patululezi ba ba si ka ituta litaba z'o patezi ba ba butali ni ba ba itutile. 26Ee, Ndate, ku cwalo kakuli ki mo n'o latela.

27 # Joa 3.35; 1.18; 10.15 “Ndate u ni file lika kaufela. Ha ku na ya ziba Mwana konji Ndate, mi ha ku na ya ziba Ndate konji Mwana, ni bao Mwana a lata ku ba sinulela yena.

28 # Litu 6.24-30; 24.19; 51.23-26 “A mu tahe ku na, mina kaufela ba ba katalisizwe ki milwalo ye bukiti, mi ni ta mi katulusa. 29#Jer 6.16 Mu nge joko ya ka, mu itwese yona, mi mu itute ku na kakuli ni na ni musa, ni wile pilu, mi mu ta fumanela mioya ya mina pumulo. 30Joko ya ka i bubebe, mi mulwalo wa ka ha u na bukiti.”

Currently Selected:

Mateu 11: Lozi09

Highlight

Copy

Compare