Malaki 2
2
1Muñ'a Bupilo ya Maata Kaufela u li kwa baprisita, “Taelo ye ki ya mina. 2Mu swanezi ku ni kuteka ka ze mu eza. Haiba mu sa utwi se ni bulela, ni ku isa kwateñi pilu, ni ta mi kuta. Ni ta kuta ni linto ze nde ze mu amuhela kuli li mi tuse. Mane ni se ni li kutile, kakuli ha mu isi hahulu pilu kwa taelo ya ka. 3Ni ta utwisa bana ba mina butuku ni ku lamba lipata za mina ka buloko bwa lifolofolo ze mu ni ezeza litabelo, mi ni ta mi latela kwahule hamoho ni buloko cwalo. 4#Lipa 3.11-13 Cwale mu ta ziba kuli ni mi file taelo yeo, ili kuli bulikani bwa ka ni baprisita, bona baikulu ba Livi, bu tiye.
5 #
Lipa 25.12
“Mwa bulikani bwa ka ni ba sepisize bupilo ni buiketo, mi ni ba file zona kaufela, kuli ba ni kuteke. Ne ba ni kuteka ni ku ni saba. 6Ne ba luta ze lukile, isiñi ze maswe. Ba pilile hande ni na. Ba ezize ze nde, mi ba tusize ba bañata ka ku ba tuhelisa ku eza ze maswe. 7Ki musebezi wa baprisita ku luta zibo ya niti ya Mulimu. Batu ne ba lukela ku ya ku bona ku y'o ituta tato ya ka, kakuli ki bona balumiwa ba Muñ'a Bupilo ya Maata Kaufela.
8“Kono cwale, mina baprisita, mu se mu keluhile mwa nzila ye lukile. Lituto za mina li se li fosisize ba bañata. Mu sinyize bulikani bo ne ni isweli ni mina. 9Cwale ni na, ni ta eza batu ba Isilaele kuli ba mi shwaule, kakuli ha mu lateleli tato ya ka. Mi ha mu luta batu ba ka, mu sa ketulula.”
Ku sa sepahala kwa batu ku Mulimu
10Ndat'a luna kana h'a si a li muñwi? Kana ha lu si ka bupiwa ki Mulimu a li muñwi? Cwale kikabakalañi ha lu sinya lisepiso ze lu ezize ku yo muñwi ni yo muñwi wa luna, mi kikabakalañi ha lu shwaula bulikani bw'a ezize Mulimu ni bo kukw'a luna? 11Batu ba Juda ba sinyize sepiso ya bona ku Mulimu mi ba ezize nto ye maswe hahulu mwa Jerusalema ni mwa naha kaufela. Ba silafalize Tempele y'a lata Muñ'a Bupilo. Banna ne ba nyezi basali ba ba lapela milimu i sili. 12Muñ'a Bupilo a zwise ufi ni ufi ya eza cwalo mwa Isilaele, mi a si ke a kutela ku ba wa sicaba sa luna hape, ili batu ba ba tiseza Muñ'a Bupilo ya Maata Kaufela limpo.
13Nto ye ñwi ye mu eza ki ye. Mu kolobisa katala ka Muñ'a Bupilo ka mioko, mu nze mu lila ni ku bokolola kakuli h'a sa amuhela limpo ze mu mu tiseza. 14Mi mwa buza, mwa li, “Kikabakalañi ha sa li amuheli?” Ki kabakala kuli Muñ'a Bupilo u ziba kuli mu sinyize sepiso ya mina ku musali ye ne mu nyezi mu sa li ba banca. N'e li mulikan'a mina luli, mi mu sinyize sepiso ya mina ku yena, niha ne mu sepisize Mulimu kuli mu ka sepahala ku yena. 15Kana Mulimu h'a si ka mi eza mubili ni moya u li muñwi ni yena? Mulelo wa Mulimu fo ne u li ufi? Ne li kuli lu be ni bana ba ba li batu ba Mulimu luli. Cwalehe, mu bone kuli ku si ke kwa ba nihaili a li muñwi ku mina ya sinya sepiso ya hae ku musali ya n'a nyezi a sa li yo munca. 16“Ni toile telekano,” ku bulela Mulena Mulimu wa Isilaele. “Ni toile sihulu wa ku mina h'a eza kezo ya lunya lo lu cwalo ku musal'a hae. Cwale mu tokomele kuli mu si ke mwa sinya sepiso ya mina ya ku sepahala kwa basali ba mina.”
Lizazi la katulo li fakaufi
17Mu katalisize Muñ'a Bupilo ka lipulelo za mina. Kono mu li, “Lu mu katalisize cwañi?” Ka ku bulela kuli, “Muñ'a Bupilo ya Maata Kaufela u hupula kuli ba ba eza ze maswe kaufela ba lukile. Kaniti wa ba lata.” Kamba ka ku buza kuli, “U kai Mulimu ye mu hupula kuli u lukile?”
Lozi Interconfessional Bible, Catholic Edition © Bible Society of Zambia, 2009.