Luka 6:27-49

“Kono ni bulelela mina ba ba ni utwa, ‘Mu late lila za mina. Ba ba mi toile, mu ba eze hande. Mu fuyaule ba ba mi lwaha, mi mu lapelele ba ba mi nyandisa. Ya ka ku nata fa lilama, u mu sikululele ni le liñwi hape. Ya ku ngela jansi ya hao, u si ke wa mu hanisa ku ngelela ni hembe cwalo. U fe ya ku kupa kaufela, mi u si ke wa kutisa s'o amuhilwe ki mutu. Se mu lata kuli batu ba mi ezeze, mu ba ezeze sona ni mina.’ “Haiba mu lata feela ba ba mi lata, se mu ka itumelwa ka sona ki sika mañi? Kakuli baezalibi ni bona ba lata ba ba ba lata. Mi hape haiba mu eza hande ku ba ba mi eza hande feela, mu ka itumelwa kañi? Kakuli baezalibi ni bona ba eza cwalo. Mi hape haiba mu kalima feela be mu sepile kuli ba ta mi kutiseza, mu ka itumelwa kañi? Kakuli baezalibi ni bona ba kalimana ni baezalibi ba bañwi, ka sepo ya kuli ba ta kutisezwa se ba kalimile. Kono mina, mu late lila za mina, mu ba eze hande, mi mu kalime mu sa libeleli ku kutisezwa. Mupuzo wa mina kihona u ta ba o mutuna, mi mu ta ba bana ba Muambakani ya Pahami, kakuli yena u na ni sishemo ku ba ba si na buitumelo ni ku ba ba maswe cwalo. Mu be ni sishemo sina Ndat'a mina h'a na ni sishemo. “Mu si ke mwa zuma lifoso za batu kuli Mulimu ni yena a si ke a zuma lifoso za mina. Mi mu si ke mwa atula ba bañwi kuli Mulimu a si ke a mi atula ni mina. Mu swalele, mi Mulimu u ta mi swalela ni yena. Mu fane, mi Mulimu u ta kutiseza mwa mazoho a mina se mu fanile ka litikanyo ze nde, ze katezwi, ze sheketisizwe, ze yuboka. Kakuli tikanyo ye mu fa, ki yona tikanyo ye mu ta kutisezwa.” Mi Jesu a ba bulelela nguli, a li, “Kana sibofu si kona ku etelela sibofu se siñwi? Kikuli ha li na ku y'o wela hamoho mwa musima, nji? Mulutiwa h'a fiti muluti wa hae, kono mutu kaufela h'a lutilwe hande, u ta swana ni muluti wa hae. “Kikabakalañi ha u talima katowati ka ka mwa liito la mwanahenu, kono u palelwa ku bona musumo o mwa liito la hao! U ka kona cwañi ku bulelela mwanahenu kuli, ‘Mwanesu, a lu bone, ni ku zwise katowati ka ka mwa liito la hao, kono wena kasibili u sa boni musumo o mwa liito la hao? Wena muipi, zwisa pili musumo o mwa liito la hao, mi u ta bona hande ha u zwisa katowati ka ka mwa liito la mwanahenu. “Ha ku na kota ye nde ye beya miselo ye maswe, mi hape ha ku na kota ye maswe ye beya miselo ye minde. Kota kaufela i zibahala ka miselo ya yona. Ha ku yangwi lifeiga kwa mikakani, mi ha ku yangwi makocela a veine kwa mikona. Mutu yo munde u zwisa ze nde mwa pulukelo ye nde ya pilu ya hae. Mutu ya maswe u zwisa ze maswe mwa pulukelo ye maswe ya pilu ya hae. Kakuli mulomo wa mutu u bulela se si tezi mwa pilu ya hae. “Mu ni bizezañi kuli ‘Mulena, Mulena,’ mu sa ezi se ni mi bulelela? Ni ta mi supeza ya swana ni mutu kaufela ya taha ku na, ya teeleza ze ni bulela, mi a li eza, kuli u swana ni mañi. U swana ni mutu ya yaha ndu, ya tungisize mw'a yepile, mi a y'o toma mutomo fa licwe. Mezi h'a tala, mabuba a liba ku yona ndu yeo, kono ha i si ka nyanganyiswa ki mezi kakuli ne i yahilwe hande. Kono ya utwa feela a sa ezi, u swana ni mutu ya yahile a si ka yepa mutomo. Mezi h'a tala, mabuba a liba ku yona ndu yeo, mi ya wa kapili. Sinyehelo ya ku wa kwa yona ya ba ye tuna!”