Malivi 25

Silimo sa Pumulo ili sa Busupa

(Mul 15.1-11)

1 # Mut 23.10-11 Muñ'a Bupilo a bulela ni Mushe fa Lilundu la Sinai, mi a mu fa litaelo. 2A mu laela ku fa batu ba Isilaele milao ye, a li, “Ha mu kena mwa naha y'a mi fa Muñ'a Bupilo, mu tuhele mubu u kutele ku ba tite. 3Mu ta cala masimu a mina, mu pumele mitai ya likota za veine, mi mu kutule lico za mina ka lilimo ze silezi. 4Kono silimo sa busupa ki silimo sa pumulo ya mubu ye swanezi ku tokomelwa hahulu. Ki silimo se si ketezwi Muñ'a Bupilo. Mu si ke mwa cala masimu a mina, kamba ku kolela likota za veine ka silimo seo. 5Hape, mu si ke mwa kutula nihaili lico ze imelezi feela li si ka calwa, kamba ku yanga miselo ya likota za mina ze si ka kolelwa. Ki silimo sa pumulo ya mubu ye swanezwi ku tokomelwa hahulu. 6Ka sona silimo seo, mu ta pila lico ze imelezi feela, mina, batanga ba mina, babeleki ba mina, balicaba ba ba pila ni mina. 7Limunanu za mina ni lifolofolo za mwa naheñi ze mwa naha ya mina li ta pila lico ze imelezi feela. Ku ta ciwa linto kamukana ze ta imelela mwa naheñi.

Silimo sa Jubile

8“U bale lilimo ze supile hasupile. U ta fumana kuli kaufel'a zona ki ze mashumi a mane ka ze supile ni ze peli. 9Cwale, lizazi la bulishumi la kweli ya busupa, ili lizazi le lituna la Mukiti wa Swalelo, u lume mutu ku y'o liza tolombita mwa naha kaufela. 10Wo, ki ona mukwa o mu ta keta ka ona silimo sa swalelo ni ku fa tukuluho kwa batu kaufela ba mwa naha. Ka sona silimo se, lika kaufela ze n'e lekisizwe li ta kutisezwa ku muñ'a zona kamba kwa baikulu ba hae. 11Ha mu na ku cala masimu a mina, kamba ku kutula lico ze imelezi ili zona, kamba ku kubukanya miselo ya likota za veine ze ne si ka kolelwa. 12Silimo kaufela si ta ba se si kenile ku mina. Mu ta ca feela ze imelezi mwa naheñi.

13“Ka sona silimo seo, libyana kaufela ze n'e lekisizwe li ta kutisezwa ku muñ'a zona. 14Cwale ha u lekisa simu ku Muisilaele yo muñwi kamba ku leka simu ku yena, mu si ke mwa putelelana. 15Teko ya simu i lukela ku tomwa ka ku ya ka lilimo ze likana likutulo za yona pili silimo sa Jubile ye tatama i si ka fita. 16Haiba ku sa na ni lilimo ze ñata kwapili, teko ya simu yeo i ta pahama hahulu, kono haiba ku siyezi ze nyinyani feela, fo teko i ta kuta mwatasi, kakuli se si lekiswa ki palo ya likutulo za simu yeo. 17U si ke wa puma mwanahenu wa Muisilaele, kono u sabe Muñ'a Bupilo, Mulimu wa hao.

Butata bo bu tahiswa ki Silimo sa Pumulo

18“Mu utwe milao ni litaelo za Muñ'a Bupilo, ili kuli mu te mu pile ka buiketo mwa naha. 19Naha i ta melisa lico za yona, mi mu ta ba ni ze mu tokwa ku ca kaufela, mu pile ka buiketo.

20“Kono mwendi yo muñwi a ka swana a buza kuli, ‘Ku ta ciwa sika mañi mwa silimo sa busupa ku si ka calwa masimu mi ku si na kutulo ya lico!’ 21Fo, mu si ke mwa ikalelwa ka za sico sa silimo seo, kakuli mwa silimo sa busilela Muñ'a Bupilo u ta mi fa kutulo ya lico ze ñata, mane ze likana lilimo ze talu. 22Ha mu ka cala masimu a mina mwa silimo sa busupa ni si li siñwi, mu ka na mu nze mu ca lico ze ne mu kutuzi mwa silimo sa busilela, mi mu ta ba ni lico ze mi likana ku fitela ze nca ha li kutulwa.”

Ku kutiswa kwa libyana

23“Masimu a mina a si ke a lekiselezwa, kakuli ha si a mina luli. Ki a Mulimu, mi mina mu swana feela inge bazwahule ba ba lumelezwi ku itusisa ona.

24“Ha ku lekiswa simu, tukelo ya muñ'a simu yeo ya ku i kutisa i swanezi ku zibahala. 25Haiba Muisilaele yo muñwi a fetuha mubotana, mi a hapelezwa ku lekisa simu ya hae, mwanahabo luli ki yena ya lukela ku i leka. 26Haiba ku si na wahabo ya ka i lekulula, mutu yo u ta lumelelwa ku i lekulula ili yena haiba a fumana mali. 27Mwa taba ya mufuta o cwalo, u swanezi ku lifa mutu yo, ya i lekile, tifo ya lilimo ze ne sa siyezi ku isa fa silimo sa Jubile ye tatama. Cwale fo, u kutelwa ki simu ya hae. 28Kono haiba a sa fumani mali a ku i lekululisa, i ta ba mwa maata a ya n'a i lekile ku fitela ka silimo sa Jubile ye tatama. Cwale ka sona silimo seo, kihona i ta kutela ku muñ'a yona luli.

29“Haiba mutu a lekisa ndu ye mwa munzi o potolohilwe ki lukwakwa lwa limota, u na ni tukelo ya ku i lekulula, ili mwahal'a silimo sa pili ku zwa f'a n'a i lekiselize. 30Kono haiba a sa i lekululi ka sona silimo sa pili, h'a sa na tukelo ya ku i lekulula, mi cwale ndu yeo i fetuha siluwo sa yena mutu yo ya n'a i lekile ni sa baikulu ba hae. Ndu yeo ha i sa na ku kutisezwa ku muñ'a yona ka silimo sa Jubile. 31Kono mandu a siyo mwa minzi ye mwa makwakwa a mamota, a na ni ku talimwa sina masimu. Bañi ba ona ba pili ba na ni tukelo ya ku a lekulula, mi hape a na ni ku kutiswa ka silimo sa Jubile. 32Nihakulicwalo Malivi, bona, ba na ni tukelo ya ku lekulula mandu a bona a mwa minzi ya Malivi ka nako ifi kapa ifi. 33Haiba ndu ye mwa munzi o mwahal'a lukwakwa i lekisizwe ki Mulivi, i si ka lekululwa kale, i lukela ku kutisezwa ku muñ'a yona mwa silimo sa Jubile, kakuli mandu a Malivi mwa minzi ya Maisilaele ki a bona luli kuya kuile. 34Kono naha ya mafulisezo, ye potolohile minzi ya Malivi, ha i na ku lekiswa ni kamuta. Ki ya bona kuya kuile.”

Ku kolotisa babotana

35 # Mul 15.7-8 “Haiba mwanahenu wa Muisilaele, ya pila fakaufi ni wena, a ba mubotana, mi a palelwa ku itusa ili yena, u swanezi ku mu tusa sina mo n'o ka tuseza mubeleki ili kuli a zwelepili ku pila ni wena. 36U si ke wa mu lifisa se siñwi fahalimw'a s'o n'o mu kolotisize, kono u sabe Mulimu, mi u lisele mwanahenu yo wa Muisilaele a pile fakaufi ni wena. 37#Mut 22.25; Mul 23.19-20 U si ke wa mu kolotisa mali kuli u fumane ñambeko, kamba ku mu lekisa sico ka teko ye pahami. 38Ye ki taelo ya Muñ'a Bupilo, Mulimu wa mina, ya mi zwisize mwa Egepita, ku t'o mi fa naha ya Kanana ni ku ba yena Mulimu wa mina.”

Tukuluho ya batanga

39 # Mut 21.2-6; Mul 15.12-18 “Haiba mwanahenu wa Muisilaele, ya pila fakaufi ni wena, a kenwa ki bubotana bo butuna hahulu, kuli mane a itekise ku wena ku ba mutang'a hao, u si ke wa mu sebelisa musebezi wa mutanga. 40A pile feela ni wena sina mubeleki, mi a ku sebeleze ku fitela silimo sa Jubile ye tatama. 41Ka yona nako yeo, yena ni bana ba hae ba lukuluhe, mi ba kutele kwa banabahabo bona ni kwa liluwo la bokukw'a bona. 42Batu ba Isilaele ki bona batanga ba Muñ'a Bupilo, mi ki yena ya ba zwisize mwa Egepita. Ha ba swaneli ku lekiswa kuli ba be batanga ba batu. 43U si ke wa mu nyandisa, kono u sabe Mulimu wa hao. 44Haiba mu tokwa batanga ba banna kapa ba basali, mu kona ku ba leka kwa macaba a mi potolohile. 45Hape mwa kona ku leka bana ba balicaba ba ba pila mwahal'a mina. Bana bao ba ba pepezwi mwa naha ya mina ba be batu ba mina. 46Mu ka na mwa ba siyela bana ba mina kuli ba ba yole, ili kuli ba ba sebeleze mwa bupilo bwa bona kaufela. Kono mu si ke mwa nyandisa Maisilaele ba habo mina.

47“Mulicaba kapa mubeleki ya pila ni wena wa kona ku fuma, mi mwanahenu wa Muisilaele, yena, a li mubotana, kuli mane a itekise sina mutanga ili yena ku mulicaba kamba ku mubeleki yo. 48Mwamulaho a ku itekisa cwalo, u sa na ni tukelo ya ku lukululwa. 49U kona ku lukululwa ki mwanahabo, malum'ahe, mwan'a kaizel'a ndat'ahe, kamba yo muñwi wa mwa mba ya bona. Haiba yena kasibili a fumana mali a likana, a ka kona ku itukulula ili yena. 50Ka ku lumelelana ni y'a n'a mu lekile, u lukela ku bala lilimo ku zwa f'a n'a itekiselize ku fitela silimo sa Jubile ye tatama, mi cwale a tome teko ya tukuluho ya hae ka ku latelela mali a holwa ki mubeleki. 51U swanezi ku kutisa kalulo ye tuna ya teko, haiba ku siyezwi lilimo ze ñata. 52Haiba ku siyezwi lilimo ze ñwi feela, u swanezi ku kutisa kabelo ye nyinyani ya teko. 53U batisise s'a n'a ka lifa ka ku latelela mali a holwa ki mubeleki, silimo ni silimo, ka lilimo ze siyezi. Mi mulen'a hae a si ke a mu nyandisa. 54Haiba a sa lukuluhi ka o muñwi wa mikwa yeo, yena ni bana ba hae ba lukela ku lukuluha ka silimo sa Jubile ye tatama. 55Mu mamele milao ye, kakuli batu ba Isilaele ki batanga ba Muñ'a Bupilo. U ba zwisize mwa Egepita. Ki yena Muñ'a Bupilo, Mulimu wa bona.”

Currently Selected:

Malivi 25: Lozi09

Highlight

Copy

Compare