Malivi 18

Mikwa ya linyalo ye hanisizwe

1Muñ'a Bupilo a fa Mushe litaelo. 2Mushe n'a na ni ku bulelela batu ba Isilaele, kuli, “Ki na Muñ'a Bupilo, Mulimu wa mina. 3Mu si ke mwa latelela mikwa ya batu ba Egepita, ko ne mu inanga, kapa ya batu ba mwa naha ya Kanana ko ni mi isa cwale. 4Mu utwe litaelo za ka mi mu eze ze ni mi laela. Ki na Muñ'a Bupilo, Mulimu wa mina. 5#Neh 9.29; Ezek 18.9; 20.11-13; Luk 10.28; Baro 10.5; Magal 3.12 Mu latelele mikwa ni litaelo ze ni mi fa, mi ka ku eza cwalo mu ta pila. Ki na Muñ'a Bupilo.”

6Muñ'a Bupilo a fa milao ye, ye li, “U si ke wa fosa ni mutu kaufela ye li wa henu. 7U si ke wa swabisa ndat'aho ka ku fosa ni m'aho. U si ke wa swabisa m'aho. 8#Malivi 20.11; Mul 22.30; 27.20 U si ke wa swabisa ndat'aho ka ku fosa ni yo muñwi wa basali ba hae. 9#Malivi 20.17; Mul 27.22 U si ke wa fosa ni kaizel'a hao, kamba kaizel'a hao y'o kopanezi ni yena ku ndat'aho, i ka ba y'o hulezi ni yena mwa ndu i liñwi kamba ya hulezi ku sili. 10U si ke wa fosa ni mwikulyowe. Fo, i ka ba nto ye swabisa hahulu ku wena. 11U si ke wa fosa ni kaizel'a hao y'o kopanezi ni yena ku m'aho. U mu nge sina kaizel'a hao. 12#Malivi 20.19-20 U si ke wa fosa ni ndat'aho wa musali, kakuli ki wahabo ka mali. 13U si ke wa fosa ni munyan'a m'aho, kakuli ki wa habo ka mali. 14U si ke wa fosa ni musal'a malum'aho. U na ni ku mu nga sina kaizel'a ndat'aho kamba m'aho. 15#Malivi 20.12 U si ke wa fosa ni musal'a mwan'a hao. 16#Malivi 20.21 U si ke wa fosa ni mulamowe. 17#Malivi 20.14; Mul 27.23 U si ke wa fosa ni mwana kapa muikulu wa musali y'o n'o fosize ni yena. Mwendi ki wahabo ka mali ni ku eza cwalo ki butola. 18U si ke wa nyalana ni muhulwan'a musal'a hao, musal'a hao a sa pila.

19 # Malivi 20.18 “U si ke wa fosa ni musali h'a keluhile, kakuli u silafezi. 20#Malivi 20.10 U si ke wa fosa ni musal'a mutu kakuli nto yeo i ta ku silafaza. 21#Malivi 20.1-5 U si ke wa lumelela yo muñwi wa bana ba hao ku ezwa sitabelo ku mulimu ya bizwa Muloke, kakuli kezo yeo i ta tompolola libizo la Mulimu. Ki yena Muñ'a Bupilo. 22#Malivi 20.13 Munna a si ke a fosa ni munna yo muñwi sina mw'a ezeza ni musali. Ki kalombe. Mulimu h'a lati cwalo. 23#Mut 22.19; Malivi 20.15-16; Mul 27.21 Ha ku na munna kapa musali ya ka fosa ni folofolo. Kezo ye maswe hahulu cwalo ya ku silafaza luli.

24“Mu si ke mwa isilafaza ka likezo zeo kaufela. Wo ki ona mukwa o ne ba isilafazanga ka ona bahedeni ba ba ne ba pila mwa naha ye, mu si ka taha kale, mi bao cwale Muñ'a Bupilo wa ba leleka kuli mina mu t'o pila mwateñi. 25Likezo za bona li silafalize naha, mi cwale Muñ'a Bupilo u i utwisize butuku ni ku i kauhanya ni batu ba ba ne ba pila ku yona. 26Ne ba eza lika ze maswe hahulu ze kaufela, mi mane ba silafalize naha. 27Kono mina, mu ta buluka milao ni litaelo za Muñ'a Bupilo, mi ha ku na wa ku mina, i ta ba Muisilaele kamba muzwahule ya pila mwahal'a mina, ya ta li eza. 28Ka ku buluka milao yeo, lifasi ha li na ku mi hana sina mo ne li hanezi bahedeni ba ba ne ba pila mwateñi mu si ka taha kale. 29Mwa ziba hande kuli mutu kaufela ya ta eza lika ze maswe cwalo h'a sa na ku balelwa kwa batu ba Mulimu.”

30Cwale Muñ'a Bupilo a li, “Mu buluke milao ye ni mi fa, mi mu si ke mwa latelela mikwa ya batu ba ba ne ba pila mwa naha ye, mu si ka taha kale. Mu si ke mwa isilafaza ka ku eza lika zeo kamukana. Ki na Muñ'a Bupilo, Mulimu wa mina.”

Currently Selected:

Malivi 18: Lozi09

Highlight

Copy

Compare