Joshua 16
16
Naha ye filwe ba Eferaimi
1Museto wa naha ye n'e filwe baikulu ba Josefa n'o kalela kwa Nuka ya Jordani fakaufi ni Jeriko. N'o fita mwa lihalaupa ni mwa naha ya malundu, mane ku y'o fita kwa Betele. 2Ku zwa Betele, n'o kena Luzi, mane ku y'o fita kwa Ataroti, ko ne ba pila Maariki. 3Ku zwa fo wa liba kwa wiko, kwa sibaka sa Majafeleti, ku y'o fita kwa mahwatata a Beti-Horoni. Hape, ku zwa fo, wa liba kwa Gezeri, mi wa y'o felela fa Liwate la Mediteranea.
4Baikulu ba Josefa, ili masika a Manase ni Eferaimi, ba amuhela naha yeo kuli i be ya bona.
5Ye, n'e li yona naha ya ba limba za Eferaimi. Museto wa bona wa kwa upa, i n'e li Ataroti-Adari, ku y'o fita kwa Beti-Horoni. 6Ku zwa fo, museto n'o liba kwa Liwate la Mediteranea. Munzi wa Mikametata n'o li kwa mutulo. Kwa upa, museto wa sikamela kwa Taanati-Shilo, mi wa fitelela kwa neku la upa ku y'o fita kwa Janoa. 7Cwale museto wa zwa Janoa, mi wa shetumukela kwa Ataroti ni Naara. Wa y'o fita kwa Jeriko, ni ku y'o felela kwa Nuka ya Jordani. 8Cwale museto wa liba kwa wiko ku zwa Tapua ku ya kwa nukana ya Kana, mi wa y'o felela kwa Liwate la Mediteranea. Ye, ki yona naha ye n'e filwe ba limba za lusika lwa Eferaimi. 9Ne ba filwe hamohocwalo ni minzi ni minzinyana ye n'e filwe ba lusika lwa Eferaimi, ili minzi ni minzinyana ye n'e potolohilwe ki wa Manase. 10#Baat 1.29 Kono, ha ba si ka leleka Makanana ba ba ne ba li mwa Gezeri, mi kamukwaocwalo, Makanana ba pila ni Maeferaimi ku fitela ni kacenu le, kono ba hapelezwa ku sebeza sina batanga.
Lozi Interconfessional Bible, Catholic Edition © Bible Society of Zambia, 2009.