Joele 2
2
Linzie ki temuso ya lizazi la Muñ'a Bupilo
1Mu lize pala,
mu tabe mukosi fa Sione,
lona lilundu la Mulimu le li kenile.
Mu ngangame, mina batu ba Juda,
kakuli Lizazi la Muñ'a Bupilo
li se li atumezi.
2Li ta ba lizazi la lififi,
lizazi la bumaswe,
la bunsu ni malu.
Mpi ye tuna ya nzie
i sutelela
sina lififi le li kwahela malundu.
Ha ku sa li ku simuluha,
ha ku si ka ba ni nto ye cwalo,
mi ha ku sa na ku ba cwalo
ni kamuta.
3Nzie i feza limela kaufela
sina mulilo.
Pili i si ka taha yona
naha ne i kateleha
inge simu ya Edeni,
kono mo se i fitile,
naha ki lihalaupa feela
le li si na se siñwi.
Ha ku na se si ka banduka ku yona.
4 #
Sin 9.7-9
I bonahala inge lipizi,
mi i mata sina lipizi za ndwa.
5Ha i tulaka fahalimw'a malundu,
i luma inge likoloi kamba mulilo
wa lubya fa bucwañi bo bu omile.
I mwa mibamba inge mpi ye tuna
ye itukiselize ku lwana.
6Ha i sutelela, mutu ni mutu
wa ngangama.
Lipata za batu kamukana li sosobana
ka sabo.
7I lwana inge batabani.
I pahama fahalimw'a mamota
inge masole.
I zwelapili hamoho,
mi fo i libile ha i sikuluhi.
8Ha i kenelani mwa mibamba.
I punya makwakwa,
ku si na se si i yemisa.
9I matela mwa munzi.
I tula mamota,
i pahama fahalimw'a mandu,
mi i kenela fa mahaulo sina masholi.
10 #
Sin 8.12
Ha i taha, lifasi la nyanganya,
mi lihalimu la ngangama.
Lizazi ni kweli za unsufala,
mi linaleli ha li sa benya.
11 #
Sin 6.17
Muñ'a Bupilo u laela makuta a hae.
Makuta a' mu utwa ki a mañata
mi a maata.
Ha si mo li sabiseza lizazi
la Muñ'a Bupilo!
Ki mañi ya ka li banduka?
Sicaba si bake
12Muñ'a Bupilo u li,
“Nihaiba ka nako ye,
mu bake ka lipilu za mina kaufela,
mi mu kutele ku na,
ka ku itima lico, ku lila,
ni ku silisa.
13Mu bonise maswabi a mina ka lipilu
ze lobehile,
isiñi ku pazaula feela liapalo
za mina.”
Mu kutele ku Mulena Mulimu wa mina.
U na ni musa mi u mukekecima.
U lukile mi u buluka sepiso ya hae.
Kamita u itukiselize ku swalela,
isiñi ku utwisa butuku.
14Mwendi Mulena Mulimu wa luna
u ka cinca muhupulo wa hae,
mi a mi fuyaule ka ku mi fa lico
ze ñata hahulu.
Kihona mu ta kona ku mu ezeza
litabelo za lico ni waine.
15Mu lize tolombita fa Lilundu
la Sione.
Mu laele kuli batu ba itime lico,
mi mu ba bizeze kwa mukopano!
16Mu kopanye batu hamoho,
mu ba lukiseze sebelezo ye kenile,
mu bize ba bahulu,
mi mu kopanye banana ni limbututu
cwalo.
Nihaili ba ba mwa mukiti wa sinawenga,
ba siye mandu a bona mi ba tahe.
17 #
1 Mak 7.36-38
Baprisita ba ba sebeleza
Muñ'a Bupilo
ba lilele mwahal'a katala ni makenelo
a Tempele ni ku lapela, ba li,
“Muñ'a Bupilo,
u shemube batu ba hao.
U si ke wa tuhelela macaba a mañwi
a lu nyefula ni ku lu sheununa,
a li, ‘Mulimu wa mina u kai?’ ”
Sicaba si kutela ku pila hande
18Cwale Muñ'a Bupilo a utwela naha
ya hae butuku
mi a shemuba batu ba hae.
19Muñ'a Bupilo a ba alaba, a li,
“Cwale ni ka mi fa lico, waine
ni mafula, mi mu ka pila hande.
Macaba a mañwi
h'a sa na ku mi nyefula
ni kamuta.
20Ni ka zwisa mpi ya nzie ye zwa
kwa mutulo
mi ni ka lelekela ye ñwi
mwa lihalaupa.
Mibamba ya yona ya kwa pili
i ta isiwa mwa Liwate la Lizwai,
mi mibamba ya kwamulaho
i ta isiwa mwa liwate la kwa wiko.
Litupu za yona li ta nunka.
Ni ta ba sinya
bakeñisa ze ba ezize kaufela ku wena.
21“Mina masimu, mu si ke mwa swaba.
Mu tabe mi mu nyakalale,
kabakala z'a mi ezelize Muñ'a Bupilo.
22Lifolofolo, mu si ke mwa saba.
Mabala s'a na ni bucwañi bo butala.
Likota se li beya miselo.
Mi se ku na ni lifeiga ni miselo
ya veine ye miñata.
23“Mu tabe, mina batu ba Sione.
Mu nyakalale,
kabakala s'a mi ezelize
Mulena Mulimu wa mina.
U mi file pula ye ñata ya mafelelezo.
U mi neliselize pula ya litabula
ni pula ya maseulo sina kamita.
24Lihoto li ka tala mabele.
Misima ye fakaufi ni lilubelo
i ka fufula ya waine ni mafula.
25Ni ta mi kutiseza ze ne mu sinyehezwi
mwa lilimo ze ne mu falalizwe ki nzie.
N'e li na, ya n'a mi lumezi mpi yeo
ku t'o mi lwanisa.
26Cwale mu ka ba ni lico ze ñata hahulu
mane mu ce mo mu konela.
Mu ka lumbeka Muñ'a Bupilo,
Mulimu wa mina,
ya mi ezelize linto kamukana
ze komokisa.
Batu ba ka ha ba sa na ku nyefulwa
hape ni kamuta.
27Cwale, Isilaele,
mu ta ziba kuli ni mwahal'a mina,
ni kuli na, Muñ'a Bupilo,
ni Mulimu wa mina,
mi ha ku na yo muñwi hape.
Batu ba ka ha ba sa na ku nyefulwa
hape.”
Lizazi la Muñ'a Bupilo
28 #
Lik 2.17-21
“Kasamulaho ni ka sela moya wa ka
kwa batu kamukana.
Bana ba mina ba bashimani
ni ba basizana ba ka polofita,
banna-bahulu ba mina ba ka lola
litolo,
mi micaha ya mina i ka bona lipono.
29Ka yona nako yeo ni ka sela moya
wa ka nihaili kwa batanga ba banna
ni ba basali.
30“Ni ka tahisa litemuso la lizazi leo,
mwa lihalimu ni fafasi.
Ku ka suluha mali, ku be ni mulilo
ni malu a musi.
31 #
Mat 24.29; Mar 13.24-25; Luk 21.25; Sin 6.12-13 Lizazi li ka unsufala,
mi kweli i ka fetuha bufubelu
sina mali
pili lizazi le lituna
le li sabisa la Muñ'a Bupilo,
li si ka taha.
32 #
Baro 10.13
Kono batu kaufela ba ba kupa tuso
ya Muñ'a Bupilo ba ta piliswa,
sina Muñ'a Bupilo h'a ize:
‘Ku ta ba ni ba ba ta banduka
mwa Jerusalema.
Be ni ketile ba ta puluswa.’ ”
Lozi Interconfessional Bible, Catholic Edition © Bible Society of Zambia, 2009.