Isaya 48
48
Mulimu ki Mulena wa ze sa taha
1A mu utwe taba ye,
ba sicaba sa Isilaele,
mina ba ba simuluhile ku Juda.
Mu konka ka libizo la Muñ'a Bupilo,
mi mu ipiza ba ba lapela Mulimu
wa Isilaele,
kono ha mu talusi ze mu bulela.
2Mi hape mwa ikuhumusa mu li
mu batu ba munzi o kenile,
ni kuli mu sepile Mulimu wa Isilaele,
yo libizo la hae
ki Mulena ya Maata Kaufela.
3Muñ'a Bupilo u li kwa Isilaele,
“Ni polofitile kale ze ne ta ezahala,
mi ni li ezize kapili!
4Ne ni ziba kuli u ta ba muhanyezi,
ya tata sina sipi,
ya sa fetuhi sina kopa.
5Ni polofitile za hao kale-kale,
ni nze ni zibisa lika ze ta ezahala
pili li si ka bonahala,
ili kuli u si ke wa bulela ni kamuta
kuli li ezizwe ki milimu ya hao,
kamba kuli li ezizwe ki maswaniso
a hao a lisipi.
6“Ze ni bulezi pili cwale za ezahala
kaufela.
U lumele kuli bupolofita bwa ka
ki bwa niti.
Cwale ni ta ku bulelela ze nca
ze ka taha,
lika ze ni si ka bonahaza kale.
7Kihona ni ta eza kuli li ezahale
cwale.
Pili, ha ku si ka ba ni ze swana
ni zona.
Kabe li bile teñi,
kana n'o ka na wa itumba
kuli n'o li zibile kamukana.
8Ne ni ziba kuli n'o sa sepiwi,
kuli ku zwa f'o pepezwi
u bile mufetuheli.
Kikabakaleo ha u si ka li utwa
ni kamuta,
ha ku si na linzwi l'o utwile
mwa lizebe.
9“Kuli batu ba lumbe libizo la ka,
ni liyeha ku halifa.
Na iswala, mi ha ni na ku ku sinya.
10Ni ku likile mwa mulilo
wa manyando,
sina silivela mo i kenisezwa
mwa liyonga.
Kono ni fumani kuli ha u na tuso.
11Se ni eza,
ni si eza kabakala ka feela.
Ha ni na ku lumela kuli libizo la ka
li shwaulwe,
kamba kuli mutu a fiwe bulena
bo bu swanezi ku ba bwa ka,
bwa ka feela ni nosi.
Sirusi mueteleli ya ketilwe ki Muñ'a Bupilo
12 #
Isa 44.6; Sin 1.17; 22.13 “U ni teeleze, Isilaele,
mina batu ba ni bizize!
Ki na Mulimu, wa pili
ni wa mafelelezo, Mulimu a li muñwi!
13Mazoho a ka a ezize mutomo
wa lifasi,
mi a bapuzi mahalimu.
Ha ni biza lihalimu ni lifasi,
li taha kapili, mi za itahisa ku na!
14“A mu kopane mi mu teeleze,
kaufel'a mina!
Ha ku na o muñwi wa milimu o konile
ku bulela
kuli mutu ye ni ketile u ka lwanisa
Babilona.
U ta eza se ni bata kuli a si eze.
15Ki na ya bulezi ni ku mu biza.
Ni mu etelezi, mi ni mu file ku tula.
16“Cwale a mu sutelele fakaufi,
mi mu utwe se ni bulela.
Ni bulezi ni mina patalaza ku zwa
kwa makalelo,
mi manzwi a ka kamita a kile
a ba a niti.
Mi cwale na, Muñ'a Bupilo,
se ni lumile ya ka mi pilisa.”
Mulelo wa Muñ'a Bupilo ka sicaba sa hae
17Mulimu ya Kenile wa Isilaele, Muñ'a Bupilo, muliululi wa hao, u li,
“Ki na Muñ'a Bupilo, Mulimu wa hao,
ya bata ku ku luta ze ku swanela,
ni ku ku libisa k'o swanezi ku ya.
18“Kambe n'o utwile litaelo za ka!
Kamba n'o suluhezwi ki limbuyoti
sina mulapo a sa kali!
Kambe n'o konile ku tula
ka maata a swana ni a mandinda
a liwate.
19Baikulu ba hao ne ba ka ata
sina mushabati,
mi ne ni ta bona
kuli ba si ke ba bulaiwa ni kamuta.”
20 #
Sin 18.4
A mu zwe mwa Babilona,
mu zamaye mu lukuluhile!
Mu huweleze litaba ka tabo.
Mu li zibahaze kai ni kai,
“Muñ'a Bupilo u pilisize Isilaele
mutang'a hae!”
21Muñ'a Bupilo h'a fitisa batu ba hae
mwa lihalaupa le li cisa,
le li omelezi,
ha ba si ka nyandiswa ki linyolwa.
A ba bubiseza mezi a zwa mwa licwe.
A pazula licwe fahali, mi mezi a zwa.”
22 #
Isa 57.21
Muñ'a Bupilo u li,
“Kwa baezalibi ha ku na maipato.”
Lozi Interconfessional Bible, Catholic Edition © Bible Society of Zambia, 2009.