Isaya 32
32
Mubuso sakata
1Zazi le liñwi ku ta ba ni mulena ya lukile, ni manduna ba ba busa ka mulao. 2Yo muñwi ni yo muñwi wa batu u ta swana ni mukunda wa moya ni sibaka sa ku ipata kwa liñungwa. Ba ta swana ni tunukana to tu buba mwa lihalaupa, sina muluti wa licwe-tuna mwa naha ye omelezi. 3Meeto ni lizebe za bona li ta bona ni ku utwa ze batiwa ki batu ba bañwi. 4Ha ba sa na ku ba ni lipilu ze bubebe, kono ba ta eza ka kutwisiso. Lilimi la ba sikukuma li ka bulela hande. 5Ha ku na mutu ya ta hupula kuli batu ba likuba ba kutekeha, kamba ku bulela kuli matanya ba sepahala. 6Mutu wa sikuba u bulela za bukuba feela, mi u hupula ku eza lika ze maswe. Z'a eza ni z'a bulela ki kashwau ku Muñ'a Bupilo, mi h'a uti ni kamuta ba ba lapile kamba ku nwisa ba ba nyolilwe. 7Ki mutu ya maswe, mi u eza ze maswe. U lela ku sinyeza babotana ka buhata ni ku ba tibela ku fumana liswanelo za bona. 8Kono mutu ya sepahala u eza lika ka busepahali, mi ku ze lukile wa tiya luli.
Katulo ni ku kutiswa
9Mina basali ba ba ipilela ka bunolo, ba ba si na se si ba kataza, mu teeleze se ni bulela. 10Mu ka na mwa iketa ka nako ye, kono isaho ka yona nako ye, mu ta zieleha kakuli ha ku na ku ba ni miselo ya veine ye mu ta yangula. 11Mu kile mwa ipilela ka bunolo, mu si na se si mi kataza, kono cwale, mu kuñe ka sabo! Mu tubule liapalo za mina, mi mu icolete mahalaswana mwa liteka. 12Mu inate fa lifuba ka maswabi, kakuli masimu a nunile ni masimu a likota za veine a sinyizwe. 13Mi mwa naha ya batu ba ka se ku melile mikakani ni mikona. Mu lilelele mandu kamukana mo ne ku na ni batu ba ba tabile. Mu lilelele munzi mo ne ku pilwa hande. 14Mandu a bulena mane ni ona muleneñi kasibili li ta sabelwa. Mandu ni litawa za balibeleli i ta ba matota kuya kuile. Mo, ku ta na ku pila lipizi za mwa naheñi, mi lingu li ta fumana mwateñi mafulelo.
15Kono Mulimu hape u ta lu lumela moya wa hae. Naha ye otile i ta nuna, mi masimu a ta tahisa lico ze ñata. 16Kai ni kai mwa naha ku ta zamaiwa ka mulao ni ka ku luka. 17Kakuli mañi ni mañi u ta eza se si lukile, ku ta ba ni kozo ni buiketo kuya kuile. 18Minzi ya batu ba Mulimu i ta ba ni kozo ni buiketo, mi ha i na ku katazeha. 19Mwendi simbwewewe si ta wela mwa mishitu, mi munzi u ta tubiwa. 20Nihakulicwalo mutu kaufela u ta tabela ku ba ni mezi a mañata kwa lico z'a limile, ni mafulelo a mande a limbongolo ni likomu.
Lozi Interconfessional Bible, Catholic Edition © Bible Society of Zambia, 2009.