Isaya 28
28
Temuso kwa mubuso wa kwa mutulo
1U maibile mubuso wa Isilaele! Bulena bwa ona bu fela sina likuwani za lipalisa ze kwa litoho za baeteleli ba matahwa. Litoho za bona ze tezi buikuhumuso li tozizwe miinko, kono ki bani ba lapalalile ba nze ba kozwi. 2Muñ'a Bupilo u na ni mutu ya tiile, ya maata, ya itukiselize ku t'o ba lwanisa. U ka taha sina pula ya simbwewewe, sina pula ya ñuli, sina mezi a buba a muunda o mutuna o taza naha kaufela. 3Buikuhumuso bwa baeteleli ba matahwa bao bu ta hatikelwa ka mahutu. 4Bulena bo bu ya bu nze bu fokola bwa baeteleli bao ba ba ikuhumusa bu ta fela ku felelela, sina miselo ya pili ya lifeiga ze kulumunwa ni ku ciwa li sa z'o buzwa feela.
5Lizazi la taha foo Muñ'a Bupilo ya Maata Kaufela a ta ba sina mukabo o munde wa lipalisa kwa litoho za batu ba hae ba ba ta siyala. 6U ta fa zibo ya likatulo ku ba ba li baatuli, ni bundume ku ba ba leleka lila ze t'o lwanisa minyako ya munzi.
Isaya ni matahwa ba bapolofita ba Juda
7Nihaili bapolofita ni baprisita ba kolwa mane ba tantalika. Ba nwile hahulu waine ni bucwala, mane ba sitatala ka ku sa ziba se ba eza. Bapolofita ba kozwi hahulu mi ba palelwa ku utwisisa lipono z'a ba lumela Mulimu, mi baprisita ba kozwi hahulu mane ba palelwa ku atula litaba ze ba tiselizwe. 8Fa litafule kaufela fo ba ina ku tezi mataza, mi ha ku na fo ku kenile.
9Ba bilaela ka na, ba li, “Mutu yani u hupula kuli u luta sika mañi? Ki mañi ya tokwa tuto ya hae? Ki ye nde feela kwa banana ba ba sa z'o kwa! 10U lika ku lu luta taku ka taku, mubamba ka mubamba, ni tuto ka tuto.”
11 #
1 Bakor 14.21
Haiba mu sa ni teelezi, Mulimu u ta itusisa bazwahule ku mi luta tuto ka manzwi a sa utwahali. 12Kaufel'a mina u mi tiselize pumulo ni buiketo, kono mu hanile ku mu utwa. 13Kikabakaleo Muñ'a Bupilo h'a ta mi luta taku ka taku, mubamba ka mubamba, ni tuto ka tuto. Mu ta sitatala ka muhato o muñwi ni o muñwi o mu eza. Kabakaleo mu ta holofala, mu swasiwe, mi mu eziwe mapantiti.
Licwe la Sione la mwa lilulu
14Cwalehe, mina batu ba ba ipahamisa, ba ba busa batu mo mwa Jerusalema, mu teeleze s'a bulela Muñ'a Bupilo. 15#But 1.16; Litu 14.12 Mwa ikuhumusa, mu li, “Lu ezize tumelelano ni lifu, mi lu fitile fa ku lumelelana ni lifasi la ba ba shwile. Ziezi ha i ka taha i ta lu kekuluha kakuli lu ka silelezwa ki buhata ni bupumi!” 16#Lipi 118.22-23; Baro 9.33; 10.11; 1 Pit 2.6 Cwalehe, s'a bulela Muñ'a Bupilo, ki se, u li, “Ni beya mutomo wa Sione, ili o tiile, o tata. Ku ona ni beya licwe le litata la mwa lilulu fo ku ñozwi manzwi a, a li, ‘Tumelo ye tiile hape i na ni pilu-telele.’ 17Muhala o ta yahisa mutomo ki niti, mi ku luka i be muhala o yemisa hande limota ha li obama.”
Kono pula ya simbwewewe i ta fiyela buhata kaufela bo mu itingile ku bona, mi muunda u ta sinya buiketo bwa mina.
18Tumelelano ye mu ezize ni lifu i ta feliswa, mi ku lumelelana kwa mina ni lifasi la ba ba shwile ku ta takulwa. Ziezi ha i ta fita mu ta komiwa. 19I ta mi nata hape ni hape, ka zazi ni zazi. Mu ta itiisa cwalo musihali ni bushihu. Taba kamukana ye nca ye zwa ku Mulimu i ta tisa cwalo sabo ye nca. 20Mu ta swana ni mutu ya bulelwa mwa nguli, ya n'a lika ku lobala fa bulobalo bo bukuswani a nz'a apezi kubo ye nyinyani hahulu. 21#Josh 10.10-12; 2 Sam 5.20; 1 Lita 14.11 Muñ'a Bupilo u ta lwana sina mw'a n'a ezelize kwa Lilundu la Perazimi ni mwa Musindi wa Gibioni, kuli a eze s'a hupuzi ku si eza, ili zona likezo za hae ze komokisa. U ta feza musebezi wa hae, mi musebezi wo ha u koni ku utwisiswa.
22Mu si ke mwa seha temuso ye ni mi fa yona! Ha mu ka eza cwalo, ku ta mi bela tata hahulu kuli mu banduke. Ni utwile mulelo wa Muñ'a Bupilo ya Maata Kaufela wa ku sinya lifasi kamukana.
Butali bwa Mulimu
23Mu utwe se ni bulela. Mu ise lipilu ku ze ni mi taluseza. 24Ha ku na mulimi ya nz'a lima masimu a hae kuya kuile, ni ku a lukiseza ku caliwa. 25Ha s'a puputile makwese, u cala lipeu ze swana sina aneta ni kumini. U cala mibamba ya buloto ni mabele, mi kwa matuko a masimu a hae u cala lipeu ze ñwi hape. 26Wa ziba mw'a ezeza musebezi wa hae, kakuli u lutilwe ki Mulimu. 27H'a sebelisi mulamu o bukiti ku pulisa aneta ni kumini, kono u sebelisa tukota to tu bubebe twa tikanyo ye swanela. 28H'a sinyi buloto ka ku swalelela cwalo ku pula. U ziba ku pula buloto ka ku zamaisa fateñi koloi a sa sinyi lico. 29Butali bo kaufela bu zwa ku Muñ'a Bupilo ya Maata Kaufela. Milelo y'a eza Mulimu ki ya butali, mi kamita ya konda.
Lozi Interconfessional Bible, Catholic Edition © Bible Society of Zambia, 2009.