Isaya 26
26
Mulimu u fa batu ba hae maata a ku tula
1Lizazi la taha batu ha ba ta opela pina ye mwa naha ya Juda, ba li:
Munzi wa luna u maata!
Mulimu kasibili u sileleza
makwakwa a ona!
2A mu kwalule minyako ya munzi
mi sicaba se si sepahala si kene,
sicaba sa batu ba ba eza ze lukile.
3Wena, Muñ'a Bupilo,
u fa kozo ye kondile
ku ba ba itingile ku wena,
mi ba beile sepo ya bona ku wena.
4A mu sepe Muñ'a Bupilo kuya kuile.
U ta lu sileleza kamita.
5U kokobelize ba ba ne ba ikuhumusa,
u sinyize munzi o tiile mo ne ba pila,
mi u wiselize makwakwa a bona fafasi.
6Ba ba ne ba nyandiswa,
cwale ba zamaya fahalimw'a ona
mi ba u hatikela ka mahutu a bona.
Ku lumbekwa ku luka kwa Mulimu
7Muñ'a Bupilo, u lukiseza batu
ba ba lukile nzila ye nde.
Nzila ye ba zamaya ku yona i patami.
8Lu latelela tato ya hao,
mi lu beya sepo ya luna ku wena.
Ki wena feela ye lu tokwa.
9Busihu ni nze ni ku shukezwi ka pilu
ya ka kaufela.
Ha u atula lifasi ni batu ba lona,
kaufela ba ta ituta mulao m'o inezi.
10Niha u na ni mukekecima
kwa batu ba ba maswe,
bona ha ba ituti ku eza hande.
Nihaili mo, mwa naha ya batu
ba ba lukile, ba sa fosa.
Ba hana ku lemuha butuna bwa hao.
11 #
Maheb 10.27
Lila za hao ha li zibi
kuli u ta li utwisa butuku.
Muñ'a Bupilo, u ba swabise, ba nyande,
ba nyandiswe ki tupa y'o lukisize.
U ba bonise mo u latela batu ba hao.
12Muñ'a Bupilo, u ta lu fa buiketo.
Ze lu lika ku eza kamukana
ki wena ya lu ezisa zona.
13Muñ'a Bupilo, Mulimu wa luna,
lu busizwe ki ba bañwi,
kono ki wena Mulen'a luna,
wena u nosi.
14Cwale ba shwile,
mi ha ba sa na ku pila hape.
Mioya ya bona ha i sa na ku zuha,
kakuli u ba utwisize butuku,
mi u ba bulaile.
Ha ku sa na ya ba hupula.
15Muñ'a Bupilo, u hulisize sicaba
sa luna,
u ekelize naha ya luna kwa maneku
kaufela,
mi zeo li ku tiselize likute.
16Muñ'a Bupilo, u utwisize batu
ba hao butuku,
mi ba ku lapezi mwa ñalelwa
ya bona.
17Ki wena, Muñ'a Bupilo,
ya lu lilisize,
sina musali ya indukilwe h'a liliswa
ki butuku.
18Ne lu utwa butuku,
mi ne lu li mwa ñalelwa,
kono ha ku na se lu pepile.
Ha lu si ka tula ndwa mwa naha
ya luna,
mi ha ku na se lu konile ku eza.
19 #
Dan 12.2
Ba ku luna ba ba shwile ba ta pila
hape!
Litupu za bona li ta zuha!
Ba ba lobezi mwa mabita a bona kaufela
ba ta zuha mi ba opele ka tabo!
Sina puka ha i wetulula lifasi,
Muñ'a Bupilo u ta wetulula cwalo
ni batu ba hae, ba ba shwile kale.
Katulo ni ku kutiswa
20Batu ba ka, a mu kene mwa mandu a mina, mi mu ikwalele mwateñi. Mu ipate nakonyana ku fitela buhali bwa Mulimu bu fela. 21Muñ'a Bupilo wa taha ku zwa kwa lihalimu ku t'o nata batu ba ba pila fafasi, kabakala libi za bona. Lipulao ze ne ezelizwe kwa mukunda mwa lifasi li ta bonahazwa, mi mubu ha u sa na ku pata ba ba bulailwe.
Lozi Interconfessional Bible, Catholic Edition © Bible Society of Zambia, 2009.