Isaya 22
22
Taba bakeñisa Jerusalema
1Ki ye taba ye bulezwi bakeñisa Musindi wa Lipono.
Ku ezahalañi? Kikabakalañi batu kaufela ba munzi ha ba eza mikiti fa lituwa za mandu a bona? 2Munzi kaufela u mwa mufili-fili. U tezi lilata ni ku nyakalala.
Batu ba mina ba ba shwile mwa ndwa ye, ha ba si ka shwa ba nze ba lwana. 3Baeteleli ba mina kamukana ba sabile, mi ba hapiwa ba si ka posa nihaili lisho li li liñwi. 4Cwale mu ni tuhele ni silise ni li nosi. Mu si ke mwa lika ku ni omba-omba, ni nze ni shwezwi ki bahesu ba bañata cwana. 5Ye, ki nako ya ñalelwa, ya ku tulwa ni ku filikana mwa Musindi wa Lipono, mi ze kaufela lu li lumelezwi ku Muñ'a Bupilo ya Maata Kaufela, Mulimu wa Isilaele. Makwakwa a munzi wa luna a wiselizwe fafasi, ni sililo sa ku kupa tuso si utwahalile mwa malundu.
6Masole ba ba zwa mwa naha ya Edomo ba taha ba pahami fa lipizi, ba sweli buta ni masho. Masole ba mwa naha ya Kiri ba lukisize litebe za bona. 7Misindi ye nunile ya mwa Juda i tezi likoloi, mi masole ba ba fa lipizi ba yemi kwa minyako ya Jerusalema. 8Lisilelezo za Jerusalema kamukana li zwsizwe.
Zeo ha li ezahala, mu zwisize lilwaniso mwa pulukelo. 9Mu fumani libaka fo lu tokwa ku lukiswa lukwakwa lwa Jerusalema. 10Mu balile mandu a mwa Jerusalema kaufela, mane mu tubile a mañwi kuli mu fumane macwe a ku lukisisa mamota a munzi. 11Mu ezize lisa mwahal'a munzi ku tisa mwateñi mezi a kasa ka kale. Kono ha mu si ka isa pilu ku Mulimu, ya lelile zeo kale, ni ya lumezi kuli li ezahale.
12Muta wani, Ya Pahami, Muñ'a Bupilo ya Maata Kaufela, n'a mi bizeza kuli mu swabe, mu lile, mu ikute kwa litoho, mi mu apale masaka. 13#1 Bakor 15.32 Kono bakeñisa ku eza cwalo mu sweli ku eza mikiti. Ku tabiwa likomu, ku bulaiwa lingu, ku ciwa linama, ku nwiwa waine, mi mu li, “A lu ceñi, a lu nweñi, kakuli kamuso lu ta shwa!”
14Muñ'a Bupilo ya Maata Kaufela, yena kasibili, u bulezi ni na, a li, “Bumaswe bo ha ba na ku bu swalelwa ni hanyinyani. Ni bulezi, na, Muñ'a Bupilo ya Maata Kaufela.”
Temuso ku Shebina
15Muñ'a Bupilo ya Maata Kaufela a ni bulelela ku ya ku Shebina, muzamaisi wa ndu ya bulena, mi ni y'o li ku yena, 16“U hupula kuli wena u mañi? U na ni tukelo mañi ya ku icakulela libita fa macwe a kwa malundu? 17U ka ba ya maata, kono Muñ'a Bupilo u ta ku nopa, a ku late. 18U ta ku puta sina siputu feela mi a ku nepele mwa naha ye tuna. U ta y'o shwela koo, kwatuko a likoloi z'o n'o ikuhumusa ka zona. U swabisize ndu ya muñ'a hao! 19Muñ'a Bupilo u ta ku zwisa mwa situlo sa hao se si pahami mi a ku ise ku se si kwatasi.”
20Muñ'a Bupilo a li ku Shebina, “Zeo ha li ta ezahala, ni ta lumela mutang'a ka Eliakimi, mwan'a Hilikia. 21Ni ta mu apesa siapalo sa hao sa bunduna ni lukanda cwalo, mi ni mu fe maata kaufela a n'o na ni ona. U ta ba sina mushemi kwa batu ba Juda ni Jerusalema. 22#Sin 3.7 Ni ta mu fa maata a tezi mwatas'a mulena, muikulu wa Davida. U ta swala likii za ndu ya Davida. S'a ta kwalula ha ku na ya ta si kwala, mi s'a ta kwala ha ku na ya ta kona ku si kwalula. 23Ni ta mu tiisa hahulu mwa sibaka seo sina mapo, mi u ta bubanisa lubasi lwa hae kaufela.
24“Kono banabahabo kamukana ni ba mukowa ba ta ba mulwalo ku yena. Ba ta kumalela ku yena sina lipiza ni mikeke ha li pahekilwe kwa mapo! 25Ha ku ta ezahala cwalo, mapo ye n'e kokotezwi, ya tiya, i ta kumuha ni ku wa. Mi ao i ta ba ona mafelelezo a lika kamukana ze ne pahekilwe ku yona.” Ku bulezi Muñ'a Bupilo.
Lozi Interconfessional Bible, Catholic Edition © Bible Society of Zambia, 2009.