Mututo 40

Ku bapula ni ku kakula Tabelenakele

1Muñ'a Bupilo a li ku Mushe, 2“Ka lizazi la pili la kweli ya pili u tome Tabelenakele ili Tende ya Kopano. 3U beye likwati le li na ni matapa a kupuzo mwateñi, mi u kwahele likwati ka lisila. 4Kihona u ka tisa tafule, mi u ta beya lisebeliso za teñi fahalimw'a yona. U kenye hape ni sipahekelo sa lilampi mi u beye lilampi fateñi. 5Hape u beye katala ka gauda, fo ku cisezwa insense, fapil'a likwati le li na ni matapa a kupuzo, mi u paheke lisila kwa munyako wa Tabelenakele. 6U beye katala, fo ku cisezwa litabelo, fapil'a Tende ya Kopano. 7U beye mukeke wa ku tapela mwahal'a Tende ya Kopano ni katala, mi u sele mezi mwateñi. 8U yemise lapa, mi u paheke lisila kwa munyako wa lapa.

9“Cwale u nge mafula a ku toza, mi u toze Tabelenakele ni ze mwateñi kamukana. U i kakule hamoho ni ze mwateñi kaufela ka ona mukwa wo, mi i ta ba ye kenile. 10U toze hape ni katala fo ku cisezwa litabelo ni za teñi kamukana. U i kenise ka mukwa ona wo, mi i ta kena hahulu luli. 11U toze ni mukeke wa ku tapela ni lilaho la ona, mi u' kenise cwalo ni ona.

12“U suteleze Aruni ni bana ba hae kwa munyako wa Tende ya Kopano, mi ba tape ka mezi. 13U apese Aruni liapalo ze kenile, u mu toze, mi ka mukwa o cwalo u mu kenise, kuli a kone ku ni sebeleza a li muprisita. 14U suteleze ni bana ba hae fakaufi, mi u ba apese lihembe. 15Cwalehe, u ba toze, sina m'o tozelize ndat'a bona, kuli ba ni sebeleze ba li baprisita. Ku toziwa kwa bona ku ta ba eza baprisita kuya kuile.”

16Mushe a eza lika kamukana sina mw'a n'a laelezwi ki Muñ'a Bupilo. 17Cwale ka lizazi la pili la kweli ya pili ya silimo sa bubeli, ha ba se ba zwile mwa Egepita, Tabelenakele ya tomiwa. 18Mushe a toma Tabelenakele. A beya matomelo, a yemisa mabala, a comeka miambeso, mi a toma ni mitiyo. 19A apesa tende fahalimw'a Tabelenakele, mi a apesa ye ñwi fahalimw'a yona, sina mw'a n'a laelezwi ki Muñ'a Bupilo. 20Cwale a nga matapa a kupuzo, a' beya mwa likwati. A comeka mitiyo mwa miswalelo ye kwa likwati ni ku li kwahela. 21Kiha s'a beya likwati mwa Tabelenakele, mi a paheka lisila la sisilelezo. Ka mukwa o cwalo a sileleza likwati le li na ni matapa a kupuzo sina mw'a n'a laelezwi ki Muñ'a Bupilo.

22A beya tafule mwa Tende ya Kopano, kwa neku la mutulo wa Tabelenakele kwand'a lisila. 23A beya fateñi linkwa ze beezwi Mulimu, sina mw'a n'a laelezwi ki Muñ'a Bupilo. 24A beya sipahekelo sa lilampi mwa Tende ya Kopano ku libahana ni tafule, kwa neku la mboela wa Tabelenakele. 25A paheka lilampi fateñi fapil'a Muñ'a Bupilo sina mw'a n'a laelezwi ki Muñ'a Bupilo. 26A beya katala ka gauda mwa Tende ya Kopano, fapil'a lisila. 27A ciseza fateñi insense ya muunko o munde, sina mw'a n'a laelezwi ki Muñ'a Bupilo. 28A paheka lisila kwa munyako wa tende. 29A beya katala fo ku cisezwa litabelo kwa munyako wa Tabelenakele, ili Tende ya Kopano. Fateñi a beya sitabelo se ne si yongelezi ni nubu ya lico, sina mw'a n'a laelezwi ki Muñ'a Bupilo. 30A beya mukeke wa ku tapela mwahali a Tende ya Kopano ni katala, mi a sela mwateñi mezi a ku tapa. 31Mushe, Aruni ni bana be hae ba tapa mwateñi kwa mazoho ni kwa mahutu. 32Ha ne ba ya mwa Tende ya Kopano kamba ku ya kwa katala, ne ba tapa, sina mw'a n'a laelezwi Mushe ki Muñ'a Bupilo. 33A toma lapa, a li potolosa tende ni katala, mi a paheka lisila kwa munyako wa lapa. Cwalo Mushe a feleleza musebezi kaufela.

Lilu fahalimw'a Tende ya Kopano

(Lipa 9.15-23)

34 # 1 Male 8.10-11; Isa 6.4; Ezek 43.4-5; Sin 15.8 Lilu la kwahela Tende ya Kopano, mi ya tala liseli la kanya ya Muñ'a Bupilo. 35Mushe a palelwa ku kena mwa Tende ya Kopano, kakuli lilu ne li li fahalimw'a yona, mi i ne i sa tezi kanya ya Muñ'a Bupilo. 36Nako kaufela Maisilaele ha ne ba zwa mwa mafulo ku ya ku a mañwi, ne ba funduka feela lilu ha ne li se li zwile fahalimw'a Tabelenakele. 37Haiba lilu ne li sa zwi, ne ba sa tuteli mwa mafulo a sili. Ne ba litela ku fitela zazi lilu li ka nanuha. 38Lilu le ne li bonisa kuli Muñ'a Bupilo n'a li teñi, ne li ina fahalimw'a Tabelenakele musihali. Mi busihu mwa lilu ne ku tuka mulilo, mo sicaba sa Isilaele ne si kona ku iponela hande nako kaufela ha ne si bata ku tuta mwa mafulo ku ya ku a mañwi.

Currently Selected:

Mututo 40: Lozi09

Highlight

Copy

Compare