Mututo 38

Ku eziwa katala

(Mut 27.1-8)

1A eza katala fo ku cisezwa limpo ka kota ya akeshya, ka ne ka likanelela mwa butelele ni mwa bupala, ili mapeka a mabeli ni licika mo ni mo. Kwa ku ya mwahalimu n'e li lipeka li li liñwi ni licika. 2A eza lingo ze subeketile mwa malulu a mane a kona, mi ili nto i liñwi ni katala. A ka kwahela kaufela ka kopa. 3A eza lisebeliso kamukana za fa katala, ili mañetana a mulola, lifocolo, mikeke ya kwiti, liñomeliso ni mañetana a mulilo cwalo. Lisebeliso zeo kamukana a li eza ka kopa. 4A ezeza katala lukwakwa ka lisipi za kopa ze indilwe, mi a lu beya kwatas'a libala kuli lu cikimane katala. 5A eza miswalelo ye mine ya ku ka lwalisa, mi a i beya kwa malulu a mane a lukwakwa lwa kopa. 6A eza mabala ka kota ya akeshya, mi a' kwahela ka kopa. 7A comeka mwa miswalelo mwa matuko a katala, ili ya ku ka lwalisa. A eza sikisi mwa katala ka mapulanga.

Ku eziwa mukeke wa ku tapela

(Mut 30.18)

8 # Mut 30.18 A eza mukeke wa ku tapela ka kopa, hamoho ni lilaho la ona. Mukeke wo, wa eziwa ka liiponi za basali ba ba ne ba sebeza kwa munyako wa Tabelenakele.

Ku ezwa lapa la Tabelenakele

(Mut 27.9-19)

9A eza lapa. Masila a lona a kwa neku la mboela n'e li masila a bwanda bo bu indilwe bwa line ye nde, ili mapeka a mashumi a ketalizoho mwa butelele. 10Misumo ye mashumi a mabeli ni matomelo a teñi a mashumi a mabeli ne li za kopa. Liñomeliso kwa mitiyo ni litupa i ne li za silivela zona. 11Kwa neku la mutulo, ne ku na ni masila a eza mapeka a mashumi a ketalizoho kwa butelele, a swelwi ki mitiyo ye mashumi a mabeli ye ne yemi mwa matomelo a teñi a mashumi a mabeli a kopa. Liñomeliso kwa mitiyo ni litupa i n'e li za silivela. 12Kwa neku la wiko masila n'a eza mapeka a mashumi a mabeli ka a ketalizoho mwa butelele, a swelwi ki mitiyo ye yemi mwa matomelo a yona ye lishumi, ku beya liñomeliso za mitiyo ni litupa za silivela. 13Kwa neku la upa masila n'a eza mapeka a mashumi a mabeli ka a ketalizoho. 14Kwa neku le liñwi la munyako ne ku na ni masila a n'a eza mapeka a supile ni licika mwa bupala, a n'a swelwi ki mitiyo ye milalu ye ne yemi mwa matomelo a yona a malalu. 15Kwa ba cwalo ni kwa neku le liñwi hape, mi kwa maneku a mabeli a kwa munyako wa lapa ne ku na ni masila a eza mapeka a supile ni licika mwa bupala, a swelwi ki mitiyo ye milalu ye n'e yemi mwa matomelo a malalu a yona. 16Masila kamukana a potolohile lapa n'a ezizwe ka bwanda bo bu indilwe bwa line ye nde. 17Matomelo a mitiyo n'a ezizwe ka kopa, mi liñomeliso za kwa mitiyo, ni litupa za yona hamoho ni lingo za mitiyo ne li kwahezwi ka silivela. Misumo ya kwa lapa kaufela ne i kopanyizwe ka litupa za silivela. 18Lisila la kwa munyako wa lapa, le ne li kabisizwe ka bukwala, ne li ezizwe ka boya bwa ngu bo bu basizwe butala, bupuzwa ni bufubelu, ni ka bwanda bo bu indilwe bwa line ye nde. Mwa butelele n'e li mapeka a lishumi, mi ku ya mwahalimu n'e li mapeka a mabeli ni licika, kamukwaoswana ni masila a kwa lapa. 19Ne li swelwi ki mitiyo ye mine ye ne yemi mwa matomelo a yona a mane a kopa. Liñomeliso, lingo ni litupa za yona ne li li za silivela. 20Likonkwani kamukana za Tabelenakele ni za lapa ne li ezizwe ka kopa.

Bukiti bwa gauda, silivela ni ze ñwi za ku yahisa Tabelenakele

21Ze, ki zona lisinyehelo za lisipi ze sebelisizwe kwa ku yaha Tabelenakele, mo ne ku bulukilwe matapa a kupuzo. Mukoloko wa lika ze ne sebelisizwe kaufela n'o laezwi ki Mushe, mi n'o ezizwe ki Malivi ba ba ne ba li mwatas'a Itamare, mwan'a muprisita Aruni.

22Bezaleele mwan'a Uri, mwan'a Huri wa lusika lwa Juda, a eza lika kamukana zeo Mushe n'a laezwi ki Muñ'a Bupilo kuli a li eze. 23Mutusi wa hae, yena Oholiabi, mwan'a Akisamaki wa lusika lwa Dani, i n'e li mubeti ya n'a hupula misebezi ya bukwala ni muluki wa masila a matala, a mapuzwa ni a mafubelu a boya bwa ngu, ni muluki wa masila a line ye nde.

24Gauda kaufela ye n'e sebelisizwe mwa musebezi wa Sibaka se si Kenile, ili gauda ye ne ketezwi Muñ'a Bupilo, ne i likana ni likilo ze sikiti ni mianda ye milalu ka ku ya ka bukiti bwa sikala sa Tempele. 25#Mut 30.11-16 Silivela, ha ku iwa ka palo ya batu, n'e li likilo ze eza likiti ze ne ka mianda i ketalizoho ni mashumi a malalu ka ku ya ka bukiti bwa sikala sa Tempele. 26#Mat 17.24 Palo ye i likana ni palo ya batu ba ba iñolisize mwa sipalo sa sicaba, yo muñwi ni yo muñwi h'a zwisize mali a n'a tokwahala, ka ku ya ka bukiti bwa sikala sa Tempele. Ne ku na ni banna ba likiti ze mianda ye silezi ka ze talu ni mianda i ketalizoho ka mashumi a ketalizoho ba ba ne ba iñolisize ha ku balwa, ili ba lilimo ze mashumi a mabeli ni ku ya kwahalimu.

27Silivela ye ne eza bukiti bwa likilo ze likiti ze ne ka mianda i ketalizoho i sebelisizwe kwa ku eza mutomo wa Sibaka se si Kenile ni matomelo a mitiyo ya lisila. Kamukwaocwalo, likilo ze eza likiti ze ne ka mianda i ketalizoho za silivela li sebelisizwe kwa ku eza matomelo a mwanda, ili likilo ze mashumi a mane ni ze ketalizoho ka mutomelo ni mutomelo. 28Ka silivela ye siyezi ye ne eza likilo ze mashumi a malalu, a eza liñomeliso za kwa mitiyo, likwahelo ni litupa za yona. 29Kopa ye ne ketezwi Muñ'a Bupilo ne i fita fa likilo ze likiti ze talu ka mashumi a supile ni a mabeli. 30Ka yona a eza matomelo a kwa munyako wa Tabelenakele, katala ka kopa ni lukwakwa lwa kona, ni lisebeliso za fa katala kaufela, 31mutomo wa lapa le li potolohile Tabelenakele ni munyako wa lapa, ni likonkwani kamukana za Tabelenakele ni za lapa le li i potolohile.

Currently Selected:

Mututo 38: Lozi09

Highlight

Copy

Compare