Mututo 37
37
Likwati la Bulikani
(Mut 25.10-22)
1Bezaleele a eza Likwati la Bulikani ka kota ya akeshya, ya ba lipeka li li liñwi ni licika mwa butelele. Bupala bwa ba bo bu fitelela hanyinyani licika la lipeka hamoho ni butungi cwalo. 2A li kwahela ka gauda ye nde mwahali ni fande, mi a li potolosa ka mufunga wa gauda. 3A li ezeza miswalelo ye mine ya gauda, ya ku li lwalela, mi a i beya kwa mahutu a lona. Mwa maneku a mabeli a beya miswalelo ye mibeli kafa ni kafa. 4A eza mitiyo ka kota ya akeshya, mi a i kwahela ka gauda. 5A i comeka mwa miswalelo mo kwa maneku a mabeli a Likwati la Bulikani, ili ya ku li lwalisa. 6A eza sikwahelo ka gauda ye nde. Mwa butelele sa ba sa lipeka ni licika, mi sa fitelela hanyinyani licika la lipeka mwa bupala. 7Kwa maneku a mabeli a sikwahelo a eza likerubimi ze peli ka gauda ye tulilwe. 8A beya ye ñwi kwa makalelo ni ye ñwi kwa mafelelezo. A li kopanyeleza ni sikwahelo kuli li be nto i liñwi. 9Likerubimi ne li pakuzi mafufa a zona fahalimu, ku sileleza sikwahelo. Ne li talimani kono ye ñwi ni ye ñwi i talimezi fa sikwahelo.
Ku ezwa tafule
(Mut 25.23-30)
10A eza ni tafule ka kota ya akeshya. Mwa butelele ne li peka i liñwi, mi mwa bupala licika la lipeka. Kwa ku ya mwahalimu ne ku fitelela hanyinyani licika la lipeka. 11A i kwahela ka gauda luli mi a i potolosa ka mufunga wa gauda. 12A i potolosa hape ka kabala ka ka likana ni singandi, mi a i potolosa ka mufunga wa gauda. 13A eza miswalelo ye mine ya ku i nanulisa, mi a i beya mwa malulu a mane a tafule kwa mahutu a yona. 14Miswalelo ye swala mitiyo ya ku lwalisa tafule i beiwa kwatas'a kabala. 15A eza mitiyo ya kota ya akeshya, mi a i kwahela ka gauda. 16A eza ni mikeke ya gauda ye nde ya ku beya fa tafule, ili lipulaiti, likomoki, lindondo ni mikeke ya kwiti ye itusiswa kwa limpo ze nwiwa.
Ku ezwa sipahekelo sa lilampi
(Mut 25.31-40)
17A eza Sipahekelo sa Lilampi ka gauda ye nde. A eza lilaho ni musumo wa sona ka gauda ye tulilwe. Lipalisa za ku si kabisa, hamoho ni tukoto ni tupizanyana twa kopanelela ni sona. 18Kwa zwa mitai ye silezi kwa matuko a sona, ye milalu kafa ni kafa. 19Mutai o muñwi ni o muñwi wa yona n'o na ni lipalisa za likabisa ze talu, ili za sibupeho sa palisa ya alumondi, ni tukoto ni tupizanyana cwalo. 20Musumo wa Sipahekelo sa Lilampi n'o na ni likabisa za lipalisa ze ne ze bupehile sina palisa ya alumondi ni tukoto ni tupizanyana. 21Kwatas'a mutai o muñwi ni o muñwi, wa ye milalu ya kafa ni kafa, ne ku na ni sikoto si li siñwi. 22Makoto ni mitai ne li li nto i liñwi ni Sipahekelo sa Lilampi. Ne li ezizwe ka gauda ye tulilwe. 23A ezeza sipahekelo seo lilampi ze supile, mi a eza ni mamangato ni mikeke ya mulola ka gauda ye nde. 24A eza Sipahekelo sa Lilampi ni lika za sona kamukana ka gauda ye eza bukiti bo bu likana ni likilo ze mashumi a mane ka ze ketalizoho.
Ku ezwa katala ka insense
(Mut 30.1-5)
25A eza katala fo ku cisezwa insense ka kota ya akeshya. Ne ka likana mwa butelele ni mwa bupala, ili licika la lipeka mo ni mo. Ku ya mwahalimu i n'e li lipeka li li liñwi. Manaka a teñi n'a eza nto i liñwi ni kona. 26A ka kwahela fahalimu ni mwa maneku a mane a kona, hamoho ni manaka kaufela ka gauda luli, mi a ka potolosa ka mufunga wa gauda. 27A ka ezeza miswalelo ye mine ya gauda ya ku ka lwalisa, mi a i beya kwatas'a mufunga kwa maneku a mabeli, ili ku swala mitiyo ya ku ka lwalisa. 28A eza mitiyo ka kota ya akeshya, mi a i kwahela ka gauda.
Ku eziwa mafula a ku toza hamoho ni insense
29 #
Mut 30.22-38
A eza hape mafula a kenile a ku toza, ni insense ye nunka hande, ka mukwa wa mutu wa sikwala.
Currently Selected:
Mututo 37: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
