Mututo 25

Taelo ya ku yahela Muñ'a Bupilo Tabelenakele

(Mut 35.4-9)

1Muñ'a Bupilo a li ku Mushe, 2“U bulelele Maisilaele kuli ba ni fe limpo. Wena u ta ni amuhelela zona ku mutu ufi ni ufi y'a ta lata ku ni fa. 3Limpo z'o ka amuhela ki gauda, silivela, kopa, 4lisila la boya bwa ngu le li basizwe butala, bupuzwa ni bufubelu cwalo, lisila le linde la line ni masila a ezizwe ka boya bwa puli, 5litalo la poho ya ngu le li basizwe bufubelu, ni matalo a mande ni likota za akeshya, 6mafula a mwa lilampi, lukumba lwa ku nunkisa mafula a ku toza ni miinko ye minde cwalo, 7macwe a butokwa a onikisi ni likabisa ze nde za butokwa za ku beya fa liapalo za muprisita yo muhulu. 8Ba ta ni ezeza Tabelenakele, ili sibaka se si kenile, kuli ni kone ku pila mwahal'a bona. 9Mu ta eza Tabelenakele ni za mwateñi kaufela ka ku latelela mihupulo ye ni ta mi zibisa.

Likwati la Bulikani

(Mut 37.1-9)

10“Hape, ba ta eza likwati ka likota za akeshya. Mwa butelele i be lipeka ni licika, mwa bupala i be ku fitelela hanyinyani licika la lipeka, mi i be tikanyo ye swana ni ku ya mwahalimu. 11Kwande ni mwahali u i apese ka gauda ye nde. U i potolose ka likabisa za gauda ze bupilwe hande. 12U i beye miswalelo ye mine ya gauda kwa malulu, ili ya ku i nanulisa, ye mibeli kafa ni ye mibeli kafa. 13U ta eza likota za akeshya, mi ni zona li kwahelwe ka gauda. 14Likota zeo li comekwe mwa miswalelo ye kwa matuko a likwati, kuli li nanulwe. 15Likota li siyale cwalo mwa miswalelo, li si ke za comolwa mwateñi. 16U ta beya mwa likwati matapa a mabeli a kupuzo a ni ta ku fa.

17 # Maheb 9.5 “U ta eza sikwahelo sa gauda ye nde. Mwa butelele si be lipeka ni licika ni mwa bupala si fitelele hanyinyani licika la lipeka. 18Mwa maneku a mabeli a sikwahelo u eze likerubimi ze peli za gauda ye tulilwe. 19U eze se siñwi kafa ni se siñwi kafa. U li eze kuli li be nto i liñwi ni sikwahelo. 20Likerubimi li pakulele mafufa a zona fahalimw'a zona, kuli a sileleze sikwahelo. Li swanezi ku talimana, ye ñwi ni ye ñwi i nze i lubukezi fa sikwahelo. 21U ta beya sikwahelo fa likwati, mi mwa likwati u ta beya matapa a mabeli a kupuzo a ni ta ku fa. 22Ni ta kopananga ni wena hona mo. Fahalimw'a sikwahelo ni mwahal'a likerubimi ze fahalimw'a likwati, ni ta ku fa milao ya ka kamukana bakeñisa sicaba sa Isilaele.

Linkwa ze fiwa Mulimu

(Mut 37.10-16)

23“U ka eza tafule ka kota ya akeshya. Mwa butelele i be lipeka, mwa bupala licika la lipeka, ni ku ya mwahalimu i be ku fitelela hanyinyani licika la lipeka. 24U i kwahele ka gauda ye nde, mi u i potolose ka likabisa za gauda ze bupilwe hande. 25U i potolose ka kabala ka ka likana ni singandi, mi ni kona kabala u ka potolose ka mufunga wa gauda. 26U i ezeze miswalelo ye mine ya gauda ya ku i lwalisa, mi u i beele kwa malulu ko ku na ni mahutu a yona. 27Miswalelo mo ku comekwa mitiyo ya ku lwalisa tafule i beelwe fakaufi ni libala. 28U eze mitiyo ya akeshya, mi u i kwahele ka gauda. 29U eze mikeke, likomoki, lijaki ni mikeke ya kwiti ye ka sebeliswa ha ku fiwa limpo ze nwiwa. Mi zeo kamukana li eziwe ka gauda ye nde. 30#Malivi 24.5-8 Fa tafule ye fapil'a ka, mu swanezi ku ni beelanga kamita linkwa ze mu ni fa.”

Sipahekelo sa lilampi

(Mut 37.17-24)

31“U eze sipahekelo sa lilampi ka gauda ye nde. U eze lilaho la sona ni musumo ka gauda ye tulilwe. Lipalisa ze si kabisa, hamoho ni makoto ni tukomoki, i be nto i liñwi ni ona musumo. 32Ku be ni mitai ye silezi ye ka banguka kwa musumo, ye milalu kafa ni kafa. 33O muñwi ni o muñwi wa mitai ye silezi yeo u ta ba ni lipalisa ze talu za bukabali ze bupehile sina lipalisa za alumondi ze na ni makoto ni tukomoki cwalo. 34Musumo wa sipahekelo u be ni lipalisa ze ne ze u kabisa, ze bupehile sina lipalisa za alumondi ze na ni makoto ni tukomoki cwalo. 35Ku be ni kakoto mwatas'a mutai o muñwi ni o muñwi ku ye milalu ye kafa ni kafa. 36Makoto a mitai i be nto i liñwi ni sipahekelo sa lilampi. I be nto i liñwi ya gauda ye nde ye tulilwe. 37U eze lilampi ze supile z'o ka paheka fa sipahekelo, mi li talime kwahalimu kuli li monyehe fapil'a zona. 38U eze mamangato ni tukeke twa mulola wa fa liiso ka gauda ye nde. 39U sebelise gauda ye eza bukiti bo bu likana ni likilo ze mashumi a mane ni ze ketalizoho ku panga sipahekelo sa lilampi ni ze ku sona kamukana. 40#Lik 7.44; Maheb 8.5 U tokomele, mi u li eze ka ku latelela mutala o' bonisizwe fa lilundu.

Currently Selected:

Mututo 25: Lozi09

Highlight

Copy

Compare